Naapeqatigiiffiit, isumaqatigiinniarnerit allanngueqatiiinnerlu siaruaqqinnissamut aqqutissatuaraavut. Nunarsuarput allanngoriartortuarpoq, tamanna kissaatiginngikkaluarutsiguluunniit. Brexit, Corona, avannaani tsunami nunarsuatsinnilu qimaasut amerliartuinnavissut takutereerpaat nunarsuarmi pisut uagut sunnersinnaagaatigut – uagullu soorunalimi nunarsuarput sunneeqataaffigisussaavarput.
Taamak iliussagutta piumasaqaataavoq immitsinnut mattutiinnassanngitsugut, nunarsuatsinnulli ammanerulissasugut.
Namminiilivinnissamut suli ajoraluartumik inerisimalinngilagut, aningaasaqarnerup tungaatigut allatigullu. Kinguaariit nikeriartarneri arlallit tamanna piviusunngortinniassagaanni suliassaavoq, ilumut taamak pisoqarnissaanut suliniuteqarnissaq sukkanerusoq tullualissappat.
Taamaattumik siunissamut qimerloorluartariaqarpugut, pisimasullu uniffigiinnartaarunnaarlutigit. Naligiisitaaneq pitsaanerusoq siunissami ippoq, Naalagaaffeqatigiinnermi tatigeqatigiinneq sanarfeqqitassaavoq tamatsinnut nukittunerulersitsisumik qanimullu suleqatigiiffiunerusunik ujartuinitsigut piviusunngortitsinitsigullu sanarfiumaagassarput, Naalagaaffeqatigiinnerullu iluani akisussaaffitta paasisimalluarnerulernerisigut suleriutsigut pitsaaneruleraluttuinnassapput.
Nunatta aningaasaqarnera aningaasaqarnittalu ataqatigiissinnaassusaa sanarfineqarsimavoq partiinit namminiilivikkusuttunit amerlasuunit. Tamatuma kissaatigineqarnera paasiuminartuuvoq, taamatulli kissaateqarneq piviusorsiortuunani. Isummagut aallaavigalugit sanngiinnersavut amaqqunut paggatassiissutigissavagut, nunatsinniik nuuttartut amerleriaqqissuagut, atungarissaareertut arlaqanngittuinnaat atungassarititaat kisiisa pitsanngorsaannassavagut, nunarpullu kisimiitsilerlugu nunanit allanit pissaanilissuarnit sunniiffigisinnaanngisatsinnit anneruniunneqarfigineqarnissaanut – piitsuussuserluunniit atungarliornerujussuarlu innuttaasunut naliginnaasunut qulakkiissallutigu namminiilivinnissaq kisiat toqqammavigalugu suliagut tamaasa ingerlanniinnarutsigit. Inoqatitsinnut pisortanit ikiorserneqartariaqartunut tapiissutissalluunniit ukiuni 18-ini kingullerni aaqqiivigisimanngilagut! Taamak iliuinnarsinnaanngilagut.
Tamatuma saniatigut ikiorserneqarnissaq ajornarluinnarpoq suliffeerukkaanni, suliat inunnit isumaginnittunit suliarineqarnerat sivisuallaarujussuartoq misigisanit tarnikkut ikilerneqaataaffiusimasunut ajornerulersitsiinnartoq allaallu katsorsarneqarsinnaajunnaartitsisartoq, inuuneq naggatissaa tikillugu pisortanit pisartagaqarnerinnarmik inuussutaajualerluni. Innuttaasut imminnut tatigisinnaassusaannut appartitsigaluttuinnartoq, maanna taama uffa pisariaqarluinnartigisoq ataatsimoorluta pitsaanerusumik sanarfeqatigiinnissatsinnut!
Imminut pilersorsinnaanerulerneq soorunami aguniagaassaaq, nunarsuarli tamakkerlugu misissuinerit ilisimatussutsillu takutereerpaat angerlarsimaffiup annaanissaanut ernummateqanngikkaanni, kaalluni innartanngikkaanni, aammalu toqqissisimanarigaanni tapiissutit naammassaqqaartut aammalu inunnik isumaginninneq pitsaappat, ila tamakkua sinaakkutit piuppata inuiaqatigiinnut sumiittunulluunniit aningaasaliiffigisimaneri imminnut akilersinnaakutsoortarput. Maani aamma taamak ippoq. Ajornartorsiutivut allanut pisuutitsiniutigissanngilagut, ingammik ullumikkut nammineq iliuuseqarfigisinnaalluarutsigit. Siunniunniartiguli ikiuutaalluarsinnaasut tamatsinnut peqatiserinerulernissaat inuiaqatigiinnut akuusunut tamanut. Kikkut tamaasa peqataatissavagut. Kikkunnut TAMANUT inissaqartitsisariaqarpugut ineriartorneq piviusunngortissagutsigu. Kalaallisut, qallunaatut, thai, filippino, norgemiusut, svenskisut, tuluttut, nunaqarfinneersut illoqarfinneersullu, avannaamiut kujataamiullu tamatta pisariaqartinneqarpugut.
Tamatta maani najugaqarsinnaatitaassaagut, nukittuutut misigisinnaalluta kiffaanngissuseqartutullu, nunatsinnut asaqaisatsinnut angerlarsimaffeqartutut misigisinnaalluta, ataatsimoorluta siunissaq pitsaanerusoq kivitseqatigiilluta anguniarsaralutigu.
Namminiilivinnissaq unitsikkallarneqarpoq maani peqqutit pitsaasut pillugit. Sillimaniarnerput, imartatta nakkutigineqarnerat, immami, nunami silaannarmilu sillimaniarneq Qallunaat Nunaannit qulakkeerneqaqqapput. Tamanna pillugu qujanaq. Inuiattut tamatta peqqinnissarput politikerillu kissaatit piviusunngortikkusutaat tamangajalluinnarmik bloktilskud-imit pisartakkatsinnit aningaasalersuiffigineqartarput. Aamma tassunga bloktilskud-imut qujanaq. Uummammik pisumik qujaniuteqarpugut, Naalagaaffeqatigiinnermi innuttaasunik tamanik ataatsimoortitsineq pimoorulluinnartuuvarput, maanngalu suliartorlutik nunasinikunut. Qujaniarneq sanngiissusaanngilaq, ukittoqqutaasorliuna. Qujaniarneq pisartagaqarnitsinniik aniniarneruvoq pitsaalluinnartuusoq, tamannalu aqqut tamaut peqqinnarnerusoq pilersinniartariaqarparput.
Soorunalimi namminiilivikkusunneq oqaluuserisinnaasariaqarparput, aammali oqaluttuarisaanerput ataatsimoorluta oqaluuserisinnaasariaqarparput – Kalaallit Nunaat, Qallunaat Nunaat, Savalimmiullu, aammalu Kalaallit Nunaat nunarsuarmioqataanerlu, oqalliffinni toqqammavilersuutinik eqqortunik sorlaqarfilinni. Taamaattumik kissaatigaarput Naalagaaffeqatigiinnerup oqaluttuarisaanerata tamakkiisup atuakkiarineqartalernissaa, Naalagaaffeqatigiinni tamanut ittunut allaganngorlugu ileqqutoqqagut malillugit oqaluttuartaatsitoqqamit aallaaveqartumit, aammali misissuisarnerit inernerisa takutissimasaannik aallaavilimmik, siuaasattalu oqaluttuaannik imalimmik. Ataatsimoorluta oqalliffeqarfigisinnaasatsinnik taamak pilersitsisinnaavugut. Qanoq ikkaluarpalluunniit inuuneq ingerlateqqittariaqarparput. Kalaallimmi Nunaat kingornussisussanut pitsaanerusoq pilerittariaqalerparput, Nuna pisuujunerusoq, toqqissisimanarnerusoq nukittunerusorlu. Suleqatigiikkuttalu suliassagut suliarilluarsinnaaniassuagut. Ulapputissaqaqaagummi!