Pingaartumik meeqqanik kinguaassiuutitigut innarliinermi pillaasarnermut sinnaakkutit sakkortusinerat pitsaasuuvoq. Tamannali kisimi ingerlanneqarsinnaanngilaq.
Peqqissutsimut, Isumaginninnermut Inatsisinillu Atuutsitsinermut Naalakkersuisup siunnersuummi ajornartorsiornera paasinarpoq. Naalakkersuisut suliakkerneqarnissaannik Inatsisartut isumaqatigiippata Naalakkersuisut akuersaassapput. Inatsisartut Naalakkersuisut sulisitsisoraat, qujanartumillu immikkoortumi pingaarutilimmi suleqatigiinnermut assersuutissaqqissoqarpoq. Isikkoqarpoq pillaasarnermi sinaakkutit piaartumik sakkortusineqassasut. Tamaanga killinnerput qujanarpoq.
Kinguaassiuutitigut kanngutsaatsuliornerit innarliinerillu akiorneqarnissaannik isumaqavikkaanni immikkoortumut aningaasaliinissaq takutinneqartariaqarpoq. Naalakkersuisut immikkoortumi tassani iliuuserineqarniartunut tamanut aningaasassarsiorniarlutik immikkoortunut pingasunut taakkununnga Aningaasanut inatsimmi ajornartorsiuteqarput.
Allatut oqaatigalugu: Siunnersuut taanna immikkoortunit allanit aamma pisariaqartitsiviusunit aningaasanik tigusinermik kinguneqassappat uggornarpoq.
Oqaluttuarisaanermi siuariartorfiusumi aningaasanut inatsisini kingullerni marlunni akitsuutinik akileraarutinillu innuttaasunit aallertoqarpoq, taamaaliortoqaannanngilarli; tamanna akilerlianik meeqqanut inuusuttunullu amerlanerusunik aningaasaliisoqarneranik kinguneqanngilaq.
Aamma qineqqusaarnermi ataatsimooraluaruttaluunniit ajortullu tamassuma akiorneqarnissaanik neriorsoqatigiilluta.
Pinaveersaartitsinermi annertuunik suliniuteqarluni suliniut tamanna malinneqarpat ajunngitsumut ingerlassaagut. Tassa pillaasarnermi sinaakkutit sakkortusinerat kisimi ingerlanneqarsinnaanngilaq, pinaveersaartitsinermulli aningaasanik nukinnillu amerlanerungaartunik atugassiisoqartariaqarpoq. Innarliisarnerit siunissami ikilisinnewassapput. Tamanna aallartinneqarniarli!
Pinerluuteqartuunermik tunngaveqarneq uani annertuumik ajutoorfiuvoq, tassa isertitsivinni inuaqatigiinnut utertitsiniarluni suliniutit naammattumik pimoorunneqanngimmata. Tamanna aamma pitsanngorsarluarneqartariaqarpoq. Tamanna aammaarluta kajumissaatigeqqikkusupparput. Pinerluffigineqartut angajoqqaavilu qano iliornissartik ilisimaneq ajorpaat ikiortissarsisinnaanatillu.
Ullumikkut angerlarsimaffeqanngitsut 70 %-ii sinnerlugit meeraallutik kinguaassiuutitigut innarlerneqarnikuupput.
Tamanna qimalaassavarput. Oqarfigisinnaavassi ajortut taamaattut naatsorsueqqissaarinni allani aamma amerlavallaarujussuartut. Tassa tamanna inunnut ataasiakkaanut anniaataaginnanngilaq, tamannalu ajoreeqaaq, inuiaqatigiinnulli tamanut annertuumik kinguneqartitsivoq.
Pinaveersaartitsinikkut pinerluffigineqartullu salliutillugu isumaginerisigut aningaasat pitsaanerusumik atorneqartussat paasineqartariaqarpoq.
Tamaanna inuuneq tamaat naviartumiilersitsisarpoq, peqqissumik attaveqalertarnermut tunngatillugu inuuneq tamaat ajornartorsiortitsilersarpoq peroriartornermilu inersimasunut inunnullu asannittunut tunngaviusumik tatiginninneq inuuneq tamaat aserortarlugu. Nunarsuarmi kusanarnerpaat tassaapput asanninneq kinguaassiuutillu atorneqarnerat allanullu attaveqarsinnaassuseq.
Inuttut tunngaviusumik atugaqarneq taamaattoq kinguaassiuutitigut innarluunikkut aserorneqartarpoq.
Suliniutit arlalippassuit pisariaqartinneqarput:
Internetimi inuit attaveqarfigisartagaanni isumannaatsumik atuinissamik ilinniartitsineq, innuttaasunik siamasissumik qaammarsaaneq, innarlerneqarsinnaasunut innarliisinnaasunullu pinaveersaartitsinermi suliniutit amerlanerusut, ernumanartumik iliuuseqartarnernik siusissukkut paasiniaasarneq, meeqqat atuarfiini suliniutit amerlanerit, timersortartut peqatigiiffiini qaammarsaaneruneq kinguaassiuutillu pillugit pitsaanerusumik ilinniartitsineq kiisalu ilaqutariinnut aamma meeqqanut inuusuttunut ikiorneqarnissamik pisariaqartitsisunut ulloq unnuarlu ikiuisarnermik malittarisassaqarneq.
PTSD-mik katsorsaaneq ilaatigut kinguaassiuutitigut innarlerneqartunut periarfissatut kiisalu tarnikkut ajornartorsiutinik inuttullu atukkatigut ajornartorsiutinik sunniuteqangaarnerusumik paasiniaasarnerit.
Kinguaassiuutitigut innarliinernut tunngatillugu meeqqat inuusuttullu qaqugukku navianartumiinnerannik immikkut nakkutiginninneq.
Inatsisartuni tamanna pingaarninngortiinnarsinnaavarput, taamaaliorsinnaavugut taamaaliortariaqarlutalu.
Asasagut Naalakkersuisut Inatsisartullu aningaasanik malitseqartinneqarli.
Taamaanngippat pillaaginnartoqartassaaq tamassumalu tunngavippiaa pimoorullugu illiuuseqarfigissanatigu.