Ineqarneq aamma sanaartorneq
Sanaartorneq ingerlaavartoq
Naqissusiinnariartigu kissaatigigatsigu nunami maani sanaartorneq ingerlaavartoq. Sanaartorneq sapinngisamik ukiumiik ukiumut agguagaasoq suliariumannittussarsiuunneqarani akit kisiat tunngavigalugu aammali pitsaassuseq tunngavigalugu.
Ajornartorsiutitta annerpaat ilaagaat Kalaallit Nunatsinni inissiat sulliviillu aserfallalluinnarnerat aamma isumaqarpugut pissutaasoq Namminersulerattali aningaasaatitsinnik aqutsinerlussimaneq. Nunap ingerlalluartup BNP-p 7 %-iata missaa ukiuni ingerlanerluffinni inissaqarniarnermut immikkoortittarpaa Inatsisartullu isumaqatigiinnikuugaluartut tamanna pillugu inissaqarniarnikkut kinguussaaqqaneq iliuuseqarfigiuminaappoq.
Aningaasartuutinik eqiterinikuuvugut inissianik aserfallattaaliinnginnitsigut aamma assersuutissaqarpoq Kalaallit Nunaanni sanaartornermut iluarsartuussinernullu atugassaagaluit aningaasat “ilanngartorneqartartut” kiisalu allanut “Aningaasaliissutitut nutaatut” atorneqartarnerannut.
Taamaattumik allaaneq ajorpoq kusanartumik aningaasaqarnerput ingerlasoq. Kalaallit Nunaanni aamma Nuummi inissiat ima aserfallassimatigilernikuupput oqoqartigalutillu allaat inissiat aserfallalluinnarnerat immikkoortullu kinguaattoorfiulluinnarnera toqqortinneqarsinnaajunnaarnikuulluni. Akiligassaq alliartorusaartuarpoq.
Suleqatigiissitsisuni isumaqarpugut 10/40/50 atorlugu taarsigassarsititseriaaseq atoqqittariaqaleripput, akunnattumik isertitaqqortussusillit nammineq illusinissaminnut illuliornissaminnullu kaammattorneqassammata minnerunngitsumillu illuminnik paarsilluarniassammata.
Tamatuma kingunerissavaa inissiat nutarterneqarnerat aamma aserfallattaalineqalernerat taamatullu qularnaarneqassaaq aserfallattaaliinissaq pitsaasoq pisortat illuutaasa aserfallattaalineqarnerannut naleqqiullugu. Suleqatigiissitsisuni isumaqarpugut inissaqarniarnikkut naalagaaffiup ikiorsiisarnera allarpassuarnut naleqqiullugu isumaqarnerpaasoq, kisianni saqqumilaarnerusariaqaraluarpoq.
Neriuppugut tamanna illoqarfinni minnerni sanaartornissaq siuarsarsinnaassagaa kisianni Kalaallit Nunaanni tamanna misilittagaqarfigineqartorsuunngilaq aamma takornartaanngilaq sanaartornerni angisuuni inuinnaat aningaasaliisartut qunugineqartarneri nammineq pigisassanik sanaartornermut naleqqiullugu.
Eqqortuusinnaanngilaq Namminersorlutik Oqartussat kisimik illuliortitertuussasut.
Uangutsinnut pingaarluinnarpoq sanaartornermi inuinnaat namminersortut aningaasaleeqataasinnaanissaat. Aamma pisortat aningaasaliisarfiutaat aggersarusuppagut Kalaallit Nunaanni sanaartornermut aningaasaliitikkusullugit.
Utaqqinissarput akissaqartinngilarput imaluunniit illut amerlanerit annaanissaat isaterneqartariaqalerneri oqunnerilu pissutigalugit. Sanaartukkat eqqarsaatigalugit piumasaqaateqarnerusariaqarpugut anguniarlugu akikinnerpaanik sanaartornissaq akiginaguli pitsaassusissaat siunissami inissaqarniarneq nunatsinni patajaanneruleqqullugu.
Inissaqarniarneq eqqarsaatigalugu piffissap ungasinnerusoq isigalugu qinikkat sapinngisamik amerlanerpaat isumaqatigiissuteqartinniartariaqarpagut qularnaarlugulu isumaqatigiissutit aalajangiusimaneqarnissaat. Ajornartorsiorfigisartagarpulli immikkoortoq ataaseq tassaavoq ataatsikkut amerlavallaanik sanaartortoqalersarnera. Illoqarfinni siuariartorfiusuni suliassaaleqineq eqqortuusinnaanngilaq pinngitsoortittariaqarlunilu.
Housing first ataavartumik tunngaviusariaqaraluarpoq.