Inatsisartut suleriaasianni § 36 naapertorlugu Inatsisartuni oqallisissatut siunnersuut una saqqummiuppara:
Peqqinnissamut, suliniuteqarnissamut aningaasaqarnikkullu tunngasutigut qanoq ililluta Coronavirusimut nutaamut siammasissumik tunngavilersukkamik, qaffasissumillu periusissamik qulakkeerinninnissatsinnut oqallisissatut siunnersuut.
(Inatsisartunut ilaasortaq Tillie Martinussen, Suleqatigiissitsisut))
Tunngavilersuut:
Ulloq manna tikillugu Corona-virusimik nalaataqarnitsinni Kalaallit Nunaanni innuttaasut qanoq ataqatigiitsiginerat takullugu qamuuna attortinnarpoq. Tamanna angerlarsimaffeqanngitsut unnuiffissaqartinneqarnissaannik, immitsinnut qanillinaveersaarnermik, utoqqarnik sanngiitsunillu illersuinermik, nunarsuarmioqatitta nutaarsiassaataannik kalaallisuunngortitsinermik, ataqatigiinnermillu nassataqarsimavoq. Maanna piffissanngorpoq uagut Inatsisartut suleqatigiilluta sulinitsigut utertitsiviginninnissatsinnut. Tassa Corona-virusimut nutaamut tunngassuteqartunik tamanik aqutsinerup ingerlanneqarnerata ammasumik suleriaaseqarluta pitsaasumik periusissiornissarput.
Nunani tamani immitsinnut sanilliuffigisatsinni partiimi suminngaanneersuuneq akimorlugu inatsisartut partiillu isumaqatigiissiornerminni isumaqatigiinnginnertik akueralugu nunaminni innuttaasuminnut aaqqiissutissanik nassaarniarlutik suleqatigiillutik suliuarsinnarput, nalunagu Corona-virusi qanorluunniit aqukkaluarunikku inuiaqatigiinni inunnut tamanut sunniuteqartussaasoq. Maani aamma taama iliortariaqarpugut.
Ukiuni aggersuni aningaasaqarnikkut assut artorsartussaavugut. Corona-virusimut akiuussutissap nassaarineqarnissaata tungaanuunaanngitsoq, taassumali kingorna ukiuni aggertussani aamma.
Ulluni makkunani nunarsuatsinni niuffaffiit ajalusoortut takusinnaavagut, inuussutissanut akit appariarput, uuliap akia appariarujussuarpoq. Nunarsuaq tamakkerlugu suliffeqarfiit matorarput, akissakilliulerneq piviusunngorpoq.
Aningaasanut Inatsimmi pingaarnersiukkagut ajornartorsiorfigissavagut, inuussutissarsiorneq ilanngullugu, qiimmassaatinik oqaasertaliinikkut, imaluunniit arlalippassuarnik ilassutitut aningaasaliinikkut, aamma taarsigassatut atornikkut aaqqinneqarsinnaanngitsumik.
Takornariaqarneq, inuussutissarsiorfiit minnerusut, namminersortut, eqqumiitsuliortut allarpassuillu – pingaartumik namminersortut – suliffeqarfiit aningaasaqarnermikkut siuariartornerat killormut saatinneqareerpoq. Kiffartuussisoqarfiit, assartuussinermi, aalisarnermi inuussutissarsiortut minnerusut, aammattaaq suliassaqarfinni allani. Meerartatta atuariaasiat allanngorpoq, nunarsuarmioqatitsinnik suleqateqarneq Naalagaaffeqatigiinnitsinnilu suleqatigiinneq eqqortumik oqaatigissagaanni inuunissatsinnut pisariaqartivippagut.
Ingerlataqarfiit annerit, pisortaqarfiit aalisarnermilu inuussutissarsiorneq siunissami aamma eqqugaasussaassapput. Maannamut suliffeqarfiit matorartut takoreerpagut, sulilu suliffeqarfinnut matusunut periusissamik naleqquttumik pilersitsisimanngilagut, suliffeqanngitsunik isumaginninneq – taakkunanngalu piumappassuk ilinniagaqaqqitsitsineq – imaluunniit inuussutissarsiutinik allannguineq.
Ataatsimoorluta suliniutit makkua isumaginissaannut piffissanngorpoq, tamanut atuuttussamik. Nunatta Karsiata akiliisinnaassutsini ukiorpassuarni attatiinnarnissaa pingaaruteqarpoq, tassanilu ilaapput taarsigassatut atornerit, sipaarniuteqarnerit, ikiorsiissutissat, imaluunniit inuussutissarsiutinik allannguinerit. Suliarineqarneri aallartinneqartariaqarput.
Suliniutigineqartussanik aningaasalersuinissamut siammasissumik isumaqatigiinneq, eqqarsaatigilluakkamik aaqqissuulluakkamillu sipaarniarnissamut pilersaarut, ammasumik suleriaaseqarluta ersarissumillu salliussatsinnut suleriaaseqarnissaq, aamma pisariaqassappata inuussutissarsiutinik ingerlataqarfinnillu allannguinerit amigaatigingivut erseqqissarneqarnissaa Suleqatigiissitsisunut pingaaruteqartorujuuvoq. Minnerunngitsumillu Corona-virusimik nutaamik aqutsinermut ammasumik suleriaaseqarluta periuseqarnissarput amingaataavoq.
Ajornartoornerup kingorna suliniutit sorliit ingerlatiinnarneqarnissaannut nalilersuineq pisariaqartipparput,
aningaasanullu inatsit tamakkiisumik isigalugu nalilersoqqittariaqarparput.
Suleqatigiissitsisuniit takorusukkaluarparput suliniutit kinguartinneqarsinnaasut unitsinneqassasut, tamanna pisinnaavoq akiliisitseriaatsimik atortuulersitsinikkut, mittarfiliornissat immikkoortuisa ilarisinnaavaat, erngup nukinganik nukissiorfiusinnaapput, aammattaaq Namminersorlutik Oqartussat ingerlatseqatigiiffiinut pissarsiassanik akiliinerit ajornartoornerup aqunneqarneranut tutsinneqarsinnaapput, imaluunniit tallimaattut allarluinnaq. Sanaartornermut Illuliortitsinermullu Aningaasaateqarfimmiilli aaneqassanngillat, suliniutinilluunniit assingusuniit tamakkiisumik napatitsisuniit.
Sammisat qaqillugit ammasumik oqallissutigissagivut pingaaruteqarpoq. Inatsisartuni ataatsimiititalianilu tamani.
Suliarilluakkamik pilersaarusiornissatsinnut pingaarnersiungassagut amerlapput, iluaqutigisinnaavarpullu
ukununnga pilersaarusiorutta:
Matusinerup kingorna ilaatigullu kingusinnerusukkut matusinermi isumaginninnerup iluani maannakkut pitsanngorsaanissaq pisariaqartinneqarpa?
Namminersorlutik Oqartussat ingerlatseqatigiiffii taakkualu innuttaasunik kiffartuussinerat qanoq iliuuseqarfigerusullutigillu qanoq iliuuseqarfigissavagut?
Peqqinnissaqarfik suli amerlanerusunik aningaasaliiffigineqassava, immaqa pingaartumik sineriammi?
Angerlarsimaffeqanngitsunut inissat ingerlatiinnarneqassappat, aamma kommunit taakkununnga taarsiivigineqassappat?
Qanoq isilluta innuttaasut aasaq manna nunatta iluani angalasinnaanissaat qulakkiissavarput?
Angallanerup aaqqissuussaanera akiiluunniit aallanngortinneqassappat? Nunatsinni tunisassiornissamut piginnaaneqarneq tamakkiisumik attatiinnarneqassava?
Ikiorsiissutissat maannakkut atuutsinneqartut naammappat? Naammattumillu aqunneqarpat?
Qanoq sivisutigisumik immitsinnut ungasinniassaagut? Qanoq isilluta misissuinermut periuseq pitsaanerpaaq qulakkiissavarput?
Angallassisariaqalernissanut saniatigut aningaasaliissutissanik peqassaagut, tamassumunngalu atatillugu isumaqatigiinniarnerit sorliit angorusuppagut, kikkuttaaq isumaqatigiinniuteqarfigerusuppagut? – Takorloorneqarsinnaanngitsut pissangaluarpata sulisussagut naammappat; nappaat kingusinaarluni
tuniluutilissagaluarpat, aap immaqa kattornannguaq? Ataatsimiititaliaagallartussanik pilersitsissaagut, Coranamut periusissamut isumasioqatigiinneq, soorlu
Aningaasaqarnermut Ataatsimiititaliamut missingersuummut taama isumasioqatigiittugut?
Oqalligisassarpassuaqarpugut, kisiannili qularnanngilluinnarpoq sunniuteqarnissarput ilanngussaqarnissarpullu qulakkeerniarlugu Inatsisartuni ataatsimoorussamik oqalliffiusartussaq pisariaqartikkipput. Inatsisartut ataatsimiititaliaat naammanngillat.
Corona-virusi nutaaq assigiinngitsunik sulialinnut attuumassuteqarpoq, susassaqarfinnik akimuisuuvoq, nunarsuarlu tamakkerlugu inunnik tamanik sunniilluni, aamma maani, nuna tamakkerlugu. Illoqarfimmiit nunaqarfimmut, tagiuisartumiit kilisaatinik piginnittunut. Amerlasoorpassuit sunnerneqarput, Coronavirusiminngaanniit.
Aningaasanut Inatsit aningaasanik atukkiussanik kusassassanngilarput, ajornartorsiulluunniit kinguarsassanngilarput ajunnginnerpaarlu pissasoq neriuutigalugu. Aaqqissuissaagut, ilanngarterissaagut, isumaqatigiinniassaagut sulilluarlutalu maani Inatsisartuni, aningaasaqarnikkut, peqqinnissaq pillugu inunnullu tunngasunik siammasissumik tunngavilersukkamik periusissiorumalluta. Ajornartorsiutip akornatsinni agguataarnissaanut iliuuseqarfigivinissaanullu piffissanngorpoq. Nunatsinni inuit ammasumik suleriaaseqarnissarput, aalajaassuseqarnissarput, unneqqarissuunissarput erseqqissuunissarpullu piumavaat. Ataatsimoortillugit.
Matumuuna ataatsimiinneq ullunik arfineq-pingasuinnarnik sivisussuseqarmat eqqarsarnarpoq Inatsisartuni tamatta immikkut minnerpaamik qaammatini marlunnik-pingasunik sulinissatsinnut periaqarfissaqartugut.
Nunatta inui sullikkivut takutinnissaa pingaaruteqarpoq. Tamaasa tapersersorigut. Minitaqarnata.
Tamassuma qanoq piviusunngortinneqarnissaa pillugu tamatta pitsaasumik isumatusaartumillu oqallinnissatsinnut kissaalluta.