Akiligassaqarnermiik akiligasseqqinnernut amerlanernut allanut, aali oqaluttuarisaanitsinni aningaasaqarnikkut aattaat taamak ingerlallualerfitsinniitsigigaluarluta, suli immitsinnut akiligassittuarsinnarpugut suliassat annertoorsuit aningaasaqarnikkut imminnut akilersinnaanngitsut salliutinniartuarnerisigut – inuit salliunnissaannut pisinnaakuttooraluarpugut. Mittarfissat, imeqarfissuassat, Inatsisartut inissaat nutaat, allallu aningaasanik atoqattaarluta ingerlatsinitsinnilu amingartooruteqarluta suliarisinnaakutsoorpagut, utoqqartagulli, meeqqat inuusuttuaqqallu, atuarfeqarfik ilinniagaqarfiillu allat aningaasaliiffigitinnissaminnut annerusunut suli utaqqisitaajuarsinnarput, ikiorserneqarnissaminnik pitsaanerusumillu atugaqartitaalernissaminnut suli utaqqisitaajuarput. Tamanna allanngortittariaqarparput.
Peqqinnissaqarfik akisussaaffigisarput annikippallaanik aningaasaliivigineqaannarani aamma meeqqat inuusuttuaqqallu tarnermikkut anniartut sullinnissaminnut aaqqiissutissanik amingaateqartupilussuupput – imminornissarlu toqqagassannguinnararaaq, nunagisamiilluunniit nuuttariaqalerneq periarfissaq siulleq atorlugu, inuunerluunniit ingerlariaqqinnaveerpat anniaat ipisinniarneqartarluni aanngajaarniutit atornerluutiginerisigut, aanngajaarniummik ataasiinnaanngitsumik arlalissuarnilli – taavalu angerlarsimaffeqanngitsuuneq avaqqussassaajunnaaraluttuinnartarpoq imaluunniit asannilluni aappaqarniarnermut inuunerup atornissaa ajornarsigaluttuinnartarluni, suliartornissaq orniginarunnaartarpoq inuttut taamak ajornartorsiortigigaanni, misigissutsikkut taama aserorsimatigigaanni. Tamanna isiginngitsuusaaginnassanngilarput system-iliorlutali saaffiginnittunut tamanut kivitsisussamik SIULLERPAAMIK saaffiginnikkaagata sullissinermik aallartitsiviusumik.
Ullutsinni aamma ilinniakkaminnik qaffassaavigineqartussat ilinniagaqarsimanngitsulluunniit periarfissarsiuuttariaqarpavut, ullutsinni sulereersut, inuusuttuarartattalu ullumikkut ilinniarfinniittut ilinniagaat pitsanngorsaavigisariaqalerlutigit – siunissami oqaatsitigut ajornartorsiuffiunngitsumi periarfissaat amerleriarniassammata, siuttoqarniarnitsinniluunniit atorfinitsitsiniartarnermi amingaatigisakkavut ikilisinniassagatsigit.
Paasisariaqalerparpulli avataaniik suliartortussat pisariaqartittuaannassagatsigit, qanorluunniit pisariaqartittuaannartussaavagut, qanorluunniit meeqqat inuusuttuaqqallu tarnermikkut anniartunut ikiorsiinissaq piviusunngortittariaqaleratsigu. Salliussassani taanna normu 1-iusariaqarpoq, suleriutsillu iluameersut pilersinneqartariaqarput ilaqutariinnut tamanut ikiorsiisussat, ilaqutariinnullu attaveqartut allaat mininnagit, taamak suliaqarnitsinni Qallunaat Nunaat, Nunat Avannarliit Inuit naggueqativut isumasioqatiginerulertariaqalerpavut suliassat aallarnisagassavut qanoq pitsaanerusumik suliarisinnaanissaannut ikiorsiisinnaasut tamaasa pisariaqartikkatsigit. Sulianik nalilersuinerit, ikiorserneqarnerup kingunerisa misissuivigineqarnerisa aallartisarnerunissaat aamma pisariaqartilluinnarpagut, taamak iliorutta system-eqalissagatta pitsanngoriartortuaannartussamik, qinigaaffiit tamaasa nutaaliorniarsarilluni suliniarnerit qimanniassagatsigit.
Partiit tamarmik tamanna isumaqatigiissuteqarfigisinnaassagaat allanilluunniit ilassuteqarfigisinnaassagaat qularnanngilluinnarpoq.
Minnerpaamik maanna iliuuserisinnaasaraarput Qallunaat Nunaanniik aningaasat 85 mio. koruunit assigannik nammineq oqartussaaffiup akisussaaffigisatta aningaasalersulernissaa, iliuuseqarasuartartut taskforce aallartisarniassammata, saaffissat amerlillugit, misissuinerillu system-imuna sortaani aaqqitassaqarnerullutalu suliassaqarnerusugut, suleriusitta aallarniunneqareersimasut annertoorsuarmik allanngorseeqqaanngikkaluarlugit akisunerusumilluunniit ingerlatseqqaalersiinngikkaluarluta.
Persuttagaasarnermit, kinguaassiuutitigut atornerlunneqarsimanermit, meeraanermi sumiginnaagaasimanermit inersimasunngornermi kingunerluutit
Kinguaassiuutitigut atornerlunneqarsimasunik katsorsaanissatsinnut aningaasassaalatsitseqqajuaannarpugut. Pinngitsaaliisarnerit amerlavallaarput. Kinguaassiuutitigut atornerluisarnerit amerlavallaarput uumisaarisarnerillu amerlavallaarujussuarlutik, ajorniartumik ajoqusiisinnaasumillu suliffeqarfinni allanik oqaluuserinninnerit, suiaassutsikkut assigiinngisitsinerit angutaappata arnaappata kina suliffimmini tusaaniarneqarnerua, kina qaffatsinneqartarpa. Assigiinngisitsinerujussuaarpoq, arnat ilinniakkamikkut angusaqarluartarneriniik, isertitaannut kiisalu atorfinnut qaffasissunut atorfinitsinneqartartut suiaassusaat aallaavigalugit agguataarneri qiviaraanni-
Taakku saniatigut, sumut ingerlaniarnitsinnik, inuiaqatigiinni oqallittarnerit amigaataapput.Ullumikkut inuusuttut amerlanerit ajornartorsiutitaqanngitsumik suiaassutsikkut nikerartuusinnaassusermik qaammaasaqalernikuupput, ilisimmaarilernikuuaat eqqumaffigalugulu suiaassutsikkut isiginnittariaaseq paarisassaasoq, imminnullu paarisartussaallutik nalunngilaat. Qujanartumik!
Aamma mobiliminni internetseqarlutik perortuugamik qaatuuppaat takusinnaallugulu nunarsuaq tamakkerlugu suiaassutsimik tunngavilimmik malersigaasoqartartoq, arnat angutillu pisinnaatitaaffeqartut, immikkut sorsuutigineqartunut ilaavoq nunarsuaq tamakkerlugu anguniarneqartoq, arnat toqqissillutik angerlartarsinnaanissaat. Arnat pinngitsaalisaallutik arneriffigineqartarneri. Meeqqat atornerlugaasut. Persuttaanerit atuuttut, paaqqutarineqartut atornerlugaasut, lluinnarni kamassaateerarpassuit, naqisimanninniarnerpassuit, soqutigittaalliornerpassuit, ammut isiginninnerpassuit suiaassukkut, kinaassutsikkut,suliffeqarfinni naapertuilluanngitsoortarnerit, isertitatigut nunarsuarmilu suminngaannernikkut. Taamaakkaluartoq persuttaasarnerit, angerlarsimaffinni persuttaasarnerit, inooqatigisamut persuttaasarnerit pillugit oqallittarnerit amigaataapput soorlu aamma angerlarsimaffinni persuttaasarnernut aaqqissutissanik, inuttut tarnikkullu nakkarsagaasarnernik oqallittarnissat pisariaqartinneqartunut ilaagaluarlutik.
Takkugit, aap oqaluuserinissaat oqitsuinnaanngilaq. Taamaakkaluartoq pisariaqarpoq oqallisiginissaat. Soorunami ilaqutariit inoqatigullu amerlanerit inuulluarput, pikkoripput, ingerlalluarput imminnullu ataqatigiilluarlutik. Soorunami inuiattut tulluusimaarutigisinnaasagut amerlaqaat. Taamaakkaluaq suiaassutsikkut kinaassusersiuisoqarpoq – aamma taamaappoq angutinut nukappiaqqanullu kingunerluutaannik tusaanngitsuusaartoqarlunilu takunngitsuusaarinnittoqaannarani aamma angajoqqaat avinniartut/angajoqqaarsiaqarnermulluunniit suliani pisinnaatitaaffiiagaasoqartarpoq. Arnat taakkuupput aapparisaminniik persuttagaanerusartut anaananngoqqaarnermik nalaani, nalunaarusiarpassuit suli allanik peqarpoq. Imigassaq akuugajuppoq, immaqaluunniit ataatsimorsuaq qisuariaateqartarnitsinnut takussutissaanerpa. Ilami nunanut allanut sanilliulluta imigassartornerput annikillinikuuvoq. Ajoraluartumilli persuttaasarnikkut kisitsisit taamaannginnamik. Meeqqat inuusuttullu suniginnagaasartut, suli taamaapput. Nuna innuttaqanngitsoq nunaanngilaq. Taamaattumik qinigaaffimmi tullermi qisuariaateqartariaqarpugut, qulakkeerinnillutalu politikerit qinigaaffimmi kingullermi iliuuseqarfissaraluaminnik sapersaatigisimasaat iluarsillugit iliuuseqarfigisariaqarpagut.
Kingunerluuteqarpugut katsorsartariaqakkatsinnik. Nipangiusimaneqaannartut soorunami aamma angutit arnatulli aamma qiaqqusaapput. Arnat imminnut ataqqisut pikkorissullu isummersinnaasullu supajunnik taaguusersorunnaarniartigit, takoqqusaaginnarlutik pisutut isigiunnaarniartigit allatigulluunniit suiaassusaanut tunngasunik ammut isiginnittumik piunnaarlugit ilumoorussilluta aallartinniarta immitsinnut torersumik eqqartorsinnaanissatsinnut immitsinnullu torersumik oqaluuttalernissarput pimoorunniartigut ileqqunnguunnissaa.