1. Naalagaaffeqatigiinnerup iluani suleatigiissutigineqarsinnaasussamik ineriartortitsinissakkut aningaasaateqarfiliortoqassaaq. Aningaasat siullermik pilersinneqarsinnaapput, piffissalikkamik akileraartitsinikkut, innuttaasut tamarmik – kalaallit, qallunaat, savalimmiormiullu – tapeeqataallutik. Isertitat ass. aatsitassarsiornikkut piiaanerneersut, tamakkerlugit aningaasaliissutaasinnaapput inuiaqatigiinnik taakkuninnga pingasuusunik ataatsimut iluaqutaasussatut siunertalimmik.
  2. Killavaat Alannguani Tanbreezip allatuulaartumik aatsitassarsiornissaa tuaviornerpaamik aallartittariaqarpoq. Aatsitassarsiornermi inatsit allanngortariaqarpoq Kalaallit-Nunaanni aatsitassarsiornernik pilersaarutinik allartitsisoqarsinnaanngorlugu aningaasanik kaaviiartitatigut periusaasartut tunngavigalugit inatsimmik aaliangersaanikkut. Taanna alloriaat ammaassisuussagaluarpoq kalaallit, piiakkat suliareqqitallu ilaannik, piginnittussaatitaasinnaanngornerinut. Taamaaliornikkut aamma ilanngullugu qulakkiissagaluarparput kalaallit inuiaat aatsitassarsiornikkut isertitaqaateqarsinnaanngornissaat piiaaffilluunniit matuneqareeraluarpat, piiaaneq unitsinneqareeraluarpalluunniit suli isertitaqaatigisinnaassagaluarparput. Aatsitassaqarnikkut inatsit allanngortissavarput, qulakkeerumallugu, aatsitassarsiornermi isertitat najugaqavissunut iluaqutaanissaat, toqqaannartumik inuiaqatigiinnut tuttarnissaat najugaqarfinni inuussutissarsiutigalugit suliffeqarfitsigut siuarsaataasinnaanngortillugit. Aatsitassanik uranitalinnik qinngualinatalinnillu Kuannersuarni GME-p suliniutaa unitsittariaqarpoq Tanbreezellu piiaasoqarnissaanik suliniutaanik misilittagariligassatta akuerinissaasa tungaanut siunissamilu piiaanikkut- aatsitassarsiornissatigut – piiaanissanillu siunissami pilersaarutitigut aningaasanik kaaviiaartitsinissakkut periusissamik atorsaasumik nassaarnissatta tungaanut. Piiaanissatigut aatsitassarsiornikkullu sinaakkutassat taamaattoq aalaakkaasunngortariaqarput. Imminut akilersinnaanngilaq taama nalileriaatsitsigut nikerartiginiarutta, ammut qummut nikerartitseqattaarluta. Kalaallit-Nunaat isumaqatigiissuteqarfigereeraanni, isummaminik allannguissanngilaq. Taamaammat siunnersuutigerusupparput,siunissami  isumaqatigiissusiortoqartalissasoq partiit akimorlugit, piumasaqaatitigut sinaakkusiinerit ukiorpassuarni siunissamut atuuttussanngortinneqartassasut.
  3. Kalaallit-Nunaanni inuussutissarsiornikkut ingerlaneq ataatsimut isigalugu siuarsagassaavoq. Tamanna pisinnaalissaaq aallarneerusuttunik kajumissaaruteqarnikkut inatsisinik tigussaasunik peqartitsinikkut piginnaaniliinertigullu oqilisaanikkut. Aamma pisinnaavoq inuussutissarsiutigalugu suliffeqarnikkut aporfiiaanikkut, qulakkeerinneqataanikkullu, pisortatigut suliakkiussanik suliarinnittussarsiuussinikkut neqeroortoqarsinnaanngorutsigu, Inatsisartuuppata kommuniuppataluunniik assigiimmik – tamatigut, nunaminertanillu qinuuteqaateqaateqartoqarsimatillugu ajrnaannerusunnguinikkut, inissianut aningaasaliinikkut kiffartuussinermilu tapiissusiisarnikkut, taamaattumik siunnersuutigerusupparput, tamakkununnga tunngasunut, nittartagaqalernissaa tamanik iserfigineqarsinnaasumik, soorlu aalisarnerup iluani taamaattoqartoq.
  4. Kujataani inuussutissarsiornikkut ineriartortitsinissaq immikkut siulliunniarneqarpoq. Sulinasuartussamik suliffeqarnikkut ataatsimiititaliamik, Namminersortuniik, Sulisitsisut kattufianniik, Kommuni Kujallermiik attuumassutilinniillu kattuffinnit ilaasortaatitaqartussamik, piaartumik pilersitsinasuartoqarnissaa siunnersuutigerusupparput. Taanna ataatsimiititaliaq suliakkerneqassaaq, tigussaasunik siunnersuusiussasoq, qanoq Kujataani suliffeqarnikkut ineriartortitsisoqarsinnaanersoq kajumissaarisoqarsinnaanersorlu. Taassuma ataatsimiititaliap nalunaarusiaa katalogiliaalu suliffissaqarnikkut siuarsaataasinnaasunik siunnersuutinik imalik, aallartinnerminniik ukioq ataaseq qaangiuppat tunniutissavaat imaluunniilli inatsisartut ataatsimeeqqaalerpata, naammassineqarsimaguni tunniunneqarsinnaavoq tassani.
  5. Inatsisitigut aaqqiissariaqarpugut, politiit inunnillu siunnersortit iliuuseqarsinnaatitaatilerlugit, persuttaasoqartillugu ingammik meeqqanut arnanullu nakuusertoqartillugu. Ajornartorsiujuaratarsinnaasoq peertariaqarpoq, Kalaallit-Nunaata meerartai arnartaallu toqqissisimasumik pitsaanerunillu atugaqalertikkumallugit. Inunnik sullisineq annertusartariaqarpoq, immikkut ittumik Naalagaaaffeqatigiinnerup iluani suleqatigiinnernik pilersitsisoqarsinnaatillugu, soorlu Tasiilami taammattoqareersoq.Aammattaaq isumaqatigiissusiortariaqarpugut, malersuisarnerup (stalking) nikassaasarnerup, internetsikkullu pisut ilanngullugit oqaaseqaateqartarnikkullu oqaaserisimasat pillugit, malitseqartitsisoqarsinnaanngorlugu.
  6. Innuttaasunut tapiissutaasartut, sivikinnersumik sivisunerusumilluunniit pisartagaritinneqartartut aaqqiissuteqarfigisariaqarpoq, ukiunimi 18´nini suli nikisinneqarnikuunngilaq. Tapiissutaasartut utaqqiissaasumik tunniukkallarneqartartuupput, saniatigut iliuuseqarnermik ingiaqateqartinneqartarsinnaallutik, tunineqartoq imaassinnaammat sukkanerpaamik imminut pilersorluni aallartikkusuttoq. Inuuniarnikkut ajornartorsiutit kinguaariinnut tullernut kingornunneqartarneri unitsittariaqarpoq – kinaluunniit meeraq inuusuttoq piitsuunissamut inunngorneq ajorpoq. Ullumikkut Kalaallit- Nunaanni piitsutut inissisimassanngilaq. Meeraaguni, ilaqutariiugunik inersimasuuguniluunniit sivisuumik suliffeqarsimanngitsoq.
  7. Inuiaqatigiinni eqqugaanerpaat suliniuteqarfiusussat: meeqqat, innarluutillit, utoqqaat, tarnimikkullu nappaatillit, SUKASAAFFIGINEQARTARIAQARPUT. Kinaluunniit Nunatsinni nalilimmik toqqissisimasumillu inuuneqarsinnaasariaqarpoq.Innuttat toqqammaviatigut pisariaqartitaannik qulakkeerfiginissaat, ingerlatsivinnik tigooqaanissamiik, pingaaruteqarneruvoq. Aamma tamanna atuuppoq peqqinnissaqarnikkut, pisariaqarluinnarpasileqqavoq pitsannguinissaq siunertaralugu, pissutsinik misissueqqissaarnissarput, naalagaaffeqarnerup iluani atukkanut naleqqussaasinnaanngorluta. Iluusissatut taakkartukkatsinut aningaasartassat mittarfissuarnik pilersaarusianik qimerluueqqinnermi nassaarineqarsinnaapput imaluunniit piiaaffissani isertitaqaataalersussani, aamma soorlu pisortaqarfiit allaffissorneri annikillisaaffigerusukkigut, kiisalu inuussutissarsiutitigut suliaqarfikkullu allannguuteqartitserusuttugut sipaaruteqarnernik kinguneqartitsilluta. Pilersaarusiaq siunissamut ungasissumut isigivoq, kisianni pisariaqarluni.Taassuma iluani aajuku siunnersuutissagut:
    • Tarnimikkut ajuutillit ajoqutaasa sorpiaanerinik paasiniaanermi nalilersuuteqartarnikkut pissutsit nukittorsaavigalugit.
    • Nunamut tamarmut tarnikkut nappaatilerisut ilallugit – pinaveersaartitsinermut sangutillugit – inunnik isumaginnittoqarfik ilinniartitaanikkullu sammisaqarfiit qanimut suleqatigitillugit.
    • Inuit pissusiinik ilisimatussaatinik aallarniineq internetsikkullu paasissutissiissarnerit, isiginnaagassiatigut naalaarutikkullu inuiaqatigiinnut kiffartuutitut- Qallunaat-Nunaannik suleqateqarneq nunanillu allanik, ilisimasassatigut immersuuteqarnikkut
    • Innarluutilinnut inatsiseqarneq tamakkiisumik atuutsinneqalissaaq
    • Suliniaqatigiiffiit Illorsuassaat aningaasanik inatsimmut ilannguttariaqarpoq. Illorsuassaq innarluutillit peqatigiiffiinik, suliassatigut unamminartunik sungiussereernikunik, ingerlanneqassaaq.
    • Ullumikkut ilinniartitsisut 9 %´tiinnaat, meeqqanik immikkut pisariaqartitsisunik atuartitsinissaminnut ,ilinniagaliupput. Atorsaasumik ilinniartitsisunik ilinniartitseqqiissutaasinnaasunik peqartitsisariaqarpugut. Innarluutillit illersuisuat politikerinik ataqqineqarnerusariaqarpoq, illersuisullu innersuussutai piaarnerpaamik malinniarneqartassapput piviusumut tutsiniarsarilerlugit.
    • Tarnikkut nappaatilinnik sullissineq ullumikkut kalisattoortorujussuuvoq. Kalaallit-Nunatsinni tarnimikkut nappaatillit 1.500 missiliorpaat – ataatsimut oqaatigissagaanni annertunerusumik  ataqatigiissumik sullissiniarfeqanngilaq isumaginnittuusinnaasumik. Sullissisussatigut aallaqqaaterpiaaniik aallartilluta pilersitsisariaqarpugut. Aningaasaaruteqalernata, aatsaat ajutumeertoqartillugu, pinaveersaartitsinikkut sullissisariaqarpugut, sapinngisamik siusinaartumik.
  8. Suleqatigiissitsisut ilungersuullugu sulissutiginiarpaat, Naalagaaffeqatigiinneq ineriartortitsinikkut suliniuteqarfiussasoq avissaariartuaarfiunani, soorlu namminersornermut inatsimmiittoq. Holdeqatigiittut immitsinnut takorluussaagut, ajunngequtigut suleqatigiissutigalutigit. Sulissutigineqassaaq, naalagaaffik ataatsimoortumik tapiissutit qaffaavigineqarnissaat, naalagaaffimmit tigooqqaanikkut ileqqoreqqusat kalluanngikkaluarlugit Namminiilerniarnissarluunniit killilersuiffiginngikkaluarlugu. Ammaattariaqarparput Qallunaat-nunaat nunatsinni arlariinnik aningaasalersuisinnaanissaanut, ataatsimoorussamik isigisumik aaliangersimasunik ineriartortitseqatigiissinnaanngorluta imaluunniilli Naalagaaffeqatigiinnermut tamarmut iluaqusersuutitigut suleqatigiinnermik kinguneqartitsisinnaanngorluta. Naalagaaffik ataatsimoortumik tapiissutit massakkutuut taama eqartigisumik inisseqaneranniik allannguisariaqarpugut. Kingunipilua imaammat: Inuiaqatigiinni sanngiinnersagut akiliisuupput pavungaraallak nunatta namminiilivinnissaanik anguniagalersortut peqqutaallutik.
  9. Taamaattumik Naalagaaffeqatigiinnitsigut sinaakkuttagut nukittorsaavigisariaqarparput, sillimaniarnikkut illersornissaqarfikkullu. Sillimaniarnermi politikkimi pissutsit nutaat piumasaatigivaat, Naalagaaffeqatigiinnitsinni ataqatigiissasugut unammilligassarpassuatsinnut aggersunut piareersimaqatigiillutalu ingerlarsoqatigiinniassagatta. Kissaaterput unaavoq, danskit illersornissaqarfiata Issittumi sakkutooqarfik aqqutigalugu sapinngisartik tamaat Naalagaaffeqatigiittut Kalaallit-Nunaanni oqartussaanerput illersussaagaat. Taamaalilluta tapertaaffigisinnaalissavarput – nunamiititsisutullu – nunarsuarmi sakkussaliornikkut atortulersuuserineq atsinnerpaaffianiitissinnaalissagaluarparput. Akuersaarparput, Issittumi sakkutooqarneq USA´p Qallunaat-nunaata Kalaallillu-nunaata ataatsimoorullugu suleqatigiiffigalugu inaarsaavigisartussaagaat. Kissaatigaarput, Naalagaaffeqatigiit atominik sakkussianik inissiisarnertigut politikkertik allangortinnagu aamma sorsuffiunnginnermi atuutsiinnartassagaat kiisalu amerikamiut nutaanik Kalaallit-Nunaanni pilersitsissagaluarunik illersuinissamut atugassatut takorluugaajumaartut.Amerikamiut sakkutooqarfeqarnikkut nutaanik Kalaallit-Nunaanni pilersitsilissagaluarpata Kalaallit-Nunaanni illersuinikkut isumaqatigiissutip iluani killiliussat malillugit isumaqatigiinniartoqarumaartoq. Isumannaassavarput, Kalaallit-Nunaanni nutaanik pilersitsisoqalissagaluarpat sananeqartassasut sakkutuunit sakkutuujunngikkaluanillu atugaasinnaanngorlugit.Taamaalilluni Kalaallit-Nunaanni  atortulersuutitigut pitsanngorsaanikkut iluaqusersuutaassagaluarpoq. Nutaatut pilersitsiniartoqarsimappat soorunami taakku kiffartuussinikkut isumaqatigiissusiaareersut, Qallunaat-nunnaata, Kalaallit-nunaata, USA´llu akornini, atuutsinneqassapput, tassunga aamma ilaavoq Thule Air Base. Nutaanik ikkussuisoqassappat isumaqatigiissusiortoqassaaq, qanoq ingerlanneqassanersoq atorneqareerunilu qanoq peerneqassanersoq.Saniatigut Naalagaaffiup isertortumik paasiniaasuinik suleqateqarnerput annertusartariaqarparput kiisalu Kalaallit-Nunaata qarasaasiatigut illersorneqarnissaa isumannaarniassallutigu.
  10. Pinngortitami pisuussuterpassuagut imminut akilersinnaasumik ingerlassissaagut, kinguaariit tullii aggersut eqqarsaatigalugit. Tassunga ilaavoq pisassiissutaasartunik annertussusiliisarnissami isumasioqatigiittarnissaq, inuussutissarsiutitigut ingerlassallit assigiinngitsut, Namminersorlutik Oqartussat, immikkullu ilisimatusaatillit, imminut akilersinnaasumik ingerlatsinissamik siunnersuisinnaasut. Sinerissap qanittuani aalisarneq piffinni aqunneqarsinnaavoq, taamaallaat ilisimatuut innersuussutaat malillugit maleruaqqussutinik toqqammaveqaannarlutik.
  11. Kalaallit inuiaqatigiit tassaapput inuit, Kalaallit-Nunaanni sulillutillu najugaqartuusut, naggueqarfik, sumiuuneq, upperisaq, oqaatsit suminngaanniivinnerlu apeqqutaatinnagit. Nunap inatsisaanik maleruaasoq inuiaqatigiinnilu napatitseqataasinnaasoq kinaluunniit tikilluaqqusaavoq. Inuiaqatigeeqarneq ammasoq akuersaartorlu kissaatigaarput, oqaatsitsinnik ileqquutitsinnillu ataqqinnilluta, innuttanngortunut nutaanut tikilluaqqusisut ilisimmaarillutigu kisimiilluta nunatsinnik tamakkiisumik ineriartortitsisinnaanissatsinnut amigarluta. Qanorluunniit siviitsigisumik sivisutigisumilluunniit Kalaallit-Nunaanniikkusuttut tikilluaqquagut.