KNR-ip 30. marts allaaseraa, Ilulissani Upernavimmilu Avannaata Kommuniata meeqqanik tapersersuinermut tunngassuteqartuni ingerlatsinera pillugu Namminersorlutik Oqartussat nakkutilliinermik ingerlatsiviata nalunaarutaa.
Atuarneqarsinnaasut sussaanngillat, ilaatigut allaaserineqarpoq meeraq ataatsimik ukiulik gonorrértoq inoorlaarlu sumiginnagaq, suliallu iluamik qulaajarneqarsimanatik meeqqallu ikiorneqartussaagaluit ikiorneqarsimanatik.
Nunannguatsinni inuuniarnikkut ajornartorsiorneq pissaaleqinerlu annertoqaaq. Inuit amerlanerit tamanna nalunngilaat tamattalu tamanna aalluttariaqarparput iliuuseqarfigalugulu. Ajornerpaarli unaavoq, kommunimut inatsisartunullu qineqqusaarnerup nalaani oqaluttuat taama tupannartigisut saqqummiunneqaraluartut ima soqutigineqanngitsigaat, borgmesterip kukkunerit assigiinngitsut taakkartorneqartut aaqqinneqarnissaannik neriorsuinera pillugu taamaallaat allaaserinnittoqarmat. Nuna tamakkerlugu politikkikkut ajorluinnartut tamakku pisut, soorlu Tasiilami meeqqat sumiginnakkat eqqartorneqalermata Danmarkimit ikiuisoqarpoq aningaasaliisoqarluni ajornartorsiutinut oqimaatsunut iluaqutaasinnaasunik. Nikallornartuali aana, politikerit akornanni ima uumitsattoqartiginanilu kamaammertoqartiginngilaq anguniagaqartumik iliuuseqarfigineqartariaqartumik oqartoqarani, meeqqat innuttaasullu ikiortariallit atugaat qulaajaaffigineqartut pillugit, politikkikkut suliniutit tusarluarsaarutit qineqqusaarutillu piinnarnagit.
Ileqqorissaarnissarput puigoratsigu! Qineqqusaarnermi ilumut arlaannaataluunniit ukiukitsut nammineersinnaanngitsut naapertuilluanngitsuliorfigineqarneri eqqartornianngilai? Suut tamarmik pissaanermut pissaaneqarniaannarnermut, aatsitassarsiornernut Danmarkimillu pituussaarniarnernut imaqanngitsunut tunngappat?
Suleqatigiissitsisunit taasaqaruit taava inuit tamarmik atugarliortut sumiginnarneqartullu Inatsisartuni tusaaneqartalissasut neriorsorsinnaavassi. Naammaleqaaq – partiillu ukiut 40-t sinnerlugit pissaanermik paarlakaajaallutik nunatsinni issiasimasut imminnut qiviangaatsiartariaqarput. Ilumut inuiaqatigiit taamaattut pilersippavut? Meerannguit ataatsimik ukiullit kinguaassiutimikkut nappaatillit ingerlatsiveqarfillu soqutigisaqanngitsoq?
Neriuppunga qinersinerup kingorna pissutsit allanngussasut. Maanna piffissanngorpoq inuiaqatigiinni sanngiinnertatta isumaginissaannut piffissanngorporlu Kalaallit Nunaanni ileqqorissaarnermik isumaqarnitta narlorissiteqqinnissaanut, qeqqarissilluta oqarsinnaanngorluta inuit tamaasa isumagalutigit. Tassami inuiaqatigiit nalilersorneqartarput inuiaqatigiinni sanngiinnerpaat qanoq pineqarneri tunngavigalugit. Suleqatigiissitsisut tamanna nalunngilaat, naalli partiit allat?