Meeqqanik kinguaassiuutitigut atornerluisarneq ukiuni kingullerni qujanartumik isiginiarneqarnerulernikuuvoq. Innuttaasut suaartalernikuupput ikiuisoqartalerporlu.
Suleqatigiissitsisuni uagut suliaq ukiut arlallit qaangiuttut pinikoq pillugu ilisimatinneqarnikuuvugut, tassani nunaqarfimmi avinngarusimasumi meeraaqqanik kinguaassiuutitigut annertuumik atornerluisoqarsimanera paasineqarnikuulluni. Nakorsap pisarnertut tikeraarnerani paasinarsivoq nunarfimmi meeqqa tamarluinnangajammik, meeraaqqaniit tallimanik ukiullit tikillugit, kinguaassiutitigut nappaatinik tunillanneqarsimasut. Nappaatit inunngornermi tunillaanerunngitsut!
Isumaginninnermut aqutsisoqarfik, peqqissutsimut aqutsisoqarfik aamma Kommuneqarfik Sermesuumi politikkikkut akisussaasut atornerluineq pillugu arlaleriarlutik ilisimatinneqarnikuupput, ullumikkulli, ukiut arlallit qaanngiuttut, iliuuseqartoqarnikuunngilaq.
Tamanna meeqqanut nunaqarfimmi avinngarusimasuniittunut piviusuuvoq kingunerlutsitsisoq; kinguaassiuutitigut annertuumik atornerluinaq, kinguaassiuutitigut nappaatit pinngitsaaliinikkut tunillaanerusut, tarnikkut timikkullu ikilerneqarneq, toqqissisimannginneq qaqugu taamatut pisoqaqqinnissaanik annilaanganeq. Iliuuseqartoqanngilarlil!
Ajoraluartumik ilisimalluarparput kingunerluutit katsorsarneqanngitsut inummut qanoq kinguneqartitsinnaanersut… ajornerpaaffiani imminut toqunnermik kinguneqarsinnaasut. Meeraq ikiorneqarnissamik suaartartoq pimoorunneqanngitsorli, naggataatigut tunniutiinnartarpoq pitsaanerusumillu inuuneqalernissaq upperiunnaartarlugu.
Annertusisamik ikiusoqalernissaanik poitikerit akisussaasut isumaginninnissaat takkutigeqqinnaassavarput. Ikiorneqarnissamik pisariaqartitsisunut TAMANUT. Kissaatigaarput iliuutsinik nutaanik nangitseqqiinertut ikiuisoqarnerussasoq, pisariaqartitsineq annertuvoq.