Nunatsinni politikerit tamarmiusut meeqqanut inuusuttunullu kinguaassiuutitigut innarliinerit pillugit eqiilerpasipput. Ukiorpassuarni taamatut pisoqartarnikuuvoq ilisimaneqartariaqaraluarlunilu.
Taamaakkaluartoq aningaasat 80 mio.kr. Danmarkimit immikkoortumut tunniunneqartut nammineq naleqqussanngilagut.
Politikerertatta sunik pingaarnersiuinerat ajoraluartumik ersarissorujussuuvoq.
Danmarki ikiuivoq, taamatullu qinnuiginninnissaq Inatsartut siorna isumaqatigiissutigaat. Ikiorneqqarnissamik qinnuiviginninnginnitsinni inatsisissatut siunnersuusiortoqartariaqarnikuuvoq! Tamanna pillugu oqallittoqartorujussuuvoq arlallillu itigartitsingajapput.
Inersuarmi uteqattaartuarparput immikkut 80 mio.kr-t amerlaqataannik nammineq aningaasaliissasugut.
Akisussaassuseqarnermik nammineq takutitsiniarluta.
Aamma sulisunik meeqqanik inuusuttunillu suliaqartunik immikkut ikiuisussanik qinnuiviginninnissamut aamma politiit pingaartumik nunaqarfinni amerlanerusunik suliniuteqarnissaannik, pitsaaliuinermi atortunik, pinerluffigineqartunut ilaqutaannullu ikiuineq innarliisunullu inuiaqatigiinnut uterteqqinniarlugit suliniutit katsorsaanissarlu siunertaralugu pineqaatissiinerit sivisunerusut.
Taamatuttaaq inissiinissamut periarfissat, politiit, ilaqutariinnut suliniutit, suliaqatigiillu taamaalilluni innarliisoqarnersimanerata paasineqarnerata kingorna tiimit 24-t qaanngiutinnagit ikiuisoqartarniassammat.
Innarliinerit tamaasa eqqarsaatigalugit, kinguaassiutitiguinnaanngitsoq.
Danmarki qujanartumik maannakkut ikiuivoq, naalli aningaasat sinneri amerlaqataannik nammineerluta aningaasaliissutissagut?
Sooq Aningaasanut inatsimmi takusinnaanngilagut?
Nammineerluta suliniutigut naak, oqaasiinnartiguunngitsoq?
Kinguaassiuutitigut innarliinerit inuit inuuneranni amerlaqisunik aseruisarput, inuunerup sinnerani.
Suliniuteqarfinni siullersaasariaqarpoq.
Nalunaarutigineqartartut amerliartortut tusarlugu nuannaraarput, naak tunuliaqutaa nikallornaraluartoq alianaraluartorlu.
Tassami paasineqanngitsut amerlaqaat.
Tamanna nalunaarutit tamarmik takutippaat.
Taava maanga killippugut. Suliaq kiisami aallartippoq (!!), arriitsumik.
Uippallertoqarnera ammasumik tusarparput… Qasulernarpoq.
Ajunaarnersuartut ittoq saannguatsinni pisoq ilisimasimanngikkaanni pisunik malinnaasoqarsimassanngilaq. Ukiorpassuarni.
Naak piumassuseqarnerput? Naak pingaarnersiuinerput?
Arriitsumik paasinnittartut uteqqilaarlara_
Danmarki tamatigut naveerneqartaraluartoq Danmarkip ikiuerusussuseqarneranik iluatsitsinitsigut aningaasaliissutaasa uagut nammineq aningaasaliissutigut naak?
Uagut politikeritut nammineq akisussaassutsimik takutitsinngikkutta inuiaqatigiit akisussaassutsimik takutitsinissaannik qanoq ilimasuuteqarsinnaavugut?
Salliutillugu Danmarkip ikiuilluni aningaasaliissutaasa amerlaqataannik aningaasaliinikkut?
Ilanngaasivik 230-250 mio. kr.-nik akeqarpoq
Mittarfiliornerit 3,6 milliartinik akeqarput.
3.5 milliarder koruuninut nutaanik erngup nukissiorfiliornissamik kissaateqartoqarpoq.
Innuttaasut ukiuni marlussunni kingullerni akitsuutitigut aallerfigineqarput.
Suliffeqarfiit Namminersorlutik Oqartussat pigisaat pissarsianik akiliutaat, suliffiit ataasiakkaat ukiuni pingasuni-sisamani kingullerni 80 aamma 150 mio. kr.-t akornanniittut mittarfinnut aningaasaateqarfimmut toqqaannartumik tuttarput.
Tassa pingaarnersiuinissaq kissaatigigaanni immikkut 80 mio.kr-t aallerfissat naammapput.
Meerartagut inuusuttortagullu paarineqanngitsunik uagut qinikkatut paarinnissatsinnik pingaarnerusunik suliassaqanngilaq.
Allanik pingaarnerusoqanngilaq.