Taasisinnaatitaaneq inuup pisinnaatitaaffigaa suminngaanneernini apeqqutaatinnagu, aamma nunannguatsinni taamaattariaqarpoq, ineriartornissarput naatsorsuutigigutsi, siunissami aningaasaqarnikkut imminut akilersinnaasumik ingerlasinnaanngorusukkutta.
Kalaallit-Nunaat najorlugu nuannersorsuuvoq, naak inulerinikkut, innarluutilinnik sullissinikkut peqqinnissaqarnikkullu unamminartorsiortinneqaraluaqaluta, partiinik nappaliullugu namminiilivinnissamik anguniagalersortunik, sivitsoruttoortumillu suusupaginnillutik ingerlasimasunik, ajoraluartumik inuiaqatigiit pisariaqartitaannik salliutitsinnginnamik.
Qineqqusaarfimmi kingullermi soorlu Siumukkormiuniik isumakulunnartumik anguniagalersortoqaleraluarpoq, landstingimunngooq qinersisoqaraangat partiit qinerneqarsinnaaneri killiliiffigineqartalissapput. Inuit isumaannik killilersuinikkut aqutsiniaanerit qaqugorsuarmulluunniit akuersaanngisaannassavagut. Fascismimut assersuunneqarsinnaavoq. Tmat oqartussaanerannut innarleerujussuarsinnaavoq.
Killormuuanik tamat oqartussaanerat nukittorsaavigisussaavarput, soorlu avataaniik nuuttartut Kalaallit-Nunatsinni qinersisoqalertillugu taasisinnaanngortissinnaavagut. Nunatsinnut nunassikkusuttorpassuupput, Nunanit Avannarlerniit, Islandimiik, Savalimmiuniik, Asiamiik il.il., uagutsinnut nunaqqataalerusuttorpassut. Suliffeqartiterput, ilai namminersortuupput, uagutsitulli naligaluta akileraartartuupput. Taamaakkaluarlutik taasisinnaatitaanngillat taamaanneranut naalagaaffimmi innuttaasutut pisinnaatitaaffeqannginnerat peqqutaavoq. Nammineerlta nuukkaluarutta soorlu Norgemut Sverigemulluunniit tikilluaqquneqarluarluta taasisinnaatitaaleriissagaluarpugut. Maani aamma taamaattariaqarpoq. Tamanna qanoq-iliuuseqarfigisinnaavarput.
Nussortut aalisakkerivinni suliteruloorsinnaavagut, suliffeqarfinnik pilersitsineri iluataatigiinnarnagit aamma neriniartarfinni, caféni ass. kiffartuussineri ilorrisimaarutigisinnaavagut.Maanga nuunnermi taasisinnaatitaanissaq sulerusunnermut kaammattuutitut atussaaq, sivisuumik maani najugaqarusulersitsissalluni , amerlanerit anersaakkut imminnut kalaaliullutik misigigaluarlutik, taamaattorli taasisinaatitaanatik.
Inuup kiffaanngissuseqarluni inuusup nammineerluni aaliangigassaraa partii sorleq qineqqusaartorlu kerleq taarusunnerlugu. Inuk kiffaanngissusulik tassaavoq inuk taasisinnaatitaasoq.
Aammattaaq kissaatigaarput, inuiaqatitta Qallunaat-Nunaannut nunassinnikut, taaseqataasinnaanissaat attaveqaatitigut allakkatigulluunniit. Taakkunnguimmi nussornikuupput nunaminni inuuniarnermikkut unamminartorsiutitik pillugit. Taasisinnaatitaalernermikkut aaliangersaaqataassagaluarput nunartik qanoq sutigullu suullu tungaanut ineriartuuteqassanersoq, nunannguarminnut uteqqialernermikkut allaat kajumissuseqalersinnaallutik.
Tamat oqartussaaqataanerat pitsannguiffigigutsigu, amerlanerulissutigisinnaavarput. Amerligutta, sulisussaqarnerulerluta akileraarutitigut isertitagut annertusissappata, Kalaallit-Nunaata aningaasaqarnermigut namminiilivissinnaaneranut aqqutaasinnaalluarpoq.
Kiiffaanngissuseq angeruk, pisinnaatitaaffiiagaanissat naaggaaruk.