Perorsaasut pinngitsoorneqarsinnaanngillat, Coronap ajornartoortitsinerani sulisutut pingaaruteqarput – taaneqartartut salliullutik sulisut, taamaakkaluartorli akissarsiamikkut kinguaattooqqapput. Tamanna eqqortuusinnaanngilluinnarpoq. Maannakkut nalimmaasasoqassaaq. Akissarsiat pillugit isumaqatigiinniarnerit maanna aallartipput. Taava qanoq pisoqassava? Meeqqanik suliaqarneq pilerinartunngortinneqassava, imaaluunniit meeqqat taakkuninngalu suliaqartoq inuiaqatigiinni politikkikkut ingerlatsiniarnermi pissarsinngitsuussappat?
Nunatsinni perorsaasut Danmarkimi perorsaasunit 8.000 koruunit missaanni akissarsiakinnerupput. Suliaqarnerujussuupput. Ilisimaneqartutut sumiginnakkat aamma meeqqat ilaqutariillu navianartumiittut amerlapput, taakkunanngalu suliaqaleqqaartartut tassaapput peqqissaanermi sulisut perorsaasullu.
Perorsaasut nunatsinni Coronap ajornartoortitsinerani siullermi suliaqartorput – tamarmik. Salliullutik peqataalluinnarput. Perorsaasut isumaginninnermilu perorsaasut meeqqat inissinneqarnikut paarisarpaat inuunermillu ingerlatseriaqqinnissaanni ikiortarlugit.
Perorsaasut ataatat anaanallu suliffeqarnissaannut pingaaruteqarluinnarput.
Ulluunerani paaqqinnittarfinni perorsaasut isumaginninnermilu perorsaasut ernumassuteqarnermi uuttuutinik suliaqartarput, aammalu meeqqat inussuttullu kinguaasiuutitigut atornerlunneqarsimanerannik takussutissat siulliit takugajuttarpaat, iliuuseqartoqarnissaanillu nalunaaruteqartarlutik.
Perorsaasut taamaalillutik inuiaqatigiinni pinngitsoorneqarsinnaanngillat; siusissukkut suliniuteqarnermi; meeqqat inerikkiartorneranni isumisiueqataasartutut asannittutut, inuiaqatigiini perorsaanermi inerikkiartornermilu pingaaruteqartutut.
Aamma ikiortit ilinniarsimanngitsullu.
Taamaakkaluartoq akissarsiaat naleqqutinngillat, aamma Inatsisartut Ataatsimiittarfissuanni partiit tamarmik neriorsuipput perorsaasut akissarsiaat pitsanngortinneqassasut.
Akissarsiat pillugit isumaqatigiinniarnerit maanna aallartinneqarput. Taava qanoq pisoqassava? Meeqqanik suliaqarneq pilerineqartunngortinneqarpa imaluunniit meeqqat taakkuninngalu suliaqartoq inuiaqatigiinni politikkikkut ingerlatsiniarnermi pissarsinngitsuussappat?
Tunngaviusumik akissarsiaat sivisuumik pisariaqarnikuusumik qaffangaatsiassappat? Taavami isumaginninnermi ikiortit, meeqqanut ikiortut il.il. aamma perorsaasutullu inuiaqatigiinni inuunermut pingaaruteqartumik sulisut?
Sunik suliaqarnissaannik, sunik nakkutiginninnissaannik pisinnaasassaannillu ilimasuuteqarnerit akissarsiallu assigiinngitsorujussuupput. Piffissami sivisuumi perorsaasut amigaataanikorujussuupput akissarsiallu isigigaanni sooq taamaattoqarnersoq paasinarluarpoq.
Naalakkersuisut immikkoortumut periusissiaanni allaqqavoq meeqqat peqqinnartumik inerikkiartornissaat tunngavilersorneqassasoq perorsaasullu amerlanerungaartut ilinniartinneqassasut. Tamanna piviusunngortinneqassappat aningaasarsiat annertuumik qaffanneqarnissaannik pisariaqartitsisoqarpoq. Assersuutigalugu perorsaasut ilinniartitsisullu aningaasarsiaasa assigiinngissutaat ukiumut kr. 90.000-iuvoq.
kinguaassiutitigut innarliisarnerit ikilisinneqarnissaat, siusissukkut suliniuteqarnissat pimoorutigikkutsigit, meeqqat ilaqutariillu sapinngisamik pitsaasumik inuuneqalersitsissavagut.
Inuiaqatigiittullu meeqqat ukiuat pimoorutivikkutsigu, taava akisussaaneq pingaartitsinerlu malillugit
maannakkut akissarsisitsisoqassaaq. Aamma oqaatsinik ilikkagaqartarneq, paasinnittarnermi piginnaasat, inuit attaveqaqatigiittarnerannik ilikkagaqartarneq il.il.
Tassa perorsaasunut, isumaginninnermi perorsaasunut ikiortinullu tamanut atugassaritinneqartut pitsaanerusut.
Akissarsiaqarluartitsinissaq aallarniutigisiuk, taamaalillutik akissarsiatik inuussutigisinnaaniassammatigit.
Tamanna siunissami imminut akilissaaq.