Peqqissutsimut Naalakkersuisup uparuaanera eqqoqqissaarpoq; nunatsinni kingutigissaanermi arlarlinnik ajornartorsiuteqarpoq. Kissaaatigigutsiguli arlalitsigut aaqqiisinnaavugut.
Peqqissutsimut Naalakkersuisoq ajornartooqqavoq, taamaammat uani tapersiinera oqaatigerusuppara. Aningaasat isumaginninnermut, peqqinnissaqarfimmut inatsisinillu atuutsitsinermut tulleriinnilersortussavai. Tassa immikkoortunut pitsaangorsaaffigineqarnissaatut kissaatigisatsinnut.
Eqqortorli tassaavoq Aningaasanut inatsimmi tulleriinnilersueqqinnissaq toqqarsinnaagipput kissaatigigutsigulu kigutikkut peqqissutsimut atugassaqartitsilersinnaavugut. ”Taamaallaat” amerlanerusunik aningaasaliissaagut. Assersuutigalugu tunngaviusumik inatsit pillugu ataatsimiititaliarsuaq atorunnaarsissinnaavarput taamaalilluta amerlanerusunik aningaasaliilluta.
Aaqqiissutissatut maanngaaniit siunnersuutigut tassaapput:
1. Danmarkimi kigutit nakorsaattut naammasseqqammertunut pinngortitami kusanartumi nunamilu suliamik ingerlatsinermi TAMANIK misiliisinnaatitaaffiusumi misigisaqarusuttunut ujartuilluni suliaqarneq takoqqusaarinerlu. Aamma eqqarsaatigisinnaavarput Ilinniakkaminnik naammasseqqammersunut mesterimi ilinniartut assingusinnaasoq.
Tassa nunatsinni sunilluunniit suliaqarsinnaatitaaneq Nunanilu Avannarlerni akuerisaassaaq. Tassa Kalaallit Nunaanni kigutilerinermi suliamik ingerlatseriaaseq soqutiginartoq. Imaaliorutta:
- Pitsaanerpaanik atugassaqarnissaat isumagalugu. Imatut paasillugu, suliamik ingerlatsinermi sulisugut maani najugaqartut pikkorilluinnartut kigutit nakorsaat maanga tikikkaangata ajornartorsiutit naapittakkatik pillugit allattuiviliornermik Namminersorlutik Oqartussanut ikiuisut. Tassa avataanit tikeraarneqaraangatta nunatsinneersut tikittullu ajornartorsiutaannik allattuiviliortitsissaagut. Taava tamassuma aaqqiiviginissaa aallartissavarput. Tikikkaangata inigisinnaasaannik neqeroorfigisassavagut.
3. Immikkoortumut aningaasarsiat pitsaanerusut angalaarnissamullu tamatigoornerusumik aaqqiissutit qulakkiissavagut. Paasisariaqarparput noorarnermik aaqqissuussinerit pissutsillu akuttunngitsumik taarsiisarnermik ingerlatsiviusinnaasut atorfissaqartikkigut, taamaalilluni innuttaasut kigutikkut peqqissuunissaat qulakkeerlutigu.
4. Soraarninngornikut misigisassarsiorsinnaasut sulisorerusukkigut. Tassa TAMANUT nunarsuup ilaanik takunnikkusuttunut piffissat ilaanni sulinissaq soqutiginartunngortillugu pilerinartunngortillugulu. Nunarsuarmi nunat mikinerit allat taamaaliortarput. Island, Mallorca nunallu mikisut allat tamassuminnga isumassarsiorfigisinnaavagut. - Ilinniartunut kigutit narkosaattut ukiumi kingullermi ilinniartunut aasaanerani suliffeqarnissap qulakkeernera, Nunanit Avannarlerniit tamanit Nunaniillu Avannarlerni Killerniit. Taamaaliorlutik ilinniarnermik naammassinnginnerminni Kalaallit Nunaat takussavaat – neriunarporlu taamaaliornermikkut naammassitinnagit sulisussarsiarineqarsinnaassasut.
Kigutit paasinnittarnitsinniit peqqissutsimut pingaaruteqarnerujussuupput, kigutillu narlorissut inuusuttut imminnut naleqartinnerannut pingaaruteqartorujussuupput. Naalakkersuisoq soriarsinnaanngilaq. Taamaammat aningaasanut inatsimmi tullermi aningaasanik immikkoortitsissaagut, taamaalilluta suliamik ingerlatsisut tikisitat atugaannik aaqqissuusseqqinnissamut inatsisitigut sinaakkutit iluanni periarfissiilluta. Taava illoqarfinni nunaqarfinnilu tamani kigutikkut peqqissuutitsilissaagut.
Nalunngilarporli tamanna ajornartorsiutitaqartoq, taamaammat nalunaarut una Naalakkersuisunit takuneqartussatut neriuutigisarput.