Tamanna aamma ilinniartitaanermut isumaginninnermullu annertoorujussuarnik aningaasaliineq Kalaallit Nunaannik aningaasaqarnikkut imminut nappatitsilersinnaasunik Kalaallit Nunaata annertunerusumik pisuunnguutigissavaa.
Aningaasaqarnitta imminut atanissaa qulakkeerniarlugu ullumikkut ataatsimut tapiissutinik pisarpugut. Siumut, Demokraatit aamma Nunatta Qitornaata suliniutaat takulluarsaatit ilaatigut tassaasut sinerissami mittarfiit amerlanerusut pissutaallutik aningaasaarnerput ataqqarpianngilaq. Aningaasat suminngaaniissappat?
Isumaqarpugulli ineriartorneq tamarmi unikaallatsinneqassanngitsoq, soorunami inuussutissarsiutaalersunut ilinniagaalersunullu nutaanut, pingaartumillu takornariaqarnermut aningaasaliissaagut. Kisianni Siumut, Demokraatit aamma Nunatta Qitornaata iliornerannit inuit pingaarnerutinneqarnissaat isumatsialaanngila?
Inatsisartut meeqqat inuusuttullu navianartumiittut pitsaanerusumik illersorniarlugit sullinniarlugillu inatsisinik aalajangiisarput, soorlu innarluutillit pillugit inatsit pilersinneqarnikuusoq. Tunngavissaq pigaarput, kisianni inatsisit akuerineqarnikut piviusunngortissinnaajumallugit inunnik amigaateqarpugut.
Avataanit sulisussanik sukkasuumik pissarsisinnaaneq aallartinneqarli, meerartagut taamaalillutik meeqqerivinni, ulloq unnuarlu paaqqinnittarfinni meeqqallu atuarfianni eqqortumik isumassorneqarniassammata. Taamaalilluni utoqqaat, napparsimasut innarluutillillu innuttaasut pisinnaatitaaffigisaminik ilinniarsimasunit sullinneqarniassammata.
Illoqarfinni mikinerusuni mittarfinnut aningaasaliineq pisariaqartitsisunut assannik kissalaartunik amerlanerusunik kinguneqassanngilaq, akiitsoqarnerulernermik kinguneqassaaq. Asfaltinut aningaasaliinerit atugarissaarnermut aningaasaliinerunngillat, naak partiit qulaani taaneqartut salluliorlutik tamassumunnga aningaasaliineraaraluaraat. Atugarissaarnitsinnut aningaasaliissaqqaarlutik tamatigut uteqattaartarpaat, aatsaalli nunatta akissaqartilerpagu, kisianni kommunit mittarfiillu amerlinissaannik namminneq siunnersuuteqartarput? Tamakku imminnut atanngillat.
Iliuusissaq tassatuaavoq: Inatsisartunit anisissigit inuillu inuiaqatigiit peqqinnartumik ineriartornissaannik kissaateqartut qinersigit. Atugarissaarneq ilinniartitaanerlu salliutinneqarlik.
Louis (Looqi) Sigurdsen