Meeraanerput inuusuttuunerpullu tamatta eqqaamavarput. Eqqaamasat siulliit. Ulloq atualeqqaarfik. Ikinngutit siulliit asannilernerlu siulleq.
Meeraaneq amerlasuunut ajoraluartumik taartortaqarpoq. Kalaallit Nunaanni kinguaariit tulleriiaat kinguaassiuutitigut innarlerneqarlutik peroriartortarput. Inunnut atasiakkaanut aseruutaasarpoq akuttunngitsumillu atornerluinermik imminullu toqunnermik kinguneqartarluni.
Kalaallit Nunaanni meeqqat tallimararterutaat kinguaassiuutitigut innarlerneqarnikuupput.
Tamanna ajunaanersuuvoq. Taamatut pisoqaannarsinnaanngilaq. Innarlerneqartut ikiorneqarnissaat pinaveersaartitsinerullu annertusarnissaa pisariaqartinneqarput.
Kingullertigut siuariartortoqarnikuuvoq, assersuutigalugu politiini meeqqat kinguaassiuutitigut innarlerneqarsimasut pillugit immikkut suliaqartartunik aamma meeqqanut inuusuttunullu navianartumiittunut aningaasanik sillimmatinik pilersitsinikkut.
Politiit suli annertunerusumik suliaqarsinnaanersut, suliap annertussusia annertuseqqinneqartariaqarnersoq misissortariaqarparput.
Peqatigiiffiillu piumassutsiminnik sulisut qanoq ikiorsinnaavagut, meeqqanullu ajorteriaannarnut ornittakkat amerlanerusut sumi pilersinneqarsinnaappat aamma meeqqat inuusuttullu qanoq sukkasuumik ajornanngitsumillu pitsaanerusumik ikiorneqarsinnaappat.
Eqqartuussiveqarnerup tiguneqarnissaa aamma inassuteqaatigisinnaanngilara.
Kalaallit Nunaanni politiit, pinerluttunik isumaginnittoqarfik eqqartuussiviillu Naalagaaffeqatigiinnermi ataatsimoorunneqartariaqarput. Immikkut ilisimasallit tamaasa ikiorserneqarnissarpullu atorfissaqartipparput.
Aamma Kalaallit Nunaanni Politiit nalunaarusiamik kinguaassiuutitigut innarliinernik unnerluussinissamut ajoqutaasunik qulaajaaffiusumik januarimi saqqummersitsipput.
Inassuteqaatit ilaat tassaavoq oqartussani suliaqarfiit akimorlugit suleqatigiinnerup annertusarnissaa.
Tamanna isumaqatigisorujussuuara, siunnersuutigerusupparalu meeqqat navianartumiittut pillugit suliaqarnerup kommunit, Namminersorlutik Oqartussat, naalagaaffiup, Naalagaaffeqatigiinnerup akornanni ataatsimut ingerlanneqarnissaanik Namminersorlutik Oqartussat suliniuteqassasut.
Tamanna misiliutitut ukiuni tallimaniit qulinut ingerlassinnaavarput. Meeqqat kalaallit innarlerneqariaannaanatik peroriartorsinnaassapput.
Taamatut pisoqaqattaartarnera annikillisinniarlugu assigiinngitsunik suliniuteqartoqassaaq.
Tillie Martinussen