- 18´nit inorlugit ukiulinnut pinerluuteqarsimasunut inissat
Pinaveersaartitsinerup tungaatigut sukaterisariaqarpugut innersuussivissaqartariaqarlutalu, immikkut meeqqat inuusutullu pinerluttuliortartut pillugit ilisimatusarsimasunut.
Soorlu Qallunaat-Nunaanniittumik Janus-centret´mik suleqateqarsinnaaneq, kinguaassiuutitigut atornerlunneqarsimasunik katsorsaaviit, meeqqanut inuusuttullunullu, kamammik ajornartorsiutilinnut kiisalu inersimasunik tatigisaqanngitsunut, katsorsaaviit – amigaatigaavut.
Aammattaaq ass. persuttaasimanertik pissutigalugu siullermeerlutik pinerluuteqarsimasut, katsorsartittussanngorlugit pineqaatissiisarsinnaanngornissarput pisariaqartipparput.
Siunnersuutigerusupparput pinaveersaartitsinikkut periusissiaq `Persuttaasarnermut taartissaq` kiisalu ingerlatseriaatsit inuusuttunik pinaveersaartitsillunilu malitseqartitsisarsinnaanissanik periarfissartallit, amigatigaavut.
Peqqinnartumik akuutitsisinnaaneq, peqqinnartumik kamassaraluamik aniatitsisinnaaneq, peqqinnartumik aningaasarsiorsinnaaneq, tamakkuupput inuusuttunnguit pinerluttuliortut inuutillutik takunngisaannarnikuusaat. Taamaattumik inuiaqatigiinnut pingaarpoq,katsorsaasarnikkut naliginnaasumik inuuneqalertitseqqittarnissap ukkatarivinnissaa, inuusuttut siullerpaamillu pinerluttuliortut utaqqigallartussanngornagit inissiinnarnagillu.
Amerlanerit meeraapput, inuusuttuupput inuupput pitsaasut, taamaallaat-una inuunerup aqqusernani, imminut naalleraannarnikut. Aqqutissiuunneqarnissamik pisariaqartitsisuupput, periarfissinneqarnissamut, siunissaminnut aqqut eqqortoq toqqarsinnaanngorniassagamikku.
Taakkuulluni iluassagaluaqisoq suli inuiaqatigiinnut iluarnerussaaq. Politiit ullormut nalunaarusiaat malillugit, 2020´mi persuttaasarnernik nalunaarusiat kisitsisaat qaffappoq. Pinaveersaartitsiniarnerup tungaatigut pikkorinnerunissarput pisariaqartinneqarpoq, periutsitut `Persuttaasarnermut taartissaq´-tut ittunik pisariaqartitsivugut, qaammarsaanerit amerlanerusut, angutillu oqaloqatigiittarfiinut aningaasaliissuteqartarnissat, peqqinnartumik akuutitsisinnaanerit, inunnut misigissutsiminnik aqutsiniapiloortunut iluaqusersuutitaqarsinnaasut. Tamakkuninnga politiit isumannaarisussaatitaanngillat, oqartussat-uku suliassaat.
Ilanngaasivik taamaatinneqarniarli, eqqunniarnerinnaa 150 mio kr´mik naleqarpoq, ukiumullu ingerlatsinertaa 8-10 mio kr akeqartassalluni, inatsisissallu akuersaarneqarnerani paasinarsilluni tusarniaanerni akissutini, akiitsut ilanngaataasartussatut naatsorsuussat taamaallaat sisamaraarterutaat ilanngaataasarsinnaassasoq.
Aningaasat taakku eqqarsaatigilluakkamik eqqartuussiveqarnikkut aaqqissuusseqqinnissamut tunniussigit, ullumikkut ajornartorsiutit takusartakkagut aallaavigalugit pimoorussamik aaqqissuusseqqissinnaanngorlugit. Tassaassagaluarpoq silatusaarneq.