27 procentit angerlarsimaffimmi nakuuserfigineqarsimaneq oqaatigaat, 37 procentit angerlarsimaffimminni imigassartortoqarpallaartarnera oqaatigaat, kinguaassiuutitigut innarliinerit amerlavallaarujussurput, amerlasuut tamakku saniatigut hashimik atornerluisuupput.
Taakku tassa ajornartorsiutit ilisimaneqartut pillugit killiffik kingulleq, ilassutigisinnaavarpullu paasineqanngvitsut, qanga pisartunit taakkunannga kingulerluutit amerlanerujussuusut.
Imminut toqoriartarnerit, pisortat siusissukkut suliniuteqartarnerannik ajornartorsiuteqarneq aamma ilisimaneqarluarput.
Politiit, isumaginninnermi siunnersortit, palasit inuillu allat oqartussat isumassuisullu ikiorneqarnerunissamik atorfissaqartitsinikuupput.
Inissiivissat pitsaaliuillunilu suliniutit amigaataasut.
Asaffiup eqqaani tulleriiaattoqarpoq.
Politikkikkut ikiuisoqarnissaa ullumikkut piumasaqaataajuarpoq, aatsaalli ajunaarnersuartut ittup annertussusia toqqortorunnaarsinnaakujunnaaraanni. Taava naalakkersuisoqatigiinni partiit namminneq assigiinngitsorpassuarnik siunnersuuteqarput.
Soorlulusooq pissaaneqarsimanatik ajornartorsiutillu taakku ukiut qulikkaat suaartaatigineqarnerisa kingorna namminneq siunnersuutitik nassaaripallatatik ingerlanniarsarilertarlugit.
Piumassuseqarsimagunillu ukiorpassuarni kingullerni iliuuseqarfigisinnaasimasaraluatik. Aammami piffissami qinigaaffimmi uani.
Naalakkersuisoqatigiit innuttaasunik illersuisutut imminnut saqqummersinniarsaralutik pisunik aqutsinialeraangata suliakkiissutillu iliuuseqarfiginikuunngisatik toqqortorniarsarigaangatigit innuttaasut imaaliinnaq uukapaatitassaanngillat.
Akerliorsutsimik takutitsinerit tusaajumaneqanngitsut tamatta eqqaamavagut.
Naalakkersuisoqatigiit inatsisissatut siunnersuutikkut ikiorneqarnissamik qinnuiviginninnissamik peqquneqarput.
Naalakkersuisoqatigiit naalakkersuisumut allattaanikumit, inersimasunit kingunerlutitsisunit pakatsisunit, meeqqat pillugit piumassutsikkut kattuffinnit, innuttaasunit Facebookimi, suliaqartut kattuffiinit aqqusinermi akerliussutsimik takutitsinikkut tusagassiuutitigut annertuumik isornartorsiorneqarput ikiorneqarnissamillu qinnuiviginninnissamik peqquneqarlutik.
MIO – Meeqqat Pisinnaatitaaffiinut Sullissivik ukiorpassuarni suaartarnikuuvoq, suaartaatiginikuusarput ”kinguaassiuutitigut innarliinerit oqallisigeqquneqannginnerat unitsilli” – inuit ikiorpassuarni oqallisiginikuusaat.
Perorsaasut, peqqissaanermik suliaqartut, isumaginninnermi peqqissaanermilu assistentit, ilinniartitsisut, nalunaarusiat tulleriiaaginnavissut, TV-mi aallakaatitassiat soorlu Tasiilamiit, ilaatigut ajornartorsiuterujussuaq taartumit taarnerusoq uparuartarpaat; tassa ukiorpassuarni kingullerni kinguaassiuutitigut innarliisarnerit.
Aammattaaq nakuusertarneq. Navianartumiinneq. Angerlarsimaffeqannginneq. Meeqqat atuarfiat.
Aatsaalli innuttaasut kimigiisernerisigut, amerlaqisunik allaaserinnittoqartarneratigut maannakkullu Danmarkimit ikiuinikkut pisoqalerpoq
Inatsisissatut siunnersuut akuerineqareermat.
Aatsaat iliuuseqartoqalerpoq inatsiliortoqarmat, inatsit POLITIKERIT iliuuseqarnissaannik pinngitsaaliiffiusoq.
Maannakkullu ”oqaluttuamik piginnittuulerniarsaripput”.
Tamanna kimikippallaarpoq. Nammineq iliuuseqarnissaat nakkutigeqqinnaartariaqarparput. Danmarkip atorfillillu pissusissamisoortumik iliuuseqarnissaannik peqquinnarnagit.
Aningaasat Danmarkimeersut, nammineq annertuumik aningaasaliinissamik kissaateqartoqarani.
Asasakka inoqatikka, puigornagu namminneq aningaasaatitik atorlugit tamakku tamaasa ingerlassinnaanikuugaluarpaat, namminneq pingaarnersiuinermkkut, siusinnerungaartukkut.
Qujanartumik suliaq KIISAMI aallartippoq.
Innuttaasulli tamanna nersornaatigaat, naalakkersuisoqatigiinni qinigaanngitsut.
Danmarki peqatigalugu suliaqartussanngortinneqarneq takkulluni oqarniarneq amerlanerusunik suliniuteqarnissaq sulissutigineqartoq tunngavia paasiuminarpallaalaarpoq.
Demokraatit, Nunatta Qitornai Siumullu tamassuma iliuuseqarfigineqanngissaanik ukiorpassuarni kingullerni aalajangertarnikuupput.
Qinigaffimmi uani, S aamma D tamassuma ingerlanneqarnissaat, aningaasanik immikkoortitsisoqassasoq suliniutinillu aallartitsineqassasut aalajangersinnaanikuugaluarput. Namminneq suliniuteqarnermikkut.
Aatsaalli taamatut pinngitsaaliisumik Inatsisartuni inatsisissatut siunnersuuteqartoqarmat.
Neriuniarta aappilleqqasut, isumaginninnerlu siunissami pimooritissagaat.
Uagut Inersuarmi tamassuminnga sorsuutiginninnikut ilisimavarput oqaluttarnerni pinerusaraat pissaanerminnik tigumminniinnarnissaq, aqutsinissaq, suleqatinik innuttaasunillu nakkarsaaneq ataatsimullu isigalugu taarsiisarnerit kusanaatsiliornerillu peqarnikuupput, meeqqat inuusuttullu atugarissaarnissaat pinnagu.
Maannakkulli pingaarnersiuisoqalernera tusarluarnartuuvoq. Danmarkimiillu immikkut iliuuseqartoqarnissaa piumasarineqarpoq.
Pinngitsaaleqqaarneqarneqartariaqalernikuuppulli.
Uagullu taakku angerlaqataannik suli aningaasaliisoqanngilaq.
Partiti taakkorpiaat namminiilivinnissaq naalagaaffeqatigiikkunnaarnissarlu akulikitsuararsuarmik suaartaatigisarpaat.
Inuuttaasut tamanna soorunami eqqaamavaat.
Qanorlu iliornersusi nakkutigeqqinnaarlugu.
Nammineq meerartartinnut aningaasanik nassaarnissarsi ataqqinaatigissagaluarparsi.
Soorlu Danmarki taamaaliortoq.
Qujallusilu.
Innuttaasut nikallujuinnerannik Danmarkillu matuminik ammatitsineranik.