Silaannaap allanngornera piuvoq tamatta isummerfigisariaqagarput. Pitsaanngitsutigut pitsaasutigullu silaannaap allanngorneranik eqqorneqarpugut, taamaattumik tunniussinnaasagut tunniutissallugit pisussaaffeqarpugut. Naak kallerup innerata 70%-ia erngup nukiliornikkut pilersinneqartaraluartoq, piffiit ilaanni CO2-p appartinnissaanut suli pitsanngorsaasinnaavugut.
Batterit tassaapput ukiuni makkunani teknologiit siuariartornerpaat ilaat. Batterimi ataatsimi maanna angerlarsimaffiup ingerlatinnissaa kallerup inneranik immiinikkut ajornarnnaarpoq. Nutaaliullaqqinnerulaartuugutta, taava tamakkua napparsimaviliornerni ilanngussinnaagaluarpagut, taava erngup nukingata batterit immersortarsinnaavai, kallerup inneranik qamittoorneralu taamaasilluni malunnartassanngilaq.
Nutaaliat pitsaasut ilisimatusarfigisariaqarpagut inerisarniarsaralugillu. Kujataani soqutiginartorujussuarnik misileraasoqarpoq, kisianni Avannaani nutaaliornissamut tunngavissaqarluarpoq. Eqqarsaatigilaartigu Avannaani nunaqarfinni kallerup inneranik atuisoqanngitsoq. Avannarparterneq ilutigitillugu, aasaanerani seqernup qinngorneri annertusiartuaartarput. Aasaanerani diesel generatorit qaminneqarsinnaangaluarput, taava anguniakkatta qeqqaniilersimassaagut. Imaaliallaannaq pisoqarsinnaanngilaq, nukissiutit assigiinngitsut akornanni suleqatigiinneq, silap pissusaa inuillu pisariaqartitaat eqqarsaatigineqarluartariaqarmata. Kisianni tamakkununnga tunngatillugu ilisimatusarnissaq misileraanissarlu aqqutissiuutissavarput. Nunaqarfiit namminneerlutik peqataaniarlutik nalunaarnissaat siunnersuutigaarput. Nunaqarfip silap pissusaanut avatangiisinullu tunngatillugu misileraanissamut nammineerluni nalunaarpat, taava tassani aaqqiissutissat assigiinngitsut misileraaffigisinnaavagut.
Assigisaanik hybridinut biilinullu kallerup initortunut akileraartannginnissaq sivitsortissavarput. Akileraartarnerpullu silaannaap pissusaanut avatangiisinullu eriaginninnermik atuinermut aaqqissuutissavarput.
Avatangiisinut tunngatillugu ajornartorsiut alla ajornartorsiutigisarput tassaavoq anartarfeqarneq. Piffiit ilaanni suli plastikposit anartarfeqarnermii atorneqarput. Puussiarpassuit pinngortitamut iginneqaannartarput, sivisoorsuarmillu tassaniittarput. Hans Egede anartarfimmi puussianik atuisimasuuguni, suli puussiat taakkua ullumi tamaaniissapput. Ilisimatusarnikkut iliuuseqarnissamut piffissanngorpoq, soorlu suujunnaartitsinissamut ikuallaasarneq, biogas anartarfeqarnermut puussianik atortoqarluni nutaaliuutissat eqqarsaatigalugit.
Puussiat atorunnaarsittariaqarpagut. Microplast ullutsinni asbestinngoriartorpoq. Arlaannaataluunniit ajornartorsiuterujussuanngornissaa eqqarsaatigisimanngilaa, kisianni nunarsuup imartai plastikkinik ulikkaalerput. Nunatut immamik inuussuteqartutut siuttussalluta pisussaaffeqarpugut. Tamatumani allannguisinnaavugut, kisianni inatsisit tungaasigut ikiuuttariaqarpugut. Ikiuutaaffigisinnaasarput tassaavoq puussiat plastikkit atorunnaarsikkiartornissaanut inatsisiliorneq. Nunarsuarmi inuiaqatigiit allat qeqertani najugaqartut tamatumunnga tunngatillugu uatsinnit siuersimanerupput. Aquttuunissatsinnut takutitsinissatsinnut piffissanngorpoq.
Kisianni suut tamarmik akileraarutaanngillat. Nunatsinni eqqaavinni iluarsaassisariaqarpugut. Tamanna sivisuumik ingerlasimavoq sulinerpullu nangissavarput. Tamanna suliffissanik pilersitsineruvoq pitsaasoq, tassami iluarsaassilereeratta. Saviminiknik katersuinerput saviminernut eqqaavinni nangissavarput aatsitassanngorlugillu nassiuttarlugit. Tamanna suliffinnik aamma pilersitsivoq.