Sooruna suli suliartortunik tikisitsisarnissaq pisariaqartinneqarpoq, suliartortartut amerlanerit Qallunaat Nunaanneersuupput, Filippineriniik , Thailandimiik nunanilu avannarlerniik.
Suli akuulersitsisarnissarput pisariaqarpoq, nukitsialassuit pisariallit nunatsinniiginnassappat – ajornanngippat nunassitsikkusukkalaurpagut.
Pisariaqartitatsinnik piginnaasaqarlutillu, siunissami utoqqaat amerliartuinnartussaammata, akileraartartullu ikiliartuinnartussaallutik, kiisalu nutaanik ilinniagalinnik sulisortaaqattaartarnerit akisummata.
Akuliutsitsiniarnissatigut makku aallunneqassapput:
1. Kalaallit qallunaallu oqaasii ilinniarlugit – akeqanngitsumik. Digitalikkoornerusoq ingerlallugit. Pissutsit piviusut aallaavigissagutsigit piviusunngortitsisinnaassaagut qallunaatuumiik kalaallisuumut tuluttuumiik kalaallisuumut tuluttuumiik qallunaatuumut. Aamma ajunngilaq, allaavissatut ajunngeqaaq.
- Tikilluaqqusineq, malitseqartitsineq, piffinni suliniuteqaatit qulakkeerlugit kiisalu oqartussanut ajornaatsumik saaffiginninnissaannut periarfissillugit, nunatsinniissinnaatitaanermut tunngasutigut aporfeqalissagaluarunik, akileraarutitigut-isumaqatigiissutitigut il.il. Ataatsimut isigalugit ullumikkut aporfippassuaqanngilaq, Asia´miut sulinissaminnut akuersissutitigut aporfeqalaartaraluartut, iluarsilaagassartaqarpasikkami. Isumaqarpugut kommunit tamatuminnga qulakkeerinnikkumaartut.
Nuuttunut malitseqartitsinikkut, imaaratarsinnaavoq suliffeqarfinni, sulisut peqatigiiffiinik isumaqatiginninniartoqarsinnaasoq allanilluunniimmi, noorlaat illoqarfimmi pisunut ilakattarisarsinaagaat, qaammatisiut nunamillu naatsumik ilisarititsineq. Politikkikkut aamma aaqqiisoqarsinnaavoq, tikilluaqqusummik ataatsimoortumik tunissuteqarnermik, noorlaanut tamanut paasissutissiissutitalikkanik.
3.Qularnaassagippullu, ilinniartuutigut nunaqqatigullu avataaneersutut ilannguttannginnissaat. Akileraartarnikkut qulakkeerinnissaagut, periuseqassalluta eqaatsumik paasinarsakkamillu. Tamakkunnnga aamma ilaatillugit, utoqqalinissamut ileqqaarinnissinnaanissamut periarfissat, maanga suliartorusuttunik pisariaqartitatsinnik aporfilersuutaasinnaajunnaarlugit aaqqissuussanik.
- Nunat akornanni killilersuutaasinnaasut ikilisarnissaannut suleqataassaagut, nunat avannarliit akornanni, inatsisiliornikkullu suleqataaffigalugu. Soorunami Naalagaaffeqatigiit nunallu avannarliit avataanneersut sukannernerusunik atugassaqartinneqassapput, suleqatitsinnulli qaninnernut inatsisit sakkukinnerusariaqarput – ilaatigummi nunaqqativut taakkunani nunaniimmata, ilaatigullu suliartorlutik nuuttut atorfissaqartittuaannartussaagatsigit.
Suliartortinneqartut sulerigajuppat?
Inatsisilerineq – eqqartuussissuserisut, inatsisilerituut inatsiseqarnermilu suliassat allat. Nakorsat – tamatta peqqinnissatsinnik qularnaareqataasut. Suliniutit nunatsinneersunik sulisussaqarfiunngitsut allaniluunniit suliniutini sulineri pissutaallutik – tassa soorlu inissiat assigisaallu, pisariaqartinneqartut.
Tikisitsineq sutigut pisariaqanngila?
Siullertut Suleqatigiissitsisuni isumaqarpugut namminersorlutik inuussutissarsiortut namminneq aalajangiisassasut kikkunnik sulilersitserusunnerlutik, kisianni soorunami nunatsinneersunik pikkorissunik sulerusuttunillu sulisussaqarpat taakku soorunami sulisorineqassapput.
Uagutsinnut pingaaruteqarpoq siunissami uagut nammineq aqutsisuulernissarput, kisianni aamma erseqqissartariaqarparput eqqarsartarnitta unammillersinnaassuseqarnermillu eqqarsarsinnaanitta allanngortinneqarnissaa pisariaqarmat. Qanorluunniit inuiaqatigiit tamattaalluta taamaaliortariaqarpugut, kulturerput tunaartaralugu – anguniassavarpullu nunarsuarmi ilisimasanik peqartut sulisartullu pikkorinnerpaat ilagilissagaatigut.
Soorunami ilinniarnikkut tamanna anguneqarsinnaavoq.
Taamaattumik piumasaqaatit appartissanngilavut – qaffallugilli, ilinniarfinni.