OBS: Sermitsiaq.ag-mut, KNR-mullu nassiuneqarpoq nal. 06.38, apriilip 27iani:
Russit Ukraine-mut peqqutissaqaratik saassussinerat Ukraine-llu imminut illersorniarlutik akiunneranni pisut isigigallartillugit Kalaallit Nunaanni sillimaniarnermut illersornissamullu politikkip ingerlanneqarnera aamma qiviarneqartariaqarpoq.
Nutaarsiassaqartitsiviup Altinget-p nittartakkakkut saqqummiussaanni imak qulequtterneqartumik “USA-p mittarfissualiornerit immineerlugit Kalaallit Nunaanni radarit NATO-mi atugassat sanajumavaat” allaaserineqarpoq USA-p illersornmut qullersaqarfiata nunatsinni mittarfissualiornernerit akileeqataaffigalugit pilersaarutaat taamaatiinnarneqarpoq, peqqutigalugu nunatta mittarfiit nutaat sakkutuunit saniatigut atorneqartarnissaannut pissutigalugu.
USA-p illersornermut qullersaqarfiata nunatsinni aningaasat allatigut atorneqarnissaat pilersaarutigilerpaat. Maanna nunatta ilaani radarinik sanaartuiffiusinnaasuni misissuinissaq salliutillugu immikkut ilisimasalinnik aallartitsinialerput. Radarit taakku pilersaarutaasut imartatta nakkutigineqarnerat pitsanngorsarniarlugu sananeqarniarneqarput ilimagineqarporlu nunatta avannaani nunattalu kangiani tamanna pissasoq. Suleqatigiissitsisut isumaqarput imartap nakkutiginissaa kisimi pineqanngitsoq, taamatut nakkutilliineq suli killeqarmat.
Suleqatigiissitsisut-ni isumaqarpugut USA-p imminut illersorniarnermini rakettit nipip sukkassusaata tallimariataanik sukkassusillit Russit qanittumi misileragaat takujaarsinnaaniarlugit suujunnaarsinaaniarlugillu taama pilersaaruteqartut. Rakettinut taamak sukkassusillinnut imminut illersorniarneq assut pisariuvoq sukkasuumillu takujaarneqarnissaat pisariaqarluinnarpoq tassami raketit sammiviat aallartitsisumit nikisinneqarsinnaammata taamaasillunilu tuffissaat naatsorsoruminaassilluni. Raketit atomip nukinga atorlugu qaartartut imarsinnaavaat taamaasillunilu USA-mi illoqarfippassuit inuilu eqqorneqarsinnaanerat amerikarmiunit ernumagineqarpoq. Russit raketti taamaattoq SARMAT (Satan II)-mik atsigaq qanittumi misilerarpaat. Raketti taanna ilumini rakettit minnerit 24-t atomip nukinganik qaartartumik imallit imarisinnaavaai. Taamaasilluni Russit navianartorsiortitsinerat sakkortusivoq pingaartumillu maanna Russit nunanut allanut ministeriat, Lavrov, atomip nukinga atorlugu sorsunneq aarlerisaarutigilermagu.
Siornatigut amerikamiut atomip nukinga atorlugu nukissiuutit angallanneqarsinnaasunik Thule Airbase-mi atuinissaamik pilersaarutaat Suleqatigiissitsisut-niit malugeqqusimavarput. Maanna Dansk-it Kalaallit Nunaannilu oqartussat paasitikkumavagut nunatsinni illersorniarnermut atortunik ikkussuiniarneq sammineqartariaqartoq. Atortut taakku kalerrisaarinermuinnaq atorneqarnissaat ilimananngimmat aammattaarli rakettinik nakkartittiniarnermi sakkunik imaqarsinnaammata.
Nunatta nunarsuup kiffaanngissuseqartup ilaaniinnera oqaatigeqqinneqarnissaa Suleqatigiissitsisut-niit pingaartipparput, naalagaaffeqatigut allat ilagalugit. Nunatsinniit nunarsuup kiffaanngissuseqartup illersorneqarnera peqataaffigiumavarput, illersuiniarnemili anguniarneqarneq ammasumik ingerlanneqartariaqarnera nunattalu ilaani illersorniarnermut atortunik ikkussuinermi nunatsinniit oqartussaaqataasinnaaneq atortullu taakku nunatsinnut iluaqutaanissaanik piumasarqaneq pingaartinneqartariaqarpoq.
Nunani allani sillimaniarneq pillugu politikkikkut sammisat pissutsillu nutaat akuerisariaqarpagut. Nunarput ilannguneqassappat oqartussaaqataanissarput pingaartinneqartariaqarpoq. Naalakkersuisut illorsuaanni Nuuk-mmiittumi imaluunniit Folketing-mi ajortumik isertuussineq pisariaqartinngilarput.
Inuiaqatigiit oqartussaaqataanerat ilumut pingaartinneqarpat nunatsinni Danmark-milu pisortat akisussaasut inuttaasunut pisunik ammasumik paasititsisinnaasariaqarput. Nutaarsiassaqartittivinniik nunatta avataaniittunit pisunik paasisaqartarnerput atorsinnaanngilaq. Pitsaanerusumik ingerlanneqarsinnaavoq.
Annertunerusumik paasisaqarusukkuit Tillie Martinussen attavigineqarsinnaavoq, Suleqatigiissitsisut
Ataani allaaserisat attuumassutillit ammarneqarsinnaapput:
https://www.altinget.dk/artikel/usa-dropper-lufthavnsplaner-og-kigger-mod-opstilling-af-nato-radarer-i-groenland?SNSubscribed=true&ref=newsletter&refid=nyhedsbrev-middag-270422&utm_campaign=Altinget.dk&utm_content=Nyhedsbrev%20Middag%20270422&utm_medium=e-mail&utm_source=nyhedsbrev
https://www.northcom.mil/Portals/28/(U)%20NORAD-USNORTHCOM%20Strategy%20EXSUM%20-%20Signed.pdf