Pingaarnertut inuutissarsiut nunami maani inuutissarsiutini pingaarnersaq tassaavoq aalisarneq aamma pingaarnersaasussaavoq suli ukiorpassuarni piujuaannartitsineq tunngavigalugu ingerlatsigutta aamma ersarissunik malitassaqarluta. Aalisarnerup iluani ataqatigiissumik politikkeqarnissaq pisariaqarpoq kikkut tamarmik isumaqatigiissutigisinnaasaannik. Tamanna pisinnaavoq ersarissunik paasiuminartunillu malittarisassaqartitsinikkut; soorlu pisassiissutinik agguaasarnermi najoqqutassanik ersarissaanikkut. Ersarissumik takuneqarsinnaasariaqarpoq kikkut pisassiissutinik tunineqarsinnaanersut aamma sooq?
Pisariaqarporli ataqatigiissumik politikkimik eqqarsarnissaq, immikkoortut allat kalluanngitsoorneqarsinnaanngimmata soorlu inuutissarsiornermut politikkip eqqartornerani. Sutigut tamatigut pereersut eqqarsaatigisariaqarput. Assersuutigalugu inuutissarsiummik ingerlatsisoqarsinnaanngilaq sulisussaqanngikkaanni, ilinniarnissaq pisariaqarpoq aamma inunnik isumaginninneq inuutissarsiortunit tapersersorneqarlunilu ikorfartorneqartariaqarpoq. Sutigut tamatigut pereersut eqqarsaatigineqartariaqarput.
Kalaallit Nunaanni inuutissarsiutinut aningaasaliisarnissaq pilerinarsartariaqarparput. Tassa imaappoq akuerisariaqarparput uanguinnaanngitsoq aammali allat isertitaqartarnissaat. Aamma isumaqarpoq piffissap ungasinnerusoq eqqarsaatigalugu isumaqatigiissusiortoqartariaqarpoq atasinnaasunik avataani najugallit aningaasaliisartut qularnaartariaqarmassuk aningaasaliissutitik iluanaarutigisinnaallugit.
Suliffiliorneq suliaavoq angisoorsuaq. Isertitaqarumaarluni nalullugu aallartitsisoqartarpoq. Sinaakkutit naatsorsuutigisinnaanngikkaanni taava aningaasaliisussat tunuarsimaalersarput. Taamaattumik politikkikkut patajaatsumik ingerlatsinissaq pisariaqarpoq inuutissarsiorneq ingerlalluassappat. Taamaattuminguna piffissap ungasinnerusoq isigalugu sapinngisamik amerlanerpat peqataaffigisaannik isumaqatigiissuteqartarnissaq pisariaqartoq. Sapinngisamilli amerlanerpaat peqataaffigisaannik isumaqatigiissuteqartarneq kalaallit politikeriisa akornanni ileqquunngilaq, tamannalu allanngortittariaqarparput.
Inuutissarsiorneq pilersinneqarsinnaanngilaq ilinniarsimasunik sulisussaqanngikkaanni. Ullumikkut sumiiffiit ilaanni sulisussaaleqisoqarpoq allanilu suliffissaaleqisoqarluni. 2018-mi Nuummi matchgruppe 1-mi allassimapput suliffissaaleqisut 18-t. Tassa imaappoq aqagu suliartorsinnaasut. Assigiinnarpaa oqarluni sulisussaqanngitsugut. Peqataanilli sumiiffinni allani suliffissaaleqisoqarpoq. Tassa imaappoq siuariartorsinnaanngilagut allaminngaanniit sulisussarsisisinnaanissaq ammaffiginngikkutsigu. Matchgruppe 1-mi aamma matchgruppe 2-mi inuppassuit suliffissaaleqisut atorluanngilagut. Inuutissarsiortut kusanartunik sinaakkuteqartissagutsigit inuit aningaasaliiffigisariaqarpagut ingerlaannagajallu sulilersinnaasut matchgruppe 2-miittut matchgruppe 1-nut tassa ingerlaannaq sulilersinnaasunut nuutillugit.
Aalisakkerivinnik inuutissarsiuteqarneq aamma niuernermik-aatsitassarsiornermik-Takornariartitsinermik
Inuutissarsiornermi sukat angisuut sisamaapput taakkunanngalu marlu aningaasarsiornitsinnut tunngaviulluinnarput. Aalisarnermi patajaassuseq pisariaqartinneqarpoq ukiumiit ukiumut aamma ukiup ingerlanerani. Pisassiissutit amerlavallaat ulaperujussuartitsilersarput aamma pilersaarusioruminaattarput angallammut tunisassiorfimmullu annertuumik aningaasaliisimangaanni. Ukiut ingerlanerani nikerartitsinisaq ajornartorsiutaasarpoq aalisakkat pisassiissutigineqarneq ajortut aalisaraanni. Pisassiissutit nungunnissaasa tungaanut aalisaraanni pisariaqarpoq sapinngisamik sukkanerpaamik annerpaamik pisaqarniarnissaq, taamaattoqartillugu tunisassiorfiit malinnaasinnaaneq ajorput aamma piffissap ilaani suamik tunisisoqartarpoq immalu pisaqartoqarneq ajorluni. Taamaattumik pisasseeriaaneq allanngortittariaqarpoq piginneqatigiilluni pisassiissutinik peqartarnikkut imaluunniit najukkanut pisassiisalernikkut.
Nunami inuutissarsiutit patajaassuseq aamma pisariaqartippaat aamma pisortanut unammillernerminni kiffaanngissuseqarnissaq. Sanaartugassat ilarujussui pisortanit suliakkiissutigineqartarput. Tassani pisariaqarpoq nalimmassaanissaq taamaasillutik sanasut malinnaasinnaalersillugit. Mittarfiliorneq assersuutissatsialaavoq. Pisariaqanngilaq suut tamarmik sukkanerpaamik suliarineqarnissaat tamatuma kingunerisarpaa suliffeqarfiit nunat allamiut piisa kisimik neqeroorsinnaasarnerat. Qanga nunami maani inissiarpassuarnik sanasoqartarallarmat pissutsinit allaanerunngilaq periuseq maannakkut ingerlanneqartoq, paarlattuanik nunaqavissunik ilinniartitsisoqartarsinnaagaluarpoq kingorna suut tamaasa uangut nammineq suliarisinnaalerlugit.
Takornariaqarneq
Takornariaqarneq ataasiinnartut saqqummiunneqartarpoq suliffippassuit pilersitsisussatut aamma Kalaallit Nunaannut iluanaarutissatut. Ilumoortortaqassajunnarsivoq Kalaallit Nunaannimi takornariaqarneq periarfissalerujussuuvoq. Assersuutigalugu kujataani takornariartitsisarneq periarfissalerujussuuvoq, takornariat angallanneqarsinnaasuuppata. Pissutsit arlaqarput Kujataani aqqusinniornissaq siunniukkatsigu Qaqortumi mittarfiornissamut taarsiullugu, tassanimi Qaqortoq kisiivimmi iluaquserneqartussaavoq kisianni taamaallaat billittit akii qaffarujussuassanngippata. Kisianni takornariartitsinermi aamma siumut iseqartariaqarpoq taamatullu tuluttut oqalussinnaasunik ilinniarsimasunik sulisoqartariaqarpoq iluaqutissarsisoqassappat.
Aatsitassarsiorneq
Aatsitassarsiornissamut Kalaallit Nunaanni periarfissalissuuvoq. Isertitat sulisussallu eqqarsaatigalugit kisianni aamma ilinniarnissamut periarfissat eqqarsaatigalugit. Aatsitassarsiorfiit tamarmik allanik inuutissarsiutinik pisariaqartitsisarput sanaartortoqartarpoq, assartuisoqartarpoq, nerisassiortoqartarpoq, eqqiaasoqartarpoq aamma sivisuumik ilinniarsimasunik pisariaqartitsisoqartarpoq soorlu bygningsingeniørinik, nunarsuarmioqatiginik niueqateqartoqartarpoq aamma inatsisilerituut pisariaqartinneqartarput. Periarfissanik ulikkaarpoq kalaallinut inuusuttunut aamma ilinniarnermut atatillugu sungiusaatigalugu suliffissaqassapput iluamik aaqqissuussigaanni.