Partiitut aallartikkattali pingaarnerpaatut tamanna sulissutiginikuuarput; tassa Naalagaaffeqatigiinnit ikiorneqarnissaq nassuerutigalugu ataatsimoorluta inuit ulorianartorsiortut sanngiitsullu ikiortariaqarigut, salliutillugit meeqqat inuusuttullu erloqisut.
Isiginnaaginnarsinnaajunnaarparput meeqqat inuusuttullu amerligaluttuinnartut kinguaassiutitigut atornerlunneqartarnerat, meeqqat inuusuttullu sumiginnarneqartarnerat, meeqqat inuusuttullu kaattut aamma meeqqat inuusuttullu soqutigineqanngitsut nikeriarneq ajornerat. Pissutsit taamaaginnarnerat akuerusunngilarput, nipangersarneqassanngilagut.
Iliuuseqartariaqarpugut massakkorluinnaq.
Eqqarsaatigilluangaanngitsut aaqqiissutissat atorsinnaanngillat aamma takorluuinerit. Iliuusissat ataavartumik ingerlanneqartariaqarput, ukiorpassuarni aamma uteriilluta ingerlattariaqarpagut.
Folketingimi ilaasortaanitsinni qinikkatut piviusorsiorluta isumaqatigiinniartassaagut, pissaanermik tigummiaqartut ilungersorlutik Kalaallit Nunaanni meeqqanut inuusuttunullu sullisseqataasarnissaat anguniassavarput aamma isumassarsiorfigisassavarput sutigut suleqatigiissinnaanerput, aningaasaqarnerup saniatigut, Folketingimi ilaasortaaneq aqqutigalugu annerpaamik meeqqat inuusuttullu taamatullu Kalaallit Nunaanni Danmarkimilu innuttaasut pitsaanerpaamik ikiorneqaqqullugit.
Suleqatigiissitsisuni anguniakkatta sallersaraat meeqqat inuusuttullu erloqisut ikiorneqarnissaat.
Tigusaassunik sinnersuuteqartuarpugut suleqatigiiffigisinnaasagut pillugit aamma qanoq ilorsinnaanersugut kulturerput, oqaatsigut, kinaassuserput aamma innuttaasunik isumassuinissarput akiginagit. Ikiuilertariaqarpugut. Ataatsimoorluta nukittunerusarpugut.
Tigussaasut aallartiffissagut:
Isumagineqarli angalasartoqatigiit najukkami inunnik isumaginninnermut siunnersortinut ikiuukkiartortinnissaat suliassat ikilisarniarlugit, suliassat immikkoortiterneqarlik, meeqqanut tunngasut salerpaanngortillugit paasiniarlugulu Naalagaaffeqatigiit suleqatigalugit sorliit qularnaarneqarnissaanersut siulliullugit.
Kommunit Namminersorlutik Oqartussallu nunami sumiluunniit pisortat illutaannik ornittaganngortinneqarsinnaasunik ammaasariaqarput aamma meeqqat inuusuttullu angerlarsimaffimminni tujormisitaasut sumiiffissaattut.
Danmarki qinnuigineqarli sulisussatigut ikiuuteqqqullugu, aamma nunaqavissut sullissisussat ikortartorneqarlik, supervisioni neqeroorutigisarlugu, terapi aamma sullissinermi ikiorneqarnissaq taamatullu eqqortumik inissiinissaq pillugu akuersissuteqartarnissaq eqqarsaatigalugu.
Danmarki qinnuigineqarli politiit suliassaasa annertusarnissaat pillugu, nunatsinni politiit suleqatigalugit sualummik nunaqarfinni illoqarfinnilu minnerni, taakkunani inatsit nutaaq naapertorlugu inuit nalunaaruteqarsimasut siorasaarneqartarnerat isiginngitsuusaarneqassaaqqullugu aamma misissuisarnerit ataqqinarsaaqqittarnerillu imaluunniit katsorsaanerit taamatut pinerlussimasunut atuutileqqullugit.
Qularnaarneqarli kinguaassiutitigut atornerluisimasut kanngutsaattuliorsimasulluunniit paarnaarussivinni mattussivinnilu ataqqinarsaqqinneqartarnissaat aamma qularnaarlugu pinerluffigisimasaminniit qimagutsinneqartarnissaat taamatullu katsorsarneqarallartillutik aneqqusaasannginnissaat. Kinguaassiutitigut kanngutsaattuliorsimasut nunatsinni inissaqanngitsut kanngutsaattuliorfigisimasartik illoqarfik qimallugu allamut aallarunneqartassapput, pisariaqarpat Danmarkimulluunniit.
Psykiatarit kriminalforsorgimi atorfinitsinneqarsinnaanerat suleqatigiissutigineqassaaq aamma Danmarkimi nunanilu avannarlerni kanngutsaattuliorsimasut immikkut ilisimasalinnik ikiorneqarsinnaanissaat aqqutissiuunneqassaaq taamatullu persuttaasartut siorasaarisartullu soorlu Alternativ til Vold atorlugu katsorsarneqarsinnaapput, aamma qularnaarneqarli ilisimatusartoqartarnissaa malitseqartitsillunilu ilisimatusartoqartarnissaa, neqeroorutigut naleqqussartuartarumallugit piffissaq ungasinnerusoq isigalugu pitsaanerpaamik ikiuinissaq anguniarlugu.