Umiarsuaateqarfiit namminersortut Covid-19-mik misissuinermut atortussanik tapersersuipput, tamassumunngalu qujanaq. Tamannali paasiuminaannartumik apeqqusernarpoq; sooruna peqqinnissaqarfipput siulianiilli taama aningaasalersornerlugaatigisoq?
Namminersortut isumassuiumatuut
Umiarsuaateqarfiit namminersortut (Sikuaq, Niisa aamma Polar Seafood) Covid-19-imut atatillugu inuiaqatigiinnut annertuumik isumassuiumatuujusutut takutitsinerat aamma suliniutinut aningaasalersuinermikkut tapersersuinerat takullugu nuanneqaaq.
Tapersiissutit kingulliit Covid-19-imik misissueqqissaarinermut atortussat Sikuameersuullutillu Niisa Trawlimeersuupput, taakkualu saniatigut qaammammi siullermi ingerlannerinut aningaasalersuipput. Qutsavigaatsigit!
Siornatigut namminersortut peqqinnissaqarfimmut immikkut ittunik atortussanut aningaasalersuinerat pinikuupput tamannalu nuanneqaaq. Neriuppunga tunissuteqartarnerit siunissami aamma attatiinnarneqassasut.
Apeqqut apeqqutigisarialik
Sooruna nunarsuaq tamakkerlugu ajornartoornermi namminersortut aningaasalersuisuusariaqartuusut?
Peqqinnissaqarfiup akisussaasullu aallaqqaataaniilli nunarsuaq tamakkerlugu ajornartoorfiusoq paasinarsimmat atortussanik inniminniisussaagaluarput. Suleqatigiissitsisut Naalakkersuisunit tusaaqqusimagaluarput, januaarip 29-anniilli, tassani siullerpaamik Covid-19 taassumalu aqunneqarnissaanut piareersimanissamut pisariaqartitsineq nakkutigeqqusimavarput.
Taamani tusaanngitsuusaarneqarsimavugut, maannakkullu ataatsimik apeqqutissaqarpugut:
Peqqinnissaqarfimmut taama amigartoortitsisoqartigaa ajornartoornermi allaat atortussanik pisisoqarsinnaananilu ingerlatsisoqarsinnaanani? Ilisimasakka malillugit 2,5 mio. kr.-it pineqarput. Tamanna uagut akissaqarfigisussaagaluarparput.
Namminersortunit tunissutit nikassaaviginngilagut, qujamasuutigeqaagut, kisiannili nunatsinni salliutinneqartut paasiuminaannartumik apeqquserpagut.
Naalakkersuisut akileraarutigut sumut atorneraat qiviaraanni upperiuminaappoq.
Aana assersuut ataaseq: Mittarfissanut imminut akilersinnaarpianngitsunut pingasunut 4.000.000.000 kr.-it, peqqinnissaqarfilli salliutinneqartussaagaluarpoq.
Inuiaqatigiinnut tunngavissaq pitsaanerusoq
Atortussanut piginnaanngorsaanermullu aningaasaliinissaq aporfissaqanngilaq, tamassumunnga ilutigalugu Peqqinnissaq pillugu Ataatsimiititaliarsuaq suliaqaqqilissagaluarpoq.
Qanittukkut misissuinerit takutippaat nunatsinni tunisat ataatsimut nalingata (BNP) 6%-ia peqqinnissaqarfimmut atorneqartartoq, nunanili avannarlerni allani assersuutigalugu 10%-ia peqqinnissaqarfimmut atorneqartarpoq. Isumaqarpugut tamanna equngasumik salliussinerusoq.
Taamaattorli peqqinnissaqarfipput ingerlavoq, sulisut piginnaasallit sipaarniuterpassuillu aaqqissuulluagaasut kiisalu sulinermi atukkat sipaarniarfigineqarneri peqqutaallutik.
Nunarsuatsinni Covid-19-imik ajornartoornerup MAANNA takutippaa inuiaqatigiiusugut peqqissuunerussagatta peqqissutsip aningaasaliiffigineqarnissaa qulakkeerneqartariaqartoq.
Aningaasaatigut qanoq atornissaannut ajornartoornerup isumatusaartuutilersinnaavaatigut.
Salliussagut tassaapput; ilinniartitaaneq, piginnaanngorsaaneq, inuussutissarsiortut namminersortut, atugarliortut peqqissuserlu.
Taakkua ingerlallualerpata suliniutit allat misissorsinnaalissavagut. Inuiaqatigiit peqqissuunissaannut tamanna tunngaviuvoq.
Danmarkimik suleqateqarnissaq qunugineqassanngilaq, taamaalilluni amerlanerusut inuunermi atugarisaasa pitsaanerpaaffianiinnissaannut periarfissaqartitsinerulissaaq. Ajornartoornermi uani Savalimmiut Danmarkillu suleqatigineri ingerlalluarsimaqaat. Tamanna ineriartortitsigu.
/ Kim Lyberth – Siulittaasoq (Kujataani immikkoortortaq), Samarbejdspartiet – Suleqatigiissitsisut