Nunatsinni inuussutissarsiortut ikiorneqartariaqarput sungiusimasatsinnillu allaannerusumik tamanna pissaaq.
Nunatsinni tunisassiorneq akikinnerulersinniartariaqarparput taamaalilluta suliffiit tunisassiornermut tunngassuteqartut amerlanerit pigiinnarniassagatsigit suliffissanillu nutaanik pilersitsilluta.
Nunarsuarmi allamut qiviarutta, suliffeqarfiit tunisassiornissaminnut atatillugu nukissamik akikitsumik annertuumik periarfissaqarfiusuni suliffeqarfiminnik inissiisarput.
Island assersuutigiinnarsinnaavarput aluminiumimillu aatsitsivii takuinnarsinnaavavut.
Taamali angitigisariaqanngillat.
Nukimmik ataavartumik pissarsiffigisinnaasavut assigiinngitsorpassuupput nunatsinnilu sumiiffinnut ataasiakkaanut naleqqussarneqarsinnaallutik.
Ullumikkut illoqarfiit aalisakkanik fabrikkeqarfiusut periarfissarpassuaqartutut Suleqatigiissitsisunit isumaqarpugut, nukimmi suli akikinnerulerpat illoqarfinnut taakkununnga tunisassiorneq nuunneqarsinnaasoq anginerulissaaq.
Assersuutissaannaavoq illoqarfinnut amerlanernut nunaqarfinnullu anginerusunut tulluarsarneqarsinnaasoq.
Politikkikkunaasit taanna pingaarnersiuinermiippoq, aningaasammi nalinginnaasumik nunatta karsianinngaanneersussaammata.
Nunarsuulli ilaani aningaasaliisartut angisuut nukik ataavartoq pissarsiariniarlugu aningaasaleerusuttarput.
Taamaattumik nunatsinni inuinnarnit nunanillu allaneersunik aningaasaliisoqarsinnaanera ammaffiginerusariaqaripput Suleqatigiissitsisunit isumaqarpugut, soorlu taamani Nuup eqqaani Utoqqarmiut Kangerluarsunnguanni erngup nukinganik nukissiorfiliortoqarmat taamaattoqartoq.
Taamaalilluta ilerasuuteqarata pinngortitaq mingutsinnagu suliffissanik amerlanernik pilersitsissaagut.
Uuliamik atuiunnaariartorneq – soorunami.