Aningaasaqarnerput suliassaniik annertoorujussuarniik assut naqisimaneqalersimavoq, allaffissorpallaalersimanermut aningaasartuutit tassunga qaffakkaluttuinnarput, aammalu amingaatigilluinnarsimavagut nutaanik siunnerfeqalerfiit nutaaliornerillu. Naak allaffissorneq alliartupilooraluartoq innuttaasunut qanimut sullissineq amingaatigineqaleraluttuinnarpoq.
Akileraartarnikkut akiitsuusiinikullu naqisimanninnerit piviusunngortinniartuarneqarnerisa angumanngilaalluunniit ikiortarialinnut suliniuteqarusussuseq, immitsinnullu aaginnassaagut pinaveersaartitsinerit pitsaasut pilersinngikkutsigit ilinniartitaanerlu toqqammavissaalluartoq patajaatsorlu pilersinngikkutsigu, taakku sukarsuarisigit ukiunut 30-nut tullinnguuttunut aningaasartuutitta appasinnerulertinnissaannut.
Innuttaasut misigisarput isiginnartuinnanngorsimallutik inuiaqatigiinni ajornartorsiutinut qaffakkaluttuinnartunut. Meeqqat inuusuttuaqqallu ikiorserneqarluarsinnaanngisaannagajapput, pitsaasumilluunniit ilinniakkamik amingaateqartarlutik, eqqissiveqaratik toqqissisimanatillu inuullutik. Kikkut tamarmik ullut tamaasa qaarsillanngitsoortarput, kikkullu tamarmik inersimasut akornanniikkaluarlutik toqqissisimasutut misigineq ajorput.
Ukiuni makkunani takusinnaasagut tassaapput ukiorpassuarni innuttaasunut ikiorsiinissaraluit iliuuseqarfigineqarneq ajorsimasut kinguneri, inunnillu isumaginninnermut salliussivallaannginnerujussuup piliai, ajornarnerpaamillu aamma ilinniartitaanikkut siuarsaanngittoorsimanerup kingunerisai. Periusissalli nutaat nassaarinissaannut isumassarsiassat ila amerlisinnaasaqaat akileraarutissat akiitsuutissallu nutaat eqqunniarnerinnut suliniartoqaleraagat. Soorunalimi akiitsuusiisarnerit akileraarutinillu qaffaassuinerit unitsivissortariaqarpavut, inuiaqatigiinnullu aningaasaliilluartarnerit pimoorunnerulerlugit – unneqqarissumillu isumaqatigiilluta – qanoq tamatta inuiaqatigiinni kivitseqatigiinnikkut ikiugassavut tamaasa ikiorserluarsinnaanerlutigit. Kivitsisariaqalerpugummi, suliat immikkoortut pitsanngorsagassat ataasiakkaarlugit. Iliniartitaaneq siullertut qaffarsartariaqalerparput, najukkanik amigaateqartut inissaqartilernissaat, meeqqatta illersorneqarnissaasa qulakkeernissaa, allafissornerujussuattalu oqilisaaiginissaa annikillisinnissaalu nunarput tamakkerlugu.
Alloriaqqinnissaq tullinnguuttoq isumaqatigiissutigisariaqagarput tassaavoq, allaat 100-riarluta isumaqatigiinniassutigissagaluarutsigu, tassa siunissap nukittunerusup ataatsimoorluta pilersitsiviginissaa, politikkikkullu suliaqarnermi ilikkartariaqalerpagut suleqatigiissinnaanerit isumaqatigiinniarsinnaanerullu pitsaanerusut. Nunami partiit akornatsinni aammalu nunanik allanik isumaqatiginninnialeraagatta. Oqallinneq isumaqanngilaq immitsinnut nuannarinnginnata isumaqatigiinngissutitsinnik oqallittariaqartugut. Oqaloqatigiinnerit isumaqatigiinngiffinnut killittarsinnaapput. Kamaassimanerit oqaasinnguiffigineqartariaqarput unitsinneqalaarallarlutillu, uterfigeqqillugilli oqaloqatigiiffigilluaqqittalertariaqarpavut. Ajornartorsiutit piupput aaqqinneqarnissartik siunertaralugu, eqqarsartaatsikkullu nukittunerunissaq pilersitseqataaffigisariaqalerparput, uatsinnut tulluusimaarutiginnilersitsisussaq, uatsinnut tatiginnilersitsisussaq imminullu naleqartinnermik pilersitsisussaq, inuiattut amerlanngikkaluaqaluta piviusorsiorluta nukittullutalu nunatut ingerlalerniassagatta. Tamatta suleqataaffigisariaqarparput tamanna!
Naalagaaffeqatigiinneq, Danmarkimullu atanerput ukiorpassuarni nassuiaatinnaajuallaarsimavoq politikerinit atorneqarpallaartoq ingammik qineqqusaalernerni qinersisartunut piviusunngortitassaminnik utoqqatsissutissanik taakkartuileraagamik. Kisiannili nunatut nammineq ingerlattutut suliasat ilagaat nammineq ineriartornissap akisussaaffiginera. Taamaattumik aallartittariaqalerpugut akisussaafimmik tigusissalluta, inuiattut, kikkullu TAMAASA sullillugit aallartilluta.
Akimasuut piitsullu, illoqarfiit nunaqarfiillu, oqartussaaffiit akisussaaffigeriikkat, ikiortariallit, piitsut aammalu meeqqat ingammillu inuusuttuaqqat.
Immitsinnut napatissinnaasariaqarpugut namminiilivinnerup eqqartulersinnginnerani.
Aatsaallu immitsinnut nunatut napatilersinnaavugut suleqatigiissinnaassuseqarutta!