Una eqqarsaatigilaaruk: Nunaqarfimmi kisimiillutit meeqqanut ikiortaavutit, paasivat meeraq ataaseq iluaalliorluni inusoq ernumanerillu pillugu kommunimut nalunaaruteqarnissaq pisussaaffigaat. Nunaqarfeeqqamili najugaqarputit, immaqa meeqqap ilaqutai ilisarisimavatit. Tamanna qanoq iliuuseqarfigissaviuk?
Imaluunniit: Nuummi meeraaqqanut meeqqanullu paaqqinnittarfimmi angisuumi sulivutit. Meeqqat pisariaqartitaat iliuuseqarfiginiarlugit sulinissassinnut ikippallaarnersi aqutsisutut ernumassutigivat. Tallimanik sulisoqarnissamut akuerisaavusi, immaqali sulisut aalajangersimasut marluinnaavusi ilaatigullu sulisartunik marlunnik taartaasartoqarpoq. Ilisimavat ingerlatsinerup ullormiit ullormut qulakkeerneqarnissaa kisiat iliuuseqarfigilaaginnarsinnaallugu, tarnikkullu nukissaarupputit – kisinnili suliffivit suleqativillu qimannissaat annilaangagivat – illeqanngippammi qanoq iliussappat? Suliffinni TAAMATUT toqqaasoqartoqartariaqartarpoq.
Tapersersuilluartoqarnissaa taakkunani pisariaqartinneqartorujussuuvoq
Perorsaasut, isumaginninnermi perorsaasut, meeqqanut ikiortit allallu meeqqatsinnik ullumikkut suliaqartut – aamma ulloq unnuarlu paaqqinnittarfinni aammalu meeqqanik inuusuttunillu navianartumiittunik suliaqartut, tarnikkut atugassaritinneqartut ajornakusoortut iliuuseqarfiginissaannut ikiortissaaleqigajuttarput.
Ajortorujussuarmim aningaasarsiaqareerput, neriuppugullu partiit naalakkersuisooqatigiit neriorsuisimanermittut tamanna pitsanngorujussuartinnialersaaraat.
Sulisulli taakku meeqqatsinnik inuusuttortatsinnillu ulluinnarni sulisut aamma ajornakusoortorparujussuanik toqqaasariaqartarput atugaqarlutillu, tassunga ilanngullugu pingaartumik meeqqanik inuusuttunillu navianartumiittuni ajortumillu ingerlaleriaannaasunik suliaqarnermi.
Paaqqinnittarfiit tamarmik inissiiviillu tamarmik soorunami sapinngisaminnik sulisarput, perorsaasunik allanillu ilinniagaqartitsiniarlutik, ilinniaqqitsitsiniarlutik ikiuiniarlutillu. Taamatulli sulinerminni ikiorneqartariaqarput. Ilaatigut pisuni ajornartorsiorfiusunik oqaloqateqarnissamik periarfissaqarnermik. Ulluinnarnilu tapersersorneqarnissamik.
Kommunip psykologinik sulisussarsisinnaanersoq apeqqutaassanngilaq. Sumiginnarneqanngisaannassapput. Sumiginnaraanni nukissaarutissapput, taamaaliornikkullu sulisut inuillu naleqarluartut annaassavagut. Meeqqat ukiuanni immikkoortut taakku aamma isiginiarneqartariaqarput.
Sulisutsinnut sallernut perorsaasunut suleqataannullu atugassaritinniartut pitsanngortinnissaasa ilaatut tamakkuninnga pissarsisinnaanissat qulakkeertariaqarparput.
Kissaatigaarput inuit perorsaasutut ilinniassasut, kisiannili akissarsiat pissutsillu ajornakusoortut iliuuseqarfiginissaannut periarfissat pisoqalisorujussuanngornikuupput.
Pissutsit imaapput perorsaasut, isumaginninnermi perorsaasut sulisullu taamatut sulisut ”salliunermikkut” tassaagajuttut atugarliortoqarneranik, kinguaassiuutitigut innarliinernut takussutissanik, ilaqutariinnilu perlilertunik paasisaqartuugajuttarput. Peqqissaanermi sulisut politiillu peqatigalugit.
Meeqqagut paarisarpaat, kaammattortarpaat periusissianilu tamani politikkikkut atuutilersitatsinni qitiulluinnartarput. Suli atualinngitsunik sulinermi, inissiisarnermi, innarluutilinnik suliaqarnermi nalginnaasumillu meeqqanik paarsinerup avataani, taamaammat ilinniarsimasut ilinniarsimanngitsullu taakku siunissatta sapinngisamik pitsaanerpaajutinnissaani qulakkeerinnittuupput.
Taamaakkaluartoq taakkununnga iluaqutaasussamik pitsaasunillu atugassaqartinnissaannut qulakkeerinnissutaasussanik periuseqatsitsisoqarnissaa utaqqivarput. Sulisunut sulilluartunut sulisunut taakkununnga naapertuilluarfigineqanngitsunut suliartortartunut ersarissumik pingaarnersuinissaq, tapersersuinissaq ikiuinissarlu pisariaqartinneqarpoq
Kommunit suliniuteqareerput.
Ikiuinissaq taanna politikkikkut salliutitsigu. Naleqquttunik akissarsiaqartitsinissap saniatigut.