Tusilartummita, nunatsinni, qinersinissani oqallitsitsisoqaleraangat, qanoq-iliortarpat? Nakorsiarnialeraangamimmita qanoq-iliortarpat? Kommuniliassagaangamik? Politinut unnerluussissagaangamik? Tappiitsummimita?
Ilaquttaminnik ikiorneqaannaavissinnaanngikkunik imaluunniit naammattumik ikiorteqartinneqarsinnaanngikkunik, tamatta takoreerunarparput, tappiitsut kisimiitiinnarneqariataarsinnaasarput, niuerniarsinnaanatik, ulluinnartilluunniit artorsaatigalugu. Suli tusilartunut pissutsit ajornerupput. Ilitsersuutit amigaataapput, oqartussat ilisimasaat amigarput, oqalutsit ikiortillu amerlanerusut amigaatigaat, taakkununngalu atugassarititat pitsaasut, aammalumi pisortatigut.
Tusilartunut siunnersortit amigaataapput, annertungaatsiartumik isiluttunut pitsaasumik ikiorsiissutaasinnaasunik amigaateqarpugut, taakkuupput navianartumi inissisimasut.
Ilaquttatik inuunerup sinnera naatsorsuutigiuaannarsinnaanngilaat, utoqqaligaluarunilluunniit, takussunarpallaassaqaaq iluamik atugaqarusullutik Qallunaat-Nunaannut nuuttariaqartassappata. Uagut isumaginnilluarnerusinnaavugut.
Cecilia Marie Jakobsen qinerukku, Suleqatigiissitsisut qasusuillutik pissutsit tamakku iluarsinissaat sorsuutigissavaat.
Sapinngilagut aamma pissutsit iluarsisariaqarpagut!