Suliamut attuumassuteqarpallaarneq qanoq isumaqarpa aamma Kim Kielsenip eqqartuussissusilerisumut naalakkersuisoqarfiata nammineq toqqagaanut paasissutissanik tunniussiumannginnera paasissutissanullu Inatsisartut tunniussinnginnera ilungersunartuuppat?
Oqaatsit paatsuugassaanngitsut inuiannaallu paasisinnaasaannik oqaatigeriatigu:
Nipisannik pisassiissutit pillugit suliaq ilaatigut Kim Kielsenip angallataanut nipisanniartumit attartortitaanit aalisarneqartussat – peqatigitillugulu angallataa sumiiffimmi nipisannik pisassiissutinik qaffaanermik aalajangeeqataaffigisaani aalisartussaalluni, pisoq nuanningitsuuvoq.
Kim Kielsenip suliamut attuumassuteqarpallaarnini nunap siuttuatut ilisimasariaqaraluarpaa.
Suliaq ilungersunarnerulerpoq Naalakkersuisut paasissutissanik tamanik Inatsisartunut tunniussinngimmata. Inatsisartut nunatsinni oqartussat qullersaraat. Tassa tamat oqartussaaqataaneranni Inatsisartunit qaffasinnerusumik inissisimapput.
Qinigaanerannut pissutaavoq. Tassa innuttaasunut sinniisussatut innuttaasunit qinerneqarput.
Tamat oqartussaaqataanerat aqutseriaasiuvoq qinersisartut sinniisussaminnik tatigisinnaallugit isumaqarfigisaminnik soqutigisaminnillu aallussisussaasunik qinersisarnerannik tunngaveqartoq. Tassa tamat oqartussaaqataanerat innuttaasut aqutsineraat.
Maannakkut nunap siulittaasua nammineerluni suliamut attuumassuteqarpallaarnikuuneratigut pisumi nuannginngitsumiipput.
Kisianni suliamut qanippallaarneq qanoq isumaqarpa?
Ataatsimut oqaatigalugu isumaqarpoq inuup pissaanillip aalajangiisartup imminut allanulluunniit iluaqutissarsisitsinera. Taamaammat suliat taamaattut ilungersunartutut isigineqartarput.
Pissutaarpiarpoq politikkikkut ingerlatsinerup innuttaasunut iluaqutaasussaanera imaanngitsoq politikerit nunap pisuussutai atorlugit imminnut pissarsisitsissasut.
Imminut, ilaquttanut qaninnernut, nammineq suliffeqarfigisamut assersuutigalugulu suliffeqarfimmik qinikkatut piginneqataaffigisamut iluaqutaasussamik nammineq aalajangeeqataannginnissaq tamanut paasinarluarpoq
Tamanna suliamut attuumassuteqarpallarneruvoq
Taammat qulaaniittoq pineqartillugu aalajangiisoqartussaatillugu anisoqartarpoq, taamaalillunilu suliap inernissaa sunneeqataaffigisinnaanagu.
Uani ajoraluartumik taamatut pisoqarnikuunngilaq.
Aamma ilungersunartorujussuuvoq Naalakkersuisut nunap oqartussaanut qullerpaanut paasissutissanik tunniussinnginnerat: Inatsisartut ataatsimiititaliaannut taamaalillunilu Inatisartunut ilaasortanut.
Inatsisartut Kukkunersiuinermut Ataatsimiititaliaat Naalakkersuisunik nakkutiginnittussaavoq aalajangiisinnaananili, innuttaasulli sullillugit paasiniaasussalluni. Tamanna suliassaraat.
Tamat oqartussaaqataanerat nunani kiffaanngissuseqartuni tamallu oqartussaaqataaffianni taamaatut aaqqissugaavoq.
Taamaammat – kina pissaaneqarnersoq apeqqutaatinnagu – ataatsimiititaliap paasissutissanik Naalakkesuisunit qinnutigisaannik tamanik pissarsinissaat pingaaruteqartorujussuuvoq.
Taamaammat suliaq ilungersunaqaaq.
Allaaserinninneq: Naalakkersuisut Inatsisartunit qanoq toqqarneqartarnerat pillugu nassuiaat:
Inatsisartut nunami qullersaallutik oqartussaapput. Tassa tamat oqartussaaqataaneranni Naalakkersuisunit qulliunerullutik inissisimapput.
Tamassumunnga pissutaavoq qinigaagamik. Tassa innuttaasut qinigaat; innuttaasunut sinniisussatut. Tatigineqaatitut suliassaavoq
Tamat oqartussaaqataanerat aqutseriaasiuvoq qinersisartut sinniisussaminnik tatigisinnaallugit isumaqarfigisaminnik soqutigisaminnillu aallussisussaasunik qinersisarnerannik tunngaveqartoq. Tassa tamat oqartussaaqataanerat innuttaasut aqutsineraat.
Aammalumi Naalakkersuisunut ilaasortat Inatisartunit toqqarneqartarput.
Naalakkersuisoqatigiit partiilluunniit tapersuisuusut pillugit isumaqatigiissuteqartoqartarpoq – taamaaliornikkut partii ataaseq – partii amerlanerpaanik ilaasortaateqarajuttoq – amerlanerussuteqartoq Naalkkersuisunut siulittaasuutitaqartarpoq, isumaqatigiissutigineqartarporlu siunnersuutit saqqummiunneqartut pillugit naalakkersuisoqatigiit ataatsimut taasisarnissaat aamma isumaqataassutaasarpoq.
Tamarmik taasinngippata imaanngilaq Naalkkersuisut siunnersuutit pillugit amerlanerussuteqartitsilersut, piffissamilu qinigaaffimmi uani Demokraatit taasinermut tunngatillugu oqartussaasorujussuunikuupput.
Amerlanerussuteqartunik periuseqarneq kikkut pissaaneqarnerat isumaqatigiinnissinnaatitaanerallu apeqqutaatinnagu soorunami atuuppoq.
Taamaammat oqaatigineqarsinnaavoq; ”16-inut kisitsisinnaasariaqarpoq”, tassa Inersuarmi taasinerit 31-nit 16-it.
Tassa partiit naalakkersuisoqatigit suleqatigiinnissamik isumaqatigissuteqartarput, taamaalillutillu assersuutigalugu Kim Kielsenimut Naalakkersuisullu siunnersuutaannut taamanut tunuliaqutitut taasisinnaajumalluni Naalakkersuisunut ilaasortassat isumaqatigiinniutigineqartarlutik.
Naalakkersuisut pisunik isumaqatigiissuteqarsinnaagunik aamma ingerlaannarniassammata.
Amerlanerussuteqartut taasinngippata Naalakkersuisoqarnavianngilaq.
Taamatut pisariunngitsigaaq.
Ilaatigut Naalakkersuisut ikinnerussuteqarlutik ingerlatsinissaat toqqarneqartarpoq. Tamanna piffissap qinigaaffiusup aallartinnerani pivoq, tassani Siumut, Partii Naleraq, Atassut aamma Nunatta Qitornai naalakkersuisuutitaqarput, Demokraatit inersuarmi taasinngippata Naalakkersuisunik pilersitsisinnaasoqarnavianngilaq.
Atassut aamma Partii naleraq piffissap ingerlanerani tunuarput, amerlanerussuteqaqqalaarnerli Naalakkersuisut, suli Kielsenimit aqunneqartut, Demokraatit taasinerannit qulakkeerneqarpoq.
Taamaammat Naalakkersuisunut ilaasortamut ataatsimut ”tatiginnikkunnaartoqartillugu” Inatsisartuni amerlanerussuteqartut Naalakkesuisunut sulianillu aqutsinerannik suli tatiginninnerlutik taasissutisigisarpaat.
Naalakkersuisunut tatiginnikkunnaartoqartillugu qaqugukkut tatiginnikkunnaartoqarsinnaanersoq sunalu tunngavilersuutigalugu aamma Naalakkersuisut inatsisit atuuttut ilaannnik unioqqutitsisimanersut aalajangersimasunik malittarisassaqarpoq.
Inatsisartut quppersagaanni ina.gl-imi tamanit pissarsiarineqarsinnaasumi imaluunniit naalakkersuisut akisussaaffeqarnerat pillugu inatsit pillugut Inatsisartut Naalakkesuisullu pillugit inatsit inatsisit.gl-imi annertunerusumik atuarsinnaavutit.