Eqqumiippoq partiit tamarmik mianersornissamut tunngaviit tamaasa isiginngitsuusaaraat Kuannersuarni GME-p uranisiorniarluni suliniutaa aallartikkusungaaramikku.
Kalaallit Nunaata avammut niuernermi aningaasarsissutiginerpaasartagai imartatsinni aalisarnermit pisuupput, taakkulu pitsassuartut piseqqusaarutigineqartarput, issittumi immami minguitsumi aalisarneqarsimaneri ilaatigut pissutaallutik. Nunatsinni inuiaqatigiinni aningaasarsiorfitta annerpaap taamatut isigineqarnera maanna annaariaannanngorparput, nunatsinni inuit ilaat ima isumaqarmata uranisiorneq siunissaasoq.
Sooruna inuit ilaasa nunarsuarmi avatangiisit illersorneqarnissaannik suliniaqatigiiffiit naalakkersuisutiguunngitsut ataatsimoorlutik oqariartuutaat assortoraat, nalunngilarpummi siornatigut puisinniarnermut akerliullutik suliniuteqarnerinut atatillugu qanoq ilillutik nunarsuarmi pisisartunik sunniillaqqitsigisut, pisisartut maanna nunatsinneersunik kusanartunik nunanut allanut tunisassianik pisiumasartut eqqarsaatigalugit.
Maanna GME-p kalaallinut qinersisartunut imminut nittarsaannerujussua siunissami nunatsinneersunik piseqqusiunnaarlutik paasititsiniaasunut akerliulluni aamma suliaqassasoq isumaqarpugut?
Maanna mianersornissamik tunngaviliinissamut piffissanngunnginnerpa GME-llu suliniutaanut akuersissut kinguartillugu kingunerisassai tamaasa paasilluaqqaartinnagit, tassani aamma Kalaallit Nunaata uranimik avammut niuertutut ilisimalerneqarnerata kingunerisassaanut tunngatillugu?
Tanbreeze-p piiaalluni suliniutaa assortuussutaanngitsoq siulliunniartigu, misilittakkat suliniummit tassannga pissarsiarisinnaasavut takoqqaartigit kingornalu sumiiffimmi tassani aatsitassarsiorluni suliniutit allat aallartinneqassanersut misissortumik periuseqarluta tunngavissaqarluarlutalu pitsaasumik isumatusaartumillu aalajangiilluta.
Piffissaq qanittuaraannaq eqqarsaatigalugu aalajangiisarnerit ingerlatiinnarsinnaanngilavut, kinguaassatsinnummi akilerneqarsinnaanngiusartunik akiligassaqalersitsisinnaapput saniatigullu nunatta avammut niuerluni aningaasarsiorfiginerpaasaa aalisarneq innarlersinnaallugu!
Kalaallit Nunaata avammut niuerluni inuussutissarsiutaa annerpaaq navianartorsiortinneqassanngilaq. Suleqatigiissitsisut qinerukkit aamma Kuannersuarni GME-p uranisiorniarluni suliniutaanut unitsitsinissamut taasissaatit.
Kim Lyberth