- Meeqqat siunissaraagut aamma meeqqat atuarfiata meeqqat naleqassuaat nukittorsassavaa
- Ilinniartitsisut perorsaasullu suliaat naleqaqisoq ataqqineqassaaq aamma akissarsiaanni takuneqarsinnaassaaq
- Atuarfiit angajoqqaallu suleqatigiinnerat nukittorsarneqassaaq
- Meeqqat atuarfiat pineqassaaq, iluarsaassisarnerit Majoriatut ittut pinnagit.
- Inuttut ineriartorneq aamma nassaarniallaqqissuseq inuup pigereerpai aamma imminut naleqartinneq nukittorsarneqartarpoq ataqqineqarnikkut. Taamaattumik fagi inuttut ineriartorneq taarserneqassaaq idefagimik, atuartut nassaarniallaqqinnerat ikorfartorniarlugu.
Meeqqat inuttut ineriartornerat Suleqatigiissitsisut anguniagaasa pingaarnerit ilagaat aamma meeqqat sorsuutigaarput meeqqat paarilluarneqarnissaat, ilinniarnissaallu aamma inuttut ineriartorneq iputaavoq Suleqatigiissitsisut atuarfeqarnermut politikkianut kaamisaasoq.
Angajoqqaat kisimik meeqqat ineriartornissaannut aamma naleqartutut isiginissaannut qularnaarisuussanngillat. Angajoqqaat atuarfinni perorsaasut aamma meeqqeriviit suleqatigiilluarnissaat toqqammaviussaaq, nunami maani meeqqat ineriartornerannut. Angajoqqaat qitornaminnut tunniussinnaasaat pitsaanerpaaq tassaavoq meeqqap imminut upperilernissaanut piginnaasamilu upperilernissaanut ilinniartitsinissaq. Aamma tamanna ilinniartitsiup ilinniarluarsimasup perorsaasullu ilinniarluarsimasup suliassaraat. Taakku akisussaaffeqartorujussuupput meerartatta imminnut upperilernissaannut, ullummi tamaasa akunnerpassuarni taakku paarsisarput atuartitsillutillu.
Inuiaqatigiit uangut meerartagut sakkortuumik sumiginnarpagut, perorsaasut atugaat sumiginnaraangatsigit.
Nunatsinni massakkorluinnaq pisariaqartinneqartorujussuupput perorsaasutut ilinniarsimasut, meeqqat inuttut nukittorsarnissaannut immikkut ilinniarsimasut. Suleqatigiisitsisuni sulissutiginiarparput perorsaasut akissarsiaasa qaffanneqarnissaat. Perorsaasut naleqarnerat akuereriartigu nukissaqaleqqullugit meeqqat naleqarnerisa qaffassarnissaannut. Upperaarput perorsaasut atugaasa pitsanngortinneqarsinnaanerat tassaammat meeqqat atungaannik pitsanngorsaaneq.
Meeqqat atuarfianik misigisaqarnerup meeqqat imminut naleqartinnera sunnertarpaa
Meeqqap inuttut naleqartutut ineriartornera meeqqat atuarfiani misigisartagaanut attuumassuteqarluinnarpoq.
Meeqqat atuarfiani fagioreerpoq – Atuarfitsialammi- inuttut ineriartorneq, kisianni inerineri takussaanngillat. Majoriamik pisariaqartitsinersuup, tassa meeqqat atuarfiani atuareernerup kingorna inuusuttunik suliffeqartitsilersussap ilinniagaqartitsilersussap uppernarsarpaa – Atuarfitsialak – nunarsuarmi atuarfiit pitsaanersaat – iluatsinngilluinnaqqissaarsimasoq. Uangut upperaarput meeqqat inuttut ineriartorneranni perorsaasut sulisorineqarnissaat pingaarnerpaasoq, naak inuppassuit taama isumaqanngikkaluartut.
Idéfag eqqunneqarli
Tigussaasumik isumaqarpugut fagi “inuttut ineriartorneq” taarserneqassasoq idéfagimik. Idefag fagiuvoq meeqqat isumassarsianik ineriartortitsisinnaanerannik aamma isumassarsiaminnik avitseqateqarsinnaanerannik imallik; isumassarsiat siuaruaraanni nukittunerulersarput aamma suleqatigiinneq atuartut tamarmik ataqatigiinnerulerneraanik kinguneqartarpoq, fagimmi meeqqat ilinniartittussaavai suelqatigiinnermut.
Isumassarsiat aallartinneqartut piviusunngortinneqartullu takullugit inuunermi misigisat angisuut ilagaat. Atuartut imminnut naleqartinnerat qaffassaaq kinguneqarluartumik; atuarfiup iluaniinnaanngitsoq aammali inuunerup sinnerani inuiaqatigiinnilu peqataanermi. Suliniummik isumalimmik ataatsimoorussineq ataqatigiisitsilersarpoq aamma suleqatigiissinnaanermik nukittunerulersitsisarpoq. Piginnaasaq nassatarissallugu pitsaalluinnartoq. Takorluulaariaruk saaniluaqqamut qnoq pingaartigisoq imaanut anngunnissaq. Meeqqat atuarfiata meerartagut piginnaanernik tuniorassavai, imaanut avalassinnaanngorlugit. Isumaqarpugut idefagip meerartagut pikkorinnerulersissinnaagai aamma piginnaasaat ineriartortissinnaagai, imaq anguinnarnagu aamma misilittagaqalerumaartut imarsuarmi angalalerunik iluaqutissaminnik.
Idéfagip meeqqat eqqarsarsinnaasusaat eqeersassavaa. Atuartarput akunnerni arfineq marlunni – arfineq pingasuni tamannalu ilikkarsinnaasusaannut pitsaanngilaq, timi isumalu ingiaqatigiimmata. Silarsuarmi meeqqat nassaarsiullaqqinnersaapput – periarfissinneqaraangamik qanorluunniit sulisinnaallutik. Silarsuarmi meeqqat takorluuillaqqinnersaapput. Inersimasunit nassaarsiullaqqinnerupput, inersimasunit takorluuillaqqinnerupput. Eqqarsarsinnaanerat ikorfartoriartigu atuarnertik nuannarisinnaaqqullugu.
- Perorsaasut akuerisigit, akisussaaffilerujussuupput. Taakku Kalaallit Nunaata siunissaanut ineriartortitseqataapput ilusilersueqataallutillu – meerartatsinnut.
- Idéfag ilisaritilli. Fagi Inuttut ineriartorneq taarserneqarli. Meeqqat atuarfiata misigissavaa angusat pitsaanerusut aamma meeqqat atuartut nuannaartut kinguaariiaani misigineqartalissagaluarput. Nuannaarnermi angusallu pitsaasut ataqatigiipput.
Aningaasalersornissaa
Danskit aningaasaat 75 millioner koruunit Suliummut Majoriamut atortarpagut, Majoriaq tassaavoq atuarfimmi katatanik katersuivik. Aningaasat meeqqat atuarfianut uterteqqinneqartariaqarput, atorlugillu ilinniartitsisut perorsaasullu akissarsiaasa pitsanngorsarnissaannut aamma atuartitsissutinik nutarterinissamut naleqqussaanissamullu. Naatsumik oqaatigalugu: Aningaasat isumaqarnerusumik atoriartigit aningaasaliillutalu amerlanerpaat iluaqutissarsivigisinnaasaannut.