Naalagaaffeqatigiinnerput ineriartortitseqatigiiffinngortitsigu!
Kalaalli-Nunaanni ersarippoq, aningaasaleeqataarusuttunik amigaateqartoqartartoq, nunatsinni takoranningaartorsuarmi periarfissanik qulakkeerinnittussanik, suliffissaqarnikkut- ineriartortitsinissakkullu susassaqarfitsigut, nunatsinnut Naalagaaffeqatigiinnitsinnilu tamatsinnut iluaqusersuutaalertussaagaluanik pilersitserusussuseqarnitsinni.
Taamaattumik Suleqatigiissitsisut tungitsinniik siunnersuutigaarput, kalaallit tungitsinniik pilersitsiniaasoqassasoq, aningaasaateqarfimmik Naalagaaffeqagiittut ataatsimoorussassatsinnik, Savalimmiut, Kalaallit-Nunaat Qallunaallu-Nunaat tamarmik immikkut nunap PNB´mi sisamaraarterutaata naliganik akiliisassoq. Taamaaliornitsigut ukiumut 5+milliardinik, ataatsimoorullutigu aningaasaateqarfissatsinni, aningaasaateqalissagaluarpugut. Saniatigullu Savalimmiuni, Qallunaat-Nunaanni Kalaallillu-Nunaanni, inuussutissarsiuteqarnikkut assigiinngitsuitgut aningaasaliiffigineqarumaartussatigut isertitaqaataalerumaarsinnaasussat, ilanngullugit.
Nunatsinni namminersornermik inatsiseqalernitsigut qulakkeerparput sammisaqarfiit tamakkerlugit tigooqqareerutsigit, namminiilivinnitsinnik nalunaaruteqariaannanngussalluta. Namminersornermik inatsiseqalernerup aamma kinguneraa – kalaallit kissaateqarnerisigut – naalagaaffiup tapiissutaanik parnaarsineq, 2009´mi inatsisip pilersinneqarnerani tapiissutit annertussusaanut nikeqqittussaanngitsutut parnaarneqarmata.
Taamaattumik-una Kalaallit-Nunatsinni sanngiinnersagut eqqugaasut, namminiilivinnissamik sinnattumut, pilliutaallutik, ullumikkut kialuunniit takusinnaavaa, anguniakkap taassuma, qanoq ungasitsigissusia.
Piffissap ingerlanerani, kalaallini inuiaqatigiinni sanngiinnerit, atugaat ajorsigaluttuinnarput.Saniatigut, kalaallilli isumaqatiginninniartartut, tapiissutit parnaallarmasigit, kinguneri massakkut ersertiterput naalagaaffeqatigiinnerup iluani akornutinnguuteqqavoq kiisalu Qallunaat-Nunaata ikiorsiisinnaanerigaluanut tapersiisarsinnaanerigaluanullu, allaffissorninngortitsiinnarani annertoorsuarmik neriutaarutitsinermik kinguneqartitsivortaaq.Tamakku erserput soorlu Tasiilami inuusuttunut immikkut ikiorsiissuteqartoqarmat kalaallillu ataqqinaatissamittut mittarfissualiornikkut anguniagalersuutaasa aningaasalersorneqarnerani.
Suleqatigiissitsisut takusinnaavaat Namminersornermut Inatsit assortorneqarsinnaanngitsoq isumaqatigiinniaqqissutaasinnaanngitsorlu, taamatuttaaq Suleqatigiissitsisut kalaallit suliassaqarfinnik tamanik Danmarkimit nunatsinnut nuussisinnaanerannik piginnaatinneqarnerat nunattalu namminersulivinngissaanik oqarnissaq akerlilerumanngilaa.
Taamaattorli Suleqatigiissitsisut piumasaraat Naalaagaaffeqatigiinneq asuli aningaasartaqanngitsumik atorunnaarsikkiartuaarneqartussatut isigineqassanngitsoq. Naalagaaffeqatigiinneq tassaasariaqarpoq ineriartortitsinermik suliaqarneq, tamattaalluta savalimmiormiut danskillu peqatigalugit immitsinnut tapersersoqatigiilluta, qularnaarlugulu aningaasanik tamatta atorsinnaasatsinnik peqalissasoq, naalagaaffeqatigiinnerup iluaniittut tamarmik suliniuteqarnerminni atorsinnaasaannik, nuna ataasiinnaanngitsoq eqqarsaatigalugu.
Suleqatigiissitsisut ima isumaqarput Naalagaaffeqatigiinnermi aningaasaateqarfik ataatsimoorussaq Norgemi uuliamut aningaasaateqarfimmut assingussasoq, Naalagaaffeqatigiinnerullu iluani pigissaarnermik ineriartortitsinermillu qularnaarisuussasoq. Aningaasaateqarfiup ataatsimoorussap sinneqartoorutaasa ilaat assersuutigalugu ilinniartitaanermut tunngatillugu sulianut atorneqarsinnaapput, naalagaaffeqatigiillu pingasuusut iluanni ilinniarsimassutsimik qaffassaasinnaasut, tassunga ilaallutik legatit nunani allani ilinniarnissamut Naalagaaffeqatigiinnerup iluani inuusuttunut atorneqarsinnaasut.
Aningaasaateqarfiulli ataatsimoorussap pingaarnertut anguniagarissavaa, Naalagaaffeqatigiinnerup iluani inuussutissarsiornerup tapersersornissaa inerisarnissaalu, tassami piumasaqaat unaasariaqarpoq, suliniutit Savalimmiunit, Danmarkimit Kalaallillu Nunaannit ataasiinnaanngitsumit peqataaffigineqarnissaat.
Aningaasaateqarfik aningaasaliinissamik pilersaarusiussaaq piffissaq ungasissoq isigalugu, ilaatigullu pisuussutit soorlu aatsitassat qaqutigoortut iluaqutigineqarnissaannut tunngasinnaallutik, suliniummilu periarfissaassaaq aatsitassat qaqutigoortut aningaasaqarneq kaaviiaartitsisoq atorlugu suliarineqarsinnaassasut, piiaaffiit imaarutereeraluarpataluunniit aningaasarsiorsinnaanngorlugu.
Takorluuisinnaaneq taamaallaat apeqqutaavoq, Aningaasaateqarfiup ataatsimoorussap qanoq iluaqutigineqarsinnaanera eqqarsaatigalugu.
Suleqatigiissitsisut kissaatigaat, Aningaasaateqarfiup ataatsimoorussap sinaakkutissai politikkikkut aalajangerneqassasut Inatsisartut, Lagtingip aamma Folketingip akornanni, Aningaasaateqarfiulli ataatsimoorussap suliai Nationalbankimit aqunneqassasut. Taamaalilluni Aningaasaateqarfiup ataatsimoorussap suliai politikkikkut parlamentini pingasuni akuerineqarsimasuunissaat qularnaarneqassaaq, ulluinnarnili suliarineqartut aningaasaateqarfimmi tamakkuninnga ilisimasaqartunit suliarineqartarlutik.
Aningaasaateqarfimmik ataatsimoorussamik pilersitsineq tassaassaaq Naalagaaffeqatigiinnerup iluani inuussutissarsiornermik ineriartortitsinissamik qularnaarisoq nunami ataasiinnaanngitsumi ineriartortitsinissaq aamma eqqarsaatigalugu.
Kalaallit Nunaata iluaqutigissaqaa taamatut Aningaasaateqarfimmik ataatsimoorussamik pilersitseqataanissani. Taamaalilluta annaasaqaratarsinnaagaluarluni aningaasat pissarsiarisinnaalissagatsigit, isumapiloqanngikkaluarluni Kalaallit Nunaanni Naalagaaffeqatigiinnermilu ineriartuutaasinnaasut. Aningaasaateqarfik ataatsimoorussaq aqqutigalugu ataatsimoortumik tapiissutit amerliartorunnaarnikut kingunipilui millisarsinnaavavut, Kalaallit Nunaannilu sanngiinnerit namminersulerniarnermut takorluukkat piviusorsiunngitsut kingunerinik akiliisinnagit, sulimi Namminersornermut inatsimmi namminiilivinnissaq anguniarneqarmat. Aningaasaateqarfiliorniarneq Kalaallit Nunaanni partiinit amerlasuunit taperserneqartariaqarpoq.