Suleqatigiissitsisut aalisarnermut politikkianni anguniagaavoq aalisarnermut politikkimut toqqaannartumik politikerit sunniuteqartarnerisa peernissaat. Tamatuma saniatigut kissaatigaarput angallatit amerlisarnissaannut pisortat aningaasaliisarnerisa peernissaat. Taamaallaat kissaatigaarput pisortat aningaasanik tapiissuteqartassasut angallatit isaterneqassatillugit ilaatinneqarpat aalisarnermut akuerissutinik utertitsisarnissaq taamalu aalisarunnaarnissaq.
Tapersersorparput Kalaallit Nunaanni aalisarnermi suut tamarmik MSC-mik allagartalerneqartalernissaat.
Aalisarnermut politikki eqqarsaatigalugu marlunnik unamminartoqarpoq, qanoq pisassiissutinik piginneriaaseqartoqassava aamma qanoq annertutigisassappat. Pineqartuni tamani Naalakkersuisut tatineqartarput sapinngisamik amerlanerpaanik pisassiissuteqaqqullugit aamma pisassanik ingasappallaamik amerlassusiliisarneq unammillernartuuvoq. Taaneqartut tamarmik kingunerisarpaat aalisapilunneq peqassutsip innarlerneqarneranik kinguneqarsinnaasoq taamaasillunilu piffissap ungasinnerusoq isiginagu atuisarnissaq.
Pisassiissutinik amerlassusiliisarneq aalajangerneqartassaaq Harvest Control Rule atorlugu. Tassa imaappoq aalajangersarneqartassaaq pisassiissutit qanoq angitigissasut peqassuseq pillugu ilisimatuut taggiinerat aallaavigalugu. Malittarisassat allanngortinnissaat periarfissaassaaq paasissutissat pigisat amerliartornerat ilutigalugu kisianni pisassiissutinut toqqaannartuik sunniuteqanngitsumik. Raajarniarneri tamanna atorneqareerpoq kisianni aalisarnerit suugaluarpataluunniit atorneqartariaqaraluarpoq.
Pisassiissutinik piginnittuusarneq periutsimi assortuussutaasup aapparaa. Tunngaviusumik aalisarneq aallartinneqartarpoq killilersuinertaqanngitsumik aamma kikkut tamarmik paggatassinneqartarlutik. Aalisartulli amerlippata aalisagaqassutsimut naleqqiullugu taava ajornartorsiut takkuttarpoq. Periuseq atorneqarajuttoq tassaavoq aalisarnerup ilaani IOK-nngortitsisarneq ( Ataasiakkaanut nioqqutigineqarsinnaasunik pisassiisarneq) tassani aalisartut tamarmik pisassiissutit tamakkiisut ilaannik pisassinneqartarput.
IOK iluaqutissaqarluarpoq assersuutigalugu aalisartut ataasiakkaat ukiup ingerlanerani aalisarnissartik pilersaarusiorsinnaanngortarpaat ernummatiginagu pisassaarunnissartik.
IOK-lli ajortortai amerlaqaat. Pisassiissutit akitsoriataartarput aalisartut nutaat aallartissinnaajunnaartittarlugit. Aamma inatsisit piumasaqaataat uniorlugit pisassiissutit inunnit ikittuaqqanit pigineqaleriataarsinnaasarput. Pisassiissutinik pilissuit pilersinneqartarput.
Aaqqiissutissaq tassaavoq piginneriaatsinut periutsit assigiinngitsut apeqqutaatillugu aalisarneq sorleq pineqarnersoq. Community Development Quotas periusaavoq najukkami aalisartunut pisassiisutit ilaannik piginneqataassutsinik tunisisarneq. Qularnaarneqartarpoq najukkani mikisuni aalisarnerup tammannginnissaa. Kalaallit Nunaanni assersuutigineqarsinnaavoq Uummannami Upernavimmilu qaleralinniarnerit. Taakkunani nunaqarfiit pisassiissutit ilaannik pisassinneqarsinnaanngussgaluarput.
Alla aaqqiissutaasinnaasoq tassaavoq Pisassiissutinut piginneqataassutsinut ingerlatseqatigiiffiit, ingerlatseqatigiiffiusussaq pisassiissutinik peqarluni ilaasortaminut attartortitsisinnaasussaq. Piginneqatigiilluni ingerlatseqatigiiffeqarnermit allaanerusorsuunngilaq. Aalisartunngornissaq ajornannginnerusarpoq paartallutanilli pisassiissutit nalingat neqitsiullugu ileqqaartoqarsinnaanera killeqarpoq,soorlu IOK-mi atorneqartutut.
Periutsit assigiinngitsut atorlugit aalisartut inuusuttut immikkut pisassiissutinit piginneqataassutsinik peqartittarlugit, aalisartunngorsinnaalersillugit pisassiissutinik aningaasarpassuit atorlugit pisiniartariaarullugit. Taava periuseqalissagaluarpugut maannakkut aalisartut siunissamilu aalisartunngorumaartussat eqqarsaatigalugit.
Aalisarnermut IOK-mit pigineqareersut eqqarsaatigalugit isumaqarpugut pisassiissutit tunniunneqareersimasut imaaliallaannaq utertinneqarsinnaanngitsut. Utertinneqarnissaat kissaatigineqarpat, qanoq, sooq aamma qaqugu utertitsisoqarnissaat pilersaarusiorluaqqaarlugu utertitsioqassaaq. Sulliviit pissassiissutinik piginnittut aalisarnermut milliartilikkaanik aningaasaliinikuupput aamma periarfissaqartariaqarput aningaasaliissutimik utertinnissaannut.