Perorsaasut isumaginninnermilu perorsaasut, aamma isumaginninnermi ikiortut meeqqanillu paaqqinninnermi ikiortit akissarsiaat ajorpallaarput.
Sulisut taakku akissarsiaminnik inuussuteqarsinnaanngillat.
Taakku aamma Nunani Avannarlerni taamatut suliaqartut akissarsiaasa assigiinngissutaat qaammammut kr. 8.000 missaaniipput.
Tapersersuilluni oqaloqatiginnittarneq, attaveqarfiliortarneq ilinniarsimanngitsunullu sulinermik paarsilluartunut ilinniaqqilluni pikkorisarnerit, aamma perorsaasut sulisullu isumassuisut nuullutik tikittut tikilluaqqulluarnissaat amigaataagajuttarput
Akissarsialli aallartissutigeriartigit.
Oqaatigineqartutut akissarsiaat qaffarujussuarnikuupput, qaammammut 250 koruunit missaanni.
Taamatut annertutigisumik akersuutereerlutik, akerliussutsimik takutitseqattaareerlutik isumaqatigiinniaqattaareerlutillu
Qaffariaat soorlulusooq nualluni quersoriarneq sulisullu taakku suli anertuumik soriarsinnaajunnaartinneqarput. Taamatut sulinermiit qimarratoqarnissaa ilimagaarput.
Sulinertik pingaartinneqanngitsoq misigisimapput.
Meerartattalu iluarusunnatik inuunerannik paasinnittarnerat siusissukkut suliniuteqarnermi siullermeerluni illersuisarnermi pingaaruteqarpoq. Inersimasut suliartorniassammata meeqqat paarisarpaat. Uagullu suli makinngitsugut taamaaliortarput, meeqqat puigugaasut, meeqqat navianartumiittut paarisarpaat. Allanik isumalluutissaqanngitsut.
Siunissami atugarissaanissatsinni pingaarnerit paarisarpaat.
250 kr.-t naammanngillat, sulisullu taakku akissarsiamikkut nersorneqarluinnartariaqarput.
Corona ajornartoortitsimmat suliartortarput. Sulisut pingaaruteqartuupput nunatullu meeqqat iluarusunnatik inuusut ikilisinnissaannik, meeqqat innarlerneqartartut paasineqartarnissaannik ilinniarsimasullu procentinngorlugit amerlingaarnissaannik anguniagaqarnitsinni suli annertunerusumik!
Isumaginninnermi/perorsaanermi ilinniarsimasut suliaqarfimminni sulinerat tupinnartuunngilaq. Imminulli akilersinnaanngivissorpoq, taamaakkaluartorli suliartortarmata sapiitsuliortutut nersortariaqarpagut.
Qujanaq.
Kisianni inunnut tapiissutinik, saniatigut tiiminik allatulluunniit sulinikkut pissarsiaqaratik akissarsiminnik inuussuteqarsinnaanngitsunut akileraartarnermi suli paasiuminaannerusunik malittarisassiorluni ajugaasuusaarunnaarnissaq Inatsisartut pisussaaffigaat.
Ilinniartitsisut akissarsiaat qaffammata kikkut tamarmik aamma mianersoqqusipput. Tamanna tunngavissaqanngilaq, ilisimaneqartutut iluamik pisoqarpoq.
Perorsaasut maannakkut akissarsiamikkut qaffaavigineqartariaqarput.