Siumup, Demokratit, Nunattalu Qitornaat aalisarnermut inatsimmik pilersitsinisartik sapersaatigikuttooriarlugu, isumaqassanngillat qaangiakalaaginnassallugu.
Kuannersuarni-aatsitassarsiorfissamik pilersaarut tuaviornerpaamik sannguereriikatappaat, qularnanngitsumik nalunngereerpaat aalisarneq ajalusuulersoq, taamaattumik aaatsitassarsiorneq saappaat kiisalu uranimik akulimmik aamma piiaasoqarsinnaanera isertitaqaatigerusutsappaat suliassaqarfiit tigooqqarusutatik akissaqarfigilerusullugit suliffissanik pilersitsiniaanertut isikkoqartilaaginnarlugu!
Qallikkut aaqqiiniapallannerpassuanngorlutik, iluminni pissaaneqarniunnerpassuit, qaleralittassanik pisassiissutaasartut, Inatsisartuni siulittaasuusup pisaaneqarnissaanut, qulakkeerinnissutigisaqattaarlugit, sunaaffami Henrik Fleischer´ip raajarniartuuneranut tunngassusigaq amerlanerussutillit peqqissuunissaat eqqarsaataananilu aalisarnerullu imminut qanoq akilersinnaasunngortinneqarsinnaanissaanut aamma tunngassuteqartinneqarani.
Nunatsinni inuussutissariutini pingaarnerpaaq politikerit imminnuinnaq eqqarsaatigisut pinnguartarfigiunnaartariaqarpaat. Piaarnerpaaq atorlugu unittariaqarpoq.
Piffissanngorpoq nutaanik isumassarsiornissaq: Aqutsiveqarfinnut qaleralittassiisarneq atuutilerniarli.
Taamaalisoqassappat Ilulissani immikkut aalisarfittaassagaluarput. Aalisartut piffinni allaneersut Iluliarmut aalisartarfiini aalisaqqusaajunnaassagaluarput, Ilulissanilu aalisartut pisassatik Uummanniarlutik Upernaviliarlutilluunniit aamma assiganik aalisaqqusaajunnaassagaluarlugit. Utaqqissaa aaqqissutaasinnaagaluarpoq taamallillutik imaallaat aalisakkat qallorneqarnissaminnut, pisariaqartinneqartoq malillugu, anginerulernissaminnut amerlinerunissaminnullu periarfissinneqassagaluarput.
Imaassinnaavoq aaqqiineq kippaarissutut isigineqassagaluartoq, kisianni tassa Avannaani aalisarnikkut ajalusooqqaneq iluarseqqinneqassappat misilinneqartariaqarluinnarpoq
Qaqugorsuarmut atuuttussanik killilersuuteqarniaannarluni killilersuiniarnerunngilaq. Anguniagaavormi, aalisarneq peqqissoq imminullu akilersinnaasoq, soorunalumi aalisakkat amerleqqippata, qaleralinniarnissamut ammaassisoqaqqissaaq, pisassiissutit qaffanneqaqqissammata ingerlalluartoqaqqilerpat. Nammineerlutaana aaqqissuteqarfiginiagassagut.
Aalisartut aalisarnerlu annaanniarniartigit, qaleralinniarnermik aseruinikut qanoq –ililluta isiginngitsuusaaginnarsinnaavagut. Ajorsartinniartigit. Qinersilerussi nutaanik periarfissarsiuinissaminnut sapiissusilinnik taasiniaritsi.
Saniatigut aamma sulissutigisariaqarparput aalisartut biologillu imminnut qanimut suleqatigiilernissaat, peqatigiillutik siunissami pisassiissutissatigut aaliangersaaqatigiittalersinnaanngorlugit, aaliangersimasumut piffissalersukkanik.
Louis (Looqi) Sigurdsen