Inuussutissarsiutigalugu, ingerlatsillutik pilersitsiortorlutillu eqqumiitsuliortut, imitsittartut. Nipilersortartut, erinarsortartut, isiginnaartitsisartut, eqqumiitsuliortut, qitittartut, erinniortut, ilitsersuisut, assiliisartut, qullilerisut nipilerisullu, filmiliortartut atuakkiortullu. Tamassinnut qujanaq ulluinnarni inuunerput pisuunnguallatsittarassiuk. 

Amerlasuujusugut kammalaatigut, suleqatigut ilaquttagullu ungasillugit angerlarsimavugut. Radio TV-lu ikumatittarpagut, internetikkullu attaviup sukkasuup atorsinnaasaa tamakkerlugu streamerilluta. Nipilersukkanik tusarnaarnerulerpugut, atuakkanik atuarnerulerpugut filmernerulerlutalu.

Nipilersuuteqanngikkaluarpammi, isiginnaagassiaqanngikkaluarpat, isiginnaartitsisoqanngikkaluarpat eqqumiitsuliornermilu nutaaliortoqanngikkaluarpat ulluinnarni inuunerput qanoq isikkoqassagaluarpa. Misigisartakkagut ulluinnarni taamaattussaannartut isigisagut, radiomi, TV-mi, suliffimmi angerlarsimaffimmilu iikkamiittut assit nipillu, aap sumiiffinni tamangajanni, pilersitat nuannaarutigisinnaallutigillu paasisaqarfigisinnaavagut.

Tamanna apererusulersitsivoq kulturikkut aallussisortatsinnut tapiissutit naammannersut? Kulturi ajornartorsiortinneqakulaarpoq, aamma piffissani ajornartoorfiusuni, nunattalu karsiata eqqumiitsuliorneq kulturilu siulliullugit mattuttarpaat. Annaanissaalli piviusumik akissaqartipparput, kulturip annaanissaanut akissaqarpugut, pingaartumik maannakkut?

Suleqatigiissitsisut isumaqarput tamanna akissaqartinneqanngitsoq. Kulturi pisuussutaavoq, pisuussut eriagineqartussaq.

Nunatsinni inuussutissarsiutigalugu, ingerlatsillutik pilersitsiortorlutillu eqqumiitsuliortut Kalaallit Nunaannut pingaaruteqarput. Suminngaanneernersugut, sumiiffipput, qulaaniit ataaniillu, sumullu ingerlaarnerput pillugu taamisaarillutik oqaluttuartuupput.

Tapiissuteqartarnerit ikiorsiissutissallu millionærinngussutaaneq ajorput, tamassumuunalu tamanna siunertarineqanngilaq. Annaanissaanut akissaqarfiginngisagut ikiorniarlugit pilersinneqarput. Taamaattumillu Suleqatigiissitsisuni isumaqarpugut inuussutissarsiutigalugu, ingerlatsillutik pilersitsiortorlutillu eqqumiitsuliortunut aningaasaliissutissat immikkut ittut qulakkeerneqassasut.

Nunaminertani mikisuni najugaqarlutalu ingerlaartarpugut, tamattalu minnerpaamik ataatsimik ulluinnarni inuunitsinnik pisuunnguallatsitsisartumik nalunngisaqarpugut. Immaqa inuttut ilisarisimanngilagut, pisiniarfimmili, aqqusinermi, cafémi bussimiluunniit naapittarpagut. Coronap qaangiunnissaa kisiat qilanaarinagu piffissanik takkuttussanik eqqumiitsulianik, kulturimik, nipilersuutinik, assilissanik, qullernik nipinillu tamatsinnut iluaqutaasussanik pilersinneqarfiusussanik qilanaarutissaqarpugut. 

Kulturimilu suliaqartunut aningaasat aamma nassaarineqarsinnaapput. Tips – Lotto aningaasassaateqarpoq, taakkualu atuakkiortunik ukiuni makkunani ukkataqarnissaminnut nalunaaruteqarnikuupput. Kisianni kontomi tassani 30 millionit sinnerlugit Kalaallit Nunaat tamakkerlugu eqqumiitsuliornermut nutaanillu pilersitsisinnaasunut tapiissutinik annertuunik qulakkeerinnittoqarsinnaanera naatsorsuutigineqarpoq.

Suleqatigiissitsisut, Nuuk apriilip 6-at 2020

Jan Joe Seidsen