Assigiiaartumik piffissarlu ungasinnerusoq isigalugu ininut ineqarnermullu aningaasaliisarnissaq pisariaqarpoq sumiiffiit pisariaqartitsinerusut salliutillugit. Ajornanngippat Naalagaaffeqatigiinni aningaasaliisartut suleqatigalugit. Kalaallit Nunaanni inissaqarniarnikkut kinguussaaqqanerujussuaq ilungersuutigaarput aamma ineqarnerup iluani iluanaarniapiluttartut pillugit inatsiseqarnerput inerisimanngippallaaqaaq aamma piffissami sivisuallaami akueriinnarpallaarsimavarput partiit siuttuusut ineqarniarnikkut kinguussaatitsigaluttuinnarnerat.
Iluarsaassineq, inissianillu oquttunik isaterineq ajoraluartumik annertuumik ullutsinni pivoq. Politikkikkut pingaarnersiuinerlunneruvoq illut taama amerlatigisut aserfallassimammata aserorsimallutillu. Sanaartungaatsiartoqartariaqarpoq sumiiffinni pisariaqartitsiviusuni. Aningaasaliissutit iluanaarutissartaqarluartariaqarput aamma sukkasuumik taarsigassarsianik akiliinissaq pingaartittariaqarpoq aamma inuinnaat illuuteqartalernissaat kajumissaarutigisariaqarpoq. Inatsisartuni qularnaartariaqarparput patajaatsumik aningaasalersuisoqartarnissaa aamma namminersortut sanaartorsinnaanissaat, iluanaarsinnaanissaat aappaatigullu qularnarlugu nunatsinni inissianik nakkutilliinerup nukittorsarneqarnissaa.
Kalaallit Nunaata DTU-mik suleqateqarneq iluaqutissarsivigisaqaa aamma allanik ilisimatusarfinnik instituttinillu taamatullu suleqateqartarnissaq annertusartariaqarpoq. Pisariaqanngitsumik ataatsikkut aningaasat amerlavallaat atorneqalersinnaanerat pinngitsoortinniarlugu pisariaqarpoq eqaatsunik inatsiseqarnissarput periarfissaqalersillugu sulisartunik aggertoqartarnissaa imaluunniit tikisitanik. Nuuttut atorfissaqartippagut sulisussarsiniarnitsinni – tassa imaappoq ilinniarsimasunik pisariaqartitatsinnik tikisitsisarnissarput taamatullu tikisitanik pisartakkatsinnik maanngartartunik piffissami sivikinnerusumi.
Tigussaasumik iliuusissat:
Nunatsinni inatsisit periarfissaqartitsipput immikkut akuerissuteqarsinnaanermut taamaakkaluartorli atagu Danmark suleqatigalugu Naalagaaffeqatigiinni nuttarsinnaanermut programmimik sanariarta sulisartunik paarlaasseqatigiissinnaaneq eqqarsaatigalugu taamaasislluta akileraartarnermi malittarisassat, nunasigallarsinnaanerit aamma sulisinnaanermut akuersissutit fastrackernissaannut ammaalluta pisariaqartitsisoqartillugu akissartillutalu aamma avataaniit aningaasaliisinnaasut ammaattariaqarpagut akuerineqarsinnaasut. Assersuutaasinnaasut malittarisassat taasagut atorlugit suliartorfigineqarsinnaasut tassaapput: Peqqinnissaqarfik, sanaartortartut, danskimi tuluttullu ilinniartitsisut, pikkorissaasartut, nakorsat, psykiaterit, inatsisilerituut, sullissisut, tarnip pissusaanut immikkut ilisimasallit il.il.
Sulissutigeriartigu kulturimut/ ilanngutivitsitsinissamullu nunat pingasut taakku peqatigiillutik periusissanik sanasinnaassasut eqqarsaatigalugit Kalaallit Nunaanni pfissami sivikitsumi sivisuumilluunniit sulisartussat. Siunertaqarluarpoq aamma isumaqatigiinngissutit taamaaliornikkut millisarneqarsinnaammata inuiaqatigiit assigiinngitsut kulturillu assigiinngitsut akornanni.
Sulissutiginiarparput avataaneersut aningaasaliisarnissaannut katalogiliornissarput aamma nunaqavissut aningaasaleeqataasarnissaannut periarfissat eqqarsaatigalugit, nuna tamakkerlugu politikerit suleqatigalugit amama kommunalpolitikerit. Pisariaqartipparput sukkanerusumik pitsaanerusumillu sanaartornissarput aamma piujuaannartitsinissaq ataqqillugu aningaasaaliisartoralugit inuit tatiginartut pikkorisuullu. Suleqatigiissutigeriartigu nakkutilliisoqarfimmik pilersitsinissaq, tassa Danmarkimiit sulisoqarnikkut ikorfartorneqartussaq naalakkersuisoqarfinni oqartussaaffinnillu sulisooreersut nukittorsartarnissaat siunertaralugu ukunani immikkoortuni: Sanaartornerup iluani, peqqinnissaqarfimmi, Pinerluttaalisitsinermi aamma Inunnik isumaginninnerup iluani. Kalaallit Nunaata nakkutilliinermi ikiorneqarneq akilissavaa, Danmarkip isumagissavai sulisussat ilinniarsimasut Kalaallit Nunaanni sulerusussinnaasut. Tunngaviusumik Kalaallit Nunaata isumagisariaqarpai sulisussat tarnip pissusaanut immikkut ilisimasallit, sociologit ilisimatuut aamma ikiuuttussat nunat akornanni sulisartunik paarlaasseqatigiittarnissani programmiliorlutik eqaannerusunik. Aammali misilittakkanik nalilersuisarnernik, pitsaasumik ilisimatusarnermik aamma programminik naleqqussaasarlutik taamaasippat siuariangaatsiassagaluarpugut.