Inatsisartut suleriaasianni § 37, imm. 1 naapertorlugu Naalakkersuisunut imatut apeqquteqarpunga:


Naalakkersuisunut apeqqutit:

1. Inuit innarluutillit pillugit inatsisip akuerineqaqqammersup tamakkiisumik atuutilersinneqarnera Naalakkersuisut qanoq malinnaavigitigaat?

2. Inuit innarluutilli pillugit inatsimmi assigiinngisitsineq pillugu aalajangersakkat ilinniartitaanermi qanoq atuutilersinneqavippat?

3. Inatsimmi aalajangersakkat malillugit pissusissamissoortumik siuariartortoqarnersoq Naalakkersuisut qanoq nakkutigaat, assersuutigalugu innuttaasunut inatsit malillugu taperserneqarsinnaatitaasunut iliuusissatut pilersaarutit, ineriartortitsinissamut pilersaarutit, killiffik pillugu nalunaarusiat il. il. suliarineqartarnersut nutarterneqartarnersullu?

4. Inui innarluuteqarnerannik imaluunniit tarnikkut timikkulluunniit ineriartornermik ajornartorsiuteqartut suli suussusiliiffigineqanngitsut misissorneqarnissaat misissorneqarnissaannullu qanoq iliussanersut Naalakkersuisut qanoq qulaakkeertarpaat?

5. Inatsimmi kapitali 5 malillugu pitsaassusilimmik siunnersorneqarsinnaatitsineq Naalakkersuisut qanoq tapersersorpaat ajornannginnerulersippaalluunniit?

6. Kommunit inatsimmik atuinerat Naalakkersuisut qanoq nakkutigilersaarpaat?

7. Inunnut innarluutilinnut inissaqartitsisumik suliffeqarnissap tapersersornissaanut Naalakkersuisut pilersaaruteqarpat Naalakkersuisullu suliniuteqarfimmut tassunga nutaamik pilersaarusiornissamik periusissiornissamillu pilersaaruteqarpat?

8. Isumaginninnermi siunnersortinut ikiuutitut aningaasanik amerlanerusunik, inunnut ikorfartuisunut, atortunut ikiuutinut suliaqarfinnulluunniit taakkunannga agguaasinnaasunut aningaasanik amerlanerusunik immikkoortoritsisoqarnikuua, tamassuminngaluunniit pilersaaruteqartoqarpa?

9. Inuit innarluutillit pillugit inatsisip atuutilersinneqarneranut tunngasunik Naalakkersuisut allanik ilisimatitsissuteqarsinnaappat?
(Inatsisartunut ilaasortaq Tillie Martinussen, Suleqatigiissitsisut)

Tunngavilersuut:
Qularutissaanngilaq inuit innarluutillit pillugit inatsimmik siorna akuerisatsinnik pisariaqartitsisoqartoq. Kommunit, ineqarfiit aamma Namminersorlutik Oqartussat taassuminnga tamakkiisumik pitsaamillut atuutilersitsineq qulakkeerniarlugu allannguinissamut soorunami ilaatigut piffissaqassapput. Suleqatigiissitsisut nappaataannik annikitsunik suussusiligassaqarsinnaasoq aamma katsorsarniarlugit iliuuseqarfiginiarlugillu aamma tapersersorniarlugit aamma aqqutissaannik nassaartoqartariaraqarnera soorunami ilisimavaat.

Taammaluartoq inatsisip tamaassuma tamakkiisumik atuutilersinneqarnissaa siunertaasutullu tapersiisoqarnissa, ikuisoqarnissaa, siunnersuisoqarnissaa ilitsersuisoqarnissaalu pingaartittorujussuugut.

Taamaammat taamatut apeqquteqarpugut.

Ilinniartitaanermi inatsisip taassuma atuutilersinneqarnisssaanik aamma suliassaqartorujjuussuuvugut. Kisitsisinik ilisarinnissinnaanngitsut, naqinnernik ilisarinnissaanngitsut inuillu ineriartornermikkut akornutilli, autismeqartut tarnikkulluunniit nappaasteqartut il.il. ilinniagaqarniarlutik paasineqarniarlutillu akersuupput. Suliffeqarfinni aamma ilisimasaqarnerup paasissutissiisarnerullu qaffassarnissaannik pisariaqartitsisoqarpoq.

Inatsit akuerineqareerpoq, maannakkullu taanna aaqqissuutiginneqartariaqarpoq.

Atuutilersitsinerup ilutsinnissaanut aamma suliassanik suliarinnittarnermut atortunullu ikiuutinut aningaasanik qulaakkeerinnissamik Naalakkersuisut pitsaasumik iliuuseqarnersut ilisimassallugu uagutsinnut pingaaruteqarpoq

Naggataatigut, minnerunngitsumilli, nakkutilliisoqarnissaa uagutsinnut pingaaruteqarpoq, taamaaliluni immikkoortut ikiorneqarnissamik amigaateqartut aaqqiivigineqarniassammata ammaalu paasissutissanik, atuutilersitsinermi ajornartorsiutillu pillugit ilisimasanik il.il. katersuinissap isumaginissaaa pingaaruteqarpoq, taamaalilluni immikkoortut taakku ingerlaavartumik aaqqiivigineqartarniassammata.