Inatsisartut Suleriaasianni § 37 imm. 1 naapertorlugu Naalakkersuisunut apeqqutit imaattut matumuuna saqqummiuppakka:
Naalakkersuisunut apeqqutit:
- Kalaallit Nunaata imartaani immap sikuini, imaani immamilu uumasuni plastikkinik tappiorannartunik mingutsinneqarsimanersut Naalakkersuisut misissuinissaminnut pilersaaruteqarpat?
- §37 naapertorlugu apeqqummut nr. 81/2019-imut Naalakkersuisut akissuteqaataanni ersippoq Kalaallit Nunaanni plastikkinik atuinermik annikillititsinissamut atueqqinnissamullu tunngatillugu Avatangiisinut Aningaasaateqarfimmut qinnuteqarnissamut kajumissaarinermikkut piujuartitsilluni ineriartornermut FN-ip nunarsuarmi anguniagaa anguniaraat. Kajumissaarut tamanna tunngavigalugu suliniutit qassit aallartinneqarsimappat?
- §37 naapertorlugu apeqqummut 81/2019-imut akissuteqaammi eqqaaneqartutut immani plastikkit tappiorannartut annikillisinneqarnissaat anguniarlugu nunatsinni ikuallaaviit pitsaanerusut qulakkeerneqarnissaat, soorlu aamma taaneqartoq eqqakkanik ikuallaanermit mingutsitsinerup allap annikillisinneqarnissaa qanoq ingerlasimappat?
- Sumiiffiit sorliit pilersaarusiorfigineqarpat, imaluunniit sumiiffinni sorlerni eqqakkanik ikuallaaviit pitsanngorsaaffigineqarsimappat?
- Imeq imigassarput kiisalu nunatsinni inuussutissat plastikkinik tappiorannartoqarnersut imaluunniit ikuallaanerup angerlarsimaffinniilluunniit eqqakkanik piiaanerup, aamma anartarfilerinerup, imaluunniit sananeqaatinik minnernik nalinginnaasunik piianerup malittarisaannik mingutsitsinernik allanik misissuinissamut Naalakkersuisut pilersaaruteqarpat?
- Akissut aappiuppat, tamassuma qaqugu pinissaa naatsorsuutigineqarsinnaava?
- Akissut naamiuppat, peqqutaanik Naalakkersuisut nassuiaanissaminnut piumaffigineqarput.
- Imermi imigassatsinni ilaatigut plastikkinik tappiorannartunik sorujuiaaniarutta sorujuiaatit sorliit atussavagut?
- Nunatsinni ullumikkut sorujuiaatit taama ittut atorpagut?
- Imermik imigassatsinnik mingutsitsisut sorliit malinnaavigineqarnissaat Naalakkersuisut pingaartippaat?
- Nunatsinni sumiiffinni sorlerni?
- 2019-imi Upernaakkut Ataatsimiinnermi nunatsinni plastikkimik atuinerup annikillisarneqarnissaanut iliuusissanut pilersaarusiortoqarnissaa aalajangiiffigineqarpoq. Tamanna 2020-mi Upernaakkut Ataatsimiinnermi saqqummiunneqartussaassaaq. Naalakkersuisut tamanna pillugu suliartik sumut killippaat?
(Inatsisartunut ilaasortaq Tillie Martinussen, Suleqatigiissitsisut)
Tunngavilersuut:
Nunarsuatsinni ilaatigut plastikkit tappiorannartut kiisalu atortussiat allat mingutsitsinerisa annertusiartorneri peqqutigalugit imeq imigassaq inuussutissallu misissorneqartarput.
Isumaqarpugut pissusissamisoortoq nerisartakkagut imerlu imertagarput arlaannik mingutsinneqarsimanersut aamma uagut misissortalissagivut, kisianni immaqa pingaartumik plastikkinik tappiorannartoqarnersut, tamannami ajornartorsiut nunarsuatsinni annertusiartormat.
Aammattaaq erseqqissaatigissavara Kalaallit Nunaanni imeqarfeqarmat aqqusiniliorfigineqartussat allanillu mingutsitsisunik qanittuaniittunik, soorlu assersuutitut Nuummi imeqarfiit eqqaanni sanaartortugut, aammattaarli nunatsinni sumiiffinni allani.
Sineriammi sumiiffiit ilaanni illoqarfiit imeqarfiisa qanittuani suli eqqakkanik ikuallaasoqartarpoq. Nuna tamakkerlugu imeq imigassaq ilaatigullu inuussutissat imaaniit pissarsiarisartakkagut misissorneqarnissaat pisariaqartippasipparput.
Siornatigut takoreerparput nunarsuup sinneraniit mingutsitsinermit saviminissaq arrortikkuminaatsoq inuussutissatsinnut pisartoq, taamaattumillu erngup imigassatta qanoq pitsaassuseqartiginerata minguissusaatalu paasinissaa soqutiginarpoq, aammattaaq nunatta imartaaneersut uumasut nerisartakkagut mamarisagullu ilanngullugit.
Taamaammat taakku pillugit aamma najugaqarfinni imeqarfinnik erngullu minguissusaanik isumaginninnerup misissuinerulluunniit killiffia paaserusullugu siammasissumik apeqquteqarpunga.
Inuit ernumanerat eqqarsaatigalugu apeqqutit piaarnerpaamik imaluunniit ullut qulit iluanni akeqquneqarput.
Tillie Martinussen
Samarbejdspartiet – Suleqatigiissitsisut