Ilungersuutiginiarparput Kalaallit Nunaata nunanut avannarlernut suleqatigiinnermut akuunerulernissaa, suleqateqalernissaalu napparsimavinnik amerlanerusunik, amerlanerusunik nakorsaqalerniassagatta, psykiatereqalerniassagatta, immikkut ilinniarsimasunik nakorsaqarnerulerniassagatta, immikkut ilinniarsimasunik peqqissaasoqalerniassagatta Kalaallit Nunaanni napparsimavinnut assigiinngitsunut suliartoqattaartarsinnaasunik.
Ilinniarluarsimasunik amingaatilerujussuuvugut aamma amingaateqarnerput milliartunngilaq. Misissugassaasinnaasut misissortariqarpagut aamma aalajangersimasunik sulisoqalernissarput Kalaalit Nunaaniiginnartussanik. Minnerpaamik qularnaartariaqarparput qaammammi ataatsimi qaammatiniluunniit pingasuni sulisoqartarneq qimallugu sivisunerusumik sulisoqartalernissaa, peqqinnissaqarfiup sulisussarsiortarnermini aningaasartuutai apparsarumallugit.
Psykiatri, paarnaarussivinni, mattussivinni, peqqinnissaqarfimmi, inunnik isumaginninnermi pisariaqarpoq taakku ilungersunartorsiorfiunerpaammata. Tassunga atatillugu sulissaagut pikkorilluta aamma nunatsinni kattuffiit suleqatigalugit, Kalaallit Nunaannut psykiaterinik pissarsinissaq anguniarlugu. Ajunnginnerpaassagaluarpoq kalaallinik pissarsisinnaasuugutta, allamiulli qujaruttariaqarpagut ilinniartillugillu kulturitta assigiinnginnerannut.
Suliarput aallartittariaqarparput aamma suleriaatsigut allanngortittariaqarpagut inuit aamma uangut politikeritut akisussaaqataaffigut ikiorluarsinnaajumallugit. Taamaattumik periarfissanik misissuerusuppugut nassaagullu piviusunngortillugit.
Tigussaasoq aallartiffissarput:
Nunatsinni kattuffiit partiillu suleqatigalugit aaqqiissutissanik nassaartussaagut peqqinnissaqarfinni aamma psykiatrimi atorfiit ukioq kaajallallugu inuttaqartittarnissaat qularnaarniarlugu. Suliartortunut kulturi pillugu paasititsiniaanissaq qularnaarneqarsimassaaq. Peqqinnissaqarfimmi oqalutsit amerlanerit ilinniartitaanissaat qularnaarneqassaaq.