Suleqatigiissitsisuni pimoorullugu anguniagaraarput Kalaallit Nunaanniit Folketingimi ilaasortaatigut Kalaallit Nunaannut ambassadøriunertik paasilluartariaqaleraat. Uangutsinnut pingaaruteqarpoq uangutsinnut iluaqutaasinnaasunut ataatsimiititalianut ilaasortaasarnissarput peqataanillu Naalagaaffeqatigiinnermut ineriartortitseqataassasugut avissaarniarsarinata. Isumaqarpugut Kalaallit Nunaat Folketingip Nunanut Allanut Kilitsissiaqarnermullu Ataatsimiititaliaani ataavartumik ilaasortaasariaqartoq aamma Grønlandsudvalgi isumasiorneqartassaaq, allanilu ataatsimiititaliani aalajangeeqataasinnaanata peqataasassaagut, suliani Kalaallit Nunaat pineqartillugu. Soorunami ilaasortanut marluinnarnut suliassarpassuupput, kisianni pisariaqarpoq ilaasortat marluusut paasissammassuk nunanut allanut sillimanissamullu politikki malinnaaffigeqqissaartariaqartoq.
Tigussaasumik iliuusissat:
Folketingimut qinersineq qaangiupat Folketingi isumaqatiginiarneqassaaq ataatsimiititaliami pisatsinni inissaq ataaseq marlulluunniit pineqarsinnaanissaat pillugu. Aallarniutigineqarsinnaavoq kalaallit qinikkat taasisinnaatitaanatik ataatsimiititaliami peqataasarsinnaanissaat, tamanna aaqqissuussineq ukiut tamaasa ukiorluunniit allortarlugu nalilersorneqartassaaq.
Paasititsiniaasarnissaq ineriartortinneqassaaq Kalaallit Nunaanni politikerinut tamanut pisariaqartitsisunut, ineriartortitarput piareerpat.
Nunanut allanut politikki
Qularutigineqassanngilaq Kalaallit Nunatta nuarsuarmi inissisimanera pissutaalluni ukiuni makkunani soqutiginninneq alliartormat aamma isumaqarpugut Folketingimut isertitsisariaqartugut suleqatigiinnissamut pingaartitsisunik, namminersulivikkusuttuniunngitsoq aamma partiineersuunngitsunik Kalaallit Nunaanni ilisimasanik nunasinni avitseqateqarusunngitsunik. Qulani ataatsimiititaliat taariikkagut ilaasortaaffigissallugit pissusissamisoorpoq aammali ataatsimiititaliani pineqartuni marlunni isertuussassat oqaluuserineqartarput, taamaakkaluartoq Folketingimi ilaasortat suliassaasa ataqqinarnerpaat ilagissavaat qularnaassallugu Kalaallit Nunaata Danmarkimit puigorneqannginnissaa taamatullu Inatsisartut Naalakkersuisullu tamakkiisumik ilisimatinneqartarnissaat suliat uangut isummaatsuunissatsinnut ulorianartorsiortitsisinnaasut pillugit, pineqaraluarpta IT aamma qarasaasiakkut isumannaatsuunissaq imaluunniit killeqarfitta ulorianartorsiortinneqarsinnaanera.
Tamatumani pisariaqarpoq tamatta inerisimasuunissarput kissaateqarnissarpullu oqaloqatigiittarnissamut aamma suleqatigiinnissamut aamma aallarniutigalugu sulissutigisariaqarparput Kalaallit Nunaata pitsaasumik sunniisinnaanissaa, suleqatiginnikkusussuseqarnissaq aamma silatuumik tunngaveqarluni oqaloqataanissaq, nunanut allanut tunngasut, isumannaatsuunissarlu pineqartillugit.
Tigussaasumik iliuusissat:
Folketingimut qinersineq qaangiupat Folketingi isumaqatiginiarneqassaaq ataatsimiititaliami pisatsinni inissaq ataaseq marlulluunniit pineqarsinnaanissaat pillugu. Aallarniutigineqarsinnaavoq kalaallit qinikkat taasisinnaatitaanatik oqaaseqarsinnaatitaallutilli ataatsimiititaliami peqataasarsinnaanissaat, tamanna aaqqissuussineq ukiut tamaasa ukiorluunniit allortarlugu nalilersorneqartassaaq.
Paasititsiniaasarnissaq ineriartortinneqassaaq Kalaallit Nunaanni politikerinut tamanut pisariaqartitsisunut, ineriartortitarput piareerpat.
Qularnaarneqassaaq Issittup iligut peqatigalugit sakkulersorfinngortinneqannginnissaa.