Inatsisartut upernaakkut ataatsimiinnissaat piaartumik ingerlanneqartariaqartoq ataani partiit atsiortugut Inatsisartut Siulittaasoqarfiannut qinnutigaarput.
Ullut imaannaanngitsut nalaappavut. Qujanartumillu nualluussuup coronap peqqissutsikkut ajornerusumik eqqunngilaatigut. Ulluinnarnili inuunitsinni aningaasarsiornitsinnullu annertuumik sunniuteqalereerluni.
Ilisimalikkavut kingulliit aallaavigalugit, ilaatigut Aningaasaqarnermut Siunnersuisooqatigiit aningaasarsiornikkut nunatta malunaatilimmik eqqugaanissaannik oqariartornerat aamma Naalakkersuisut Aningaasanut Inatsit 2020-moortup tunngaviata allanngortariaqarneranik oqariartuuteqarnerat tunngavigalugit, Inatsisartut inatsisiliaminnik allannguisinnaasutuaammata piaartumik ataatsimiigiaqquneqarnissaat qinnutigaarput.
Coronap sunniutaanut sunniutigiumaagaanullu piffissaatillugu aaqqiissutissat piareersassallugit pisariaqarpoq. Inatsisartullu inatsisit malillugit pinngitsooratik upernaakkut ataatsimiinnerminni suliassaat aamma suliarineqartariaqarlutik.
Illersorsinnaasumik nunarput, nunatta iluani angallannikkut ammariartuaarneqarsinnaanngorpoq. Inatsisartullu maanna killiffik aallaavigalugu suliassatik piaartumik suliarisariaqalerpaat. Qanoq iliuuseqarnaveersaaginnaraluarutta suut tamarmik ajortikkiartuinnartussaasut nalunnginnatsigu.
Inussiarnersumik inuulluaqqusilluta
Múte Bourup Egede, Siulittaasoq Inuit Ataqatigiit
Hans Enoksen, Siulittaasoq Partii Naleraq
Aqqalu Jerimiassen, Siulittaasoq Atassut
Tillie Martinussen, Suleqatigiissitsisut Samarbejdspartiet