Ulluni kingullerni Siumut marlunnik siunnersuuteqarpoq, taakku siunnersuutit immikkut tamarmik ersersippaat parti uippallerpasilersoq, qinersinissami aggersumi angusarisassamikkut pitsaavallaanngitsumik inissisimaratariaannaanertik takorluulersimarpasillugu.
Siullermik, siunnersuuteqalersaarlutik kalerriissuteqarput, naalakkersuinikkut aaqqissuussineq taasissutigitikkusullugu – Namminiilivinnermik kinguneqartinngikkaluarlugu. Taava ullumi qineqqusaarutigalugu siunnersuuteqarput, namminersorlutik oqartussat suliffeqarfiutaanni atorfilittat 2025 tikitsinnagu, tamakkerlutik kalaallisut oqalussinnaasuussasut…Kisiannigooq kalaallisut oqalussinnaanngitsortaqassagaluarpata. kinguneqartitsisoqassanani.
Ulluni makkunani, nunatta innuttaasa akornanniiipput qinersisartut, politikerinik qatsusseqqasut. Qatsusseqqanerinut siumukkormiut pisuupput, nuannaartoreqqusaarutaannarnik iliuuseqarfigilersaanngisaminnik imaqanngitsorsuarnik qineqqusaaruteqaqattaarnersui qasunaramik. Soorunami taama ersaritsigisumik siumukkormiut kalaallinik inuiaqatigiinnik aserorsaallutik avissaartuutsitsiniaannaavissut, uffa massa taamannak ersaritsigisoq, kialuunniit takusinnaagaa kikkunnguilluunnit tamaasa Kalaallit-Nunaanni inissaqartikkusukkigit
Kinaluunniit nunatsinni ineriartortitsinissakkut suleqataarusuttoq, tikilluaqquarput, kalaallisut oqalussinnaappat oqalussinnaanngippalluunniit. Tamaasa pisariaqartippagut. Nappaassuarmik kræftimik eqqugaasimasoq kinaluunniit pilanneqassappat kialunniit aqqusinermiik isiinnarluni pilassinnaanngilaa, suliarinnissinnaasutuaavoq pilaasartoq ilinniarsimasoq.Soormi Siumut kussiniliorunnaarluni, qinersisartugut nassuiaatiinnarunikkit, ukiuni 40´nilu 30´nilu Isumaginninnerup- Peqqinnissaqarnerullu iluini akisussaaffimmissut tigumminikuusatik, sooq taama ingerlanerliortigineri nassuiaallugillu sooq innuttagut sanngiinnerit ima inisseqqalersimanersut, allaat ikiorneqarnissavimmissut, ikiorneqarsinnaasaratik.
Suleqatigiissitsisut sullisigaat Kalaallit-Nunaat, sulisinnaasunik kikkunnilluunniit inissaqartitsisoq, nunamik ineriartortitserusunnermik kissaatillit. Uagutsinnut ersarissorujussuuvoq, nunatsinni ineriartortissinnaasassaraluagut tamakkersinnaanaviaratigit inunnik avataaneersunik ikiorneqanngikkutta, Kalaallit-Nunaanni inuunngorsimanatillu peroriartorsimanngikkaluanik.
Suleqatigiissitsisut, inuiaqatigiinni sanngiinnersatta, sallunaveeqqutitut tigusarineqariarlutik, Nunatta namminiilivinnissaanik, takorluukkani sammiveqaratillu piviusorpalaanngitsuni, atorneqarneri akuersaarsinnaanngilagut. Nunatsinni atugarliuuteqarnerpaat kiisa ukiut 40´ngorpaat piitsuunerpaajujuaannarlutik, soorluuna erinitsaatissagaat torersumik nalilimmillu inuuneqalernissartik.
Suleqatigiissitsisut pimoorullugu suliniutigerusuppaat, Naalagaaffeqatigiit akunnerminni ineriartortitseqatigiinngortinnissaat, immitsinnut pitsinnik nuannersunik tunioraalluta avitseqatigiillutalu, Siumup angunigaatuunani, periusaasa takutitaatuunani, avissaariartuaartussatut pinnani.
Kalaallit-nunatta namminiilivinnissaanut tunngatillugu, Siumup matu ammareersoq ammarniarsaralugu isimmikarpaa. Namminersorneq pillugu inatsit tunngavileereernikuuvoq aqutsiveqarfinnik tigooqqaasinnaasugut Nammineersutigilernerilu kalerriutigiinnartartussaallutigit. Soorluuna kalaallinut qinersisartunut uppernarnerulaassagaluartoq, suliniutit tigussaasunngorlugit uppernarsarneqartarsinnaasuuppata, ilumut tigooqqakkagut sapernagit ingerlassinnaallugit aallukkigut.
Taamaalisarniaraluarutta Siumut ajornartoorujussuassagaluarpoq.
Ukiummi qassersuit,partiip taassuma Nunatsinni pissaaneq tigummigamikku?
Soorluun sanngiinnersatta pilliutigineqarlutik, Siumup Savalimmiumik Qallunaallu-nunaannik narruginninnerannut, akiliisuunerat naammalissagaluartoq.
Kalaallit nunatsinni qineqqusaarutaannarnik nerisaqarniaraluarutta perlertussaavugut!
Sullisileriarluta ataatsimut anguniagalersorniarta, ingerlatsiviit akisussaaffigeriikkatta iluini piviusunngortissinnaasassatsinnik, sanngiinnersagut ataqqinartumik toqqissisimasumillu inuuneqalernissaannik qulakkeerinnittussanik.
Tillie Martinussen