Ajoraluartumik nunarsuarmi tamarmi, kinguaassiutitigut naapertuilluanngitsuliornerit, pisarput, kalaalliit kisiartaalluta ajornartorsiutiginngilarput, taamaakkaluarpalluunniit ajornartorsiut isummersorfigisussaavarput.
Susassaqarfinni suliniuteqarnitsinni inuk ingammik meeqqat qitiutittariaqarpagut. Suliniutitsinnik sallinnguisariaqarpugut isumaqatigiissusiorfigalugillu, ikorfartuerusuttullu piukkunnaatillit tamaasa qujarullutigit. Suleqatigiissitsisuniik una qulequtaq pillugu, nunamut tulluusimaaruteqarpallaarnermik aallaavilimmik tunuarsimaarneq qaaginnarsortumillu isummersuuteqarnerit, akuersaarsinnaanngilagut.
Inuiattut periutsigit naleqartitagullu ataqqillugit, ikiorsersinnaasagut amerlanerpaaffianiitittariaqarpagut sapinngisarpullu tamaat pinaveersaartitsinikkut suliniuteqarluta. Akuersaarneqarsinnaanngilaq suliassamik nalunaaruteqartoqarneraniik ullorpassut qaammaterpassuillu utaqqisoqaqqaartariaqartarnera, suliap aallartinnissaanut, inuiaqatigiittut akuerisariaqarparput, meeqqat inuusuttullu, ingammik meeqqat inuusuttullu pinasuartumik ikiortariallit, inuiaqatigiittut suliassatsitut siullerpaatut isigisariaqarigut.
Nipangiinnarluta isiginnaaginnarsinnaajunnaarpagut, meeqqat inuusuttullu kinguaassiutitigut naapertuilluanngitsuliorfigineqartut ikiliartunnginneri. Amerlavallaarujussuarput, ikilitinneqartariaqarput. Siunisami nunatsinni meeqqanik kinguaassiutitigut nappaatinik tunillatsissimasunut tunngasunik, qulequtaqartoqartassanngilaq.
Pingaarutilerujussuuvoq ukiut tallimat tullinnguuttut iluini ineriartornerup muminnissaa. Nalornissutigineqassanngilaq, meeqqanut naapertuilluanngitsuliortarnerit pillugit nunatut nipangersimaannanngitsutut maligassiuisoorusukkatta, ingammik, naapertuilluanngitsuliorfigineqarnerup kingunerluutai pillugit.
Tamakkualu imaaliallaannarlutik takkutinngillat. Immikkut sammisamut ilisimasallit, politikerit innimiittaalliorfigineqarlutillu atornerlunneqarsimasut aqqutissiuussisimapput, oqallisigitinnissaanut ammaalluta, aammattaarlu inuiaqatigiittut oqallisigisinnaanngortillugu.Massakut-una oqallisigiinnarnagit qisuariaateqarfigalutigit iliuuseqarfigisussanngorigut. Inuinnarnik qaammarsaaniarneq pikkoriffiginerulerlugu – suliassanik sukkanerusumik aallussisalernissaq.
Meeqqanut inuusuttunullu tunngatillugu immikkoortortatta pisortani suleriusiat allanngortissavarput, pisortani allaffissornerup pitsanngorsarneranut sukaterneqarneranullu atatillugu.
Suleqatigiissitsisuni ima takorloorparput qitiusumik pilersitsinissarput, nunap ilaani arlaani, meeqqat inuusuttullu / ilaqutariit meerartallit inuusuttortallillu ulorianartorsiortut, inuuniarnikkut oqimaatsunik atugallit imaluunniit taamatut atugaqarnerinik pasitsaanneqartut pillugit suliat tamarmik nassiunneqartarfissaannik.
Taakku sumiiffimminni politiinik, sagsbehandlereqarpallu taakkuninnga, imaluunniit suliamut tunngasunik ilisimasallit allat nunaqqatigiinni ikiutaasinnaasunik suleqateqassapput, qanippallaassanngillalli taamaalillutik sulianik nalunaarutinik nunaqarfinni mikinerneersunik suliaqarsinnaallutik.
Suliamullu tunngasunik ilisimasalinnit tapersersorluarneqassapput supervision-ernissaminnut, handleplaninik pitsaasunik piviusunngortikkuminartunillu ineriartortitsinissaminnut, suliat pikkoriffigilernissaannut politikerinullu allanullu meeqqat inuusuttullu atugarliortut pillugit aningaasaliisussanut siunnersortaalluarsinnaanngorlutik. Suleriuseq nutaajuvoq, sulianulli eqaallisaataasinnaassasoq neriuppugut, inuillu qanigisaminnut tunngasunik kisimiillutik tapersersorneqaratillu suliaqannginnissaat taamaalilluni qularnaarneqarsinnaassaaq.
Suleqatigiissitsisuni nalunngilluinnarparput ikiorneqarnissamut periarfissat ikittunnguusartut. Inissiinerit, inissiigallarnerit, ilisimasalinnit ikiorneqarneq, psykologimit kalaallisut misissorneqarneq, sagsbehandlerit suliassanik ulikkaartoortut, kommuninit periarfissaasuasunit aningaasat illuartitat il. Il. Nalunngilarput ajornartorsiutaasut ukiorpassuarnilu aggersuni ajornartorsiutaassasut. Kisianni allatut ajornaqaaq aaqqinniartariaqarpavut. Nalunaaruteqartoqartillugu ulloq unnuarlu siulleq iliuuseqartoqartassaaq.
Takorloorparput ajornakusoortippallaanngikkaluarlugu suliarineqarsinnaasoq, qitiusumili sulisut ilisimasalinnit tapersersorneqarluassapput, tassanilu sulisunut iluaqutaasussatut takorloorluarsinnaavavut nunani avannarlerni ikiuutaasinnaasut assigiinngitsut, imaluunniit Naalagaaffeqatigiinnerup iluani Skype aqqutigalugu imaluunniit TELE-medicin atorlugu.
Meeraq pineqartillugu nalunaaruteqartoqarsimatillugu akunnerit 24-t iluini qisuariartoqareersimassaaq. Imaassinnaavoq najugaqarfimmi nalunaaruteqarfigineqartumi politiit, kommunefoged, imaluunniit alla oqartussaneersoq orniguttoq. Orniguttup takusani qitiusoqarfimmut nalunaarutigissavai, taakkulu akunnerit 24-t iluini suliaq suliarissavaat, nalilerlugulu nammineq nalilersueriaaseq aalajangigartik naapertorlugu.
Uagutsinnut inuinnarnut paasiuminarsarniaraanni, ima immikkoortulersorneqarsinnaapput: ”Pinerlunneq” – politiinit ersareqqissaartumik qanoq iliortoqarnissaa ilisimaneqassaaq, kingornalu qitiusoqarfimmut attaverlutik, orniguttoqarnissaanik isumaginnittumik. ”Meeraq navianartorsiortinneqarpoq – ilaqutaani qaninnerni inissinneqarallarnissaa paasisaqartoqarnissaata tungaanut innersuussutigineqarpoq”, ”Ernumaginninneq – angajoqqaat nukissaqarput qanoq iliorlutillu ikiorneqarnissaminnik pisariaqartitsipput” imaluunniit immikkoortulersuinerit allat, qitiusoqarfimmit suliamik ingerlatitseqqinnissamut ajornaallisaasunik.
Meeqqat inissinneqassappat, ilaqutariit Familiecenterimit pulaarneqassappat imaluunniit allamit ilisimasalimmit, psykologimik oqaloqateqassappat, suliamik aallartitsisoqassava ”Najorti”-mit tapersersorneqartumik, meeqqat arsaarinnissutigineqassappat, imaluunniit inummik tigusarinnittoqassava? Meeqqap ajunnginnera isumageriarlugu suliat tamakku aallartinneqassapput. Akunnerit 24-t iluini.
Akunnerillu 72-it iluini suliami meeqqamut, qatanngutaanut, ataataanut, anaanaanut, angajoqqaavinut ilaqutariinnulluunniit tamarmut handlingsplan siulleq suliarineqassaaq. Sapaatip akunneraatinnagu handlingsplan piareereersimassaaq. Tassunga tunngasut allat nassuiarneqarnerat ”Meeqqat Inuusuttullu” -mi takukkit.