Qitiusumi immikkoortoqarfeqartariaqarpugut, meeqqat inuusuttullu pillugit suliassanik ikiuisinnaasumik. Inatsiseqarnikkut, siunnersuinikkut, ataqatigiissaarinikkut innersuussuteqarnissakkullu.
Meeqqanik inuusuttunillu ikiortarialinnik ikiusinnaasassapput sukkatsutsinut pingasunut avillugu:
* Suliassap tiguneraniik nal.ak. kaajallanngitsoq suliassartaa siulleq piareereerneqartassaaq. Imaappoq nalunaarutiginnittoqarniariartoq misissuineq aallartittassaq, politiinit, peqqinnissaqarfinnit oqartussanilluunniit allanit – suliakkiussaq/nalunaarutigineqartoq qisuariarfigineqareertassaaq.
Nal.ak. kaajallannerani nalilersuisoqartassaaq, meeraq angerlarsimaffimmi avataanut inissinneqarallassanersoq, immikkut piffissami aalingersimasumi nakkutigineqarluni paaqqutarineqassanersoq imaluunniit siullertut iliuusissaq suussanersoq.
Oqartussat angajoqqaajusullu illersuuteqarnissap tungaatigut eqqartueqatigiissinnaappata, soorunami taannaavoq aqqutigisassaq pitsaanerpaaq.
Meeraq qitiutillugu, meeraq aallaavigalugu, meeqqap pisariaqartitai anguniarneqarlutik.
Pingaarutilerujussuuvoq suliamik tigusisut siulliit suliamik ingerlatsinissaminnut piareersarneqarsimanissaat, taamaattumik politiit peqqinnissaqarfimmilu sulisut pikkorissartinneqartarnissaasa saniatigut, tapersersuisuutitassanik piareersimatitaqarnissatta saniatigut aamma oqimaatsunik meeqqat inuusuttullu pillugit sullissisuinnaanngitsoq aamma unnerluutiginnittut nalunaaruteqartuusullu, oqaloqatiginnittarfissaannik pisariaqartitsivugut.
* Akunnerit 72´t iluini iliuusissaq naatsoq, utaqqiisaataasussaq malitseqartinneqartussarlu piareerneqareersimassaaq. Meeqqat ilaqutaasa ilaqutariittut siunnersorneqarnissartik/isumasioqateqarnissartik pisariaqartippaat?
Meeqqap sungiusimasaasa akornanni, nukissaqartoqarnerluni, piffissami sivisuumi tapersersortitut inissikkallarsinnaasumik?
Ilaqutariit iliuusissaliorsinnaappat unammillernartunik oqilisaataasinnaasunik?
Qanitaanni nalunngisaasaluunniit akornanniittoqarnerluni tapersersuuteqarsinnaasunik?
Piffimmi/najukkami ilisimasallit atorlugit sakkussanik tunioraasoqarsinnaava, immaqa qitiusumiik ikiorserneqarnertalimmik?
Ilaqutariinnik- qanigisariinnillu siunnersuisarnissaq suliniummut ilaassaaq. Ilaqutariit meeraq paaqqutarisinnaanngippassuk, imminnut attaveqartarnissaminnut ikiorserneqassapput, aatsaat naliliiffigineqareerpat meeqqap timimigut tarnimigullu ineriartornissaanut, attaveqarneq, naalleraataassanngitsoq.
* Suliap tigoreerneraniik, sap.ak. ataatseq qaangiutinngitsoq, iliuusissiaq siulleq sananeqareersimassaaq, meeqqamut qanigissaanullu suliniuteqartoqarnissaanik, qulakkeerutaasussaq.
Allatut oqaatigalugu; Sap ak siullip iluani iliuusissiaq siulleq piareeriissaaq, meeraq kalerrinneqariissaq, suliassap imminut tunngasup qanoq-ingerlaniarneranik paasitinneqareersimassaaq, tamanna pissaaq meeqqap oqaatsit paasisinnaasai atorlugit.
Ikiorsiissutaasussat pisariaqarnerit ingerlarsortinneqalereersimassapput, meeraq ilaqutaasullu paasitinneqareersimassapput, ikiorneqarnissaminnut suut pisinnaatitaaffigigaat, suullu iluaqutigisinnaagaat.
Immaqaluunniit qulaani taakkartukkagut piviusorpalaanngingajattumik angujuminaapput, pivisumi qanoq-ittoqarneranut sanilliukkaanni. Kisianni suliniuteqarfiup uuma tungaatigut pavaniititsisariaqarpugut.
Suleqatigiissitsisut aammattaaq isumaqarput, allatut ajornartumik suleqatigisinnaasat, tamakkiivillugit tamakkerlugit, suleqatigisariaqarigut. Naalagaaffeqatigiinnerup iluani, oqartussat akornini, kommunit namminersorlutillu oqartussat akornanni, kommunillu akornini.
Misissuinissatigut suleqatigiissitassap, pisarialitsigut misissuisarnissamini, Naalagaaffiit Peqatigiit meeqqat pisinnaatitaaffiinnik aaliangersagaat malillugit suleriuseqartariaqarput, meeraq meeqqalluunniit ineriartornissakkut ulorianartorsiortoqarneranut tunngasoqartillugu. Sapinngilagut, nukiit tassunga atorutsigit.
Suliassamik tassannga allamik pingaarnerusoqarsinnaanngilaq.
Tillie Martinussen