Eqqartuussivik aalajangiisimatinnagu angerlarsimaffinnut soorunami isaasoqassanngilaq. Tamanna Coronamut atatillugu ajornartoornermi inatsisip ilaatut Inatsisartuni pingasunngorpat oqallisigineqassaaq.
Inatsisissap ilaa taanna soorunami akuerineqassanngilaq. Suliniutissat ilaat aaku:
Corona-virusimut atatillugu inatsisit Inatsisartunut ullut pingasut affaat qaangiuppat saqqummiunneqartussat ilaatigut politiit oqartussallu eqqartuussivik aalajangiisinnagu inuit angerlarsimaffiinut isersinnaanerannik imaqarpoq.
Oqaasertaa taannarpiaq Inatsimmut tunngaviusumut akerliunerani pissutigalugu Danmarkimi ajornartoornermi inatsimmit peerneqarpoq. Danmarkimi Tunngaviusumik inatsit soorunami aamma Kalaallit Nunaannut atuuppoq, taamaammallu inatsisip ilaa taanna atuutilersinneqarsinnaanngilaq.
Piffissaq tamanut ajornartorsiorfiuvoq, aamma Naalakkersuisunut, qularutissaanngitsumillu misigisimavugut suliami tassani assileriarlugu ikkussilluni sulisoqartoq.
Inatsisartut katersuuppata oqallinnissamik periarfissaqarnissarput saqqummiunneqartullu allanngortinnissaa pingaaruteqarpoq.
Imaappoq Inatsisartut inatsisiliortuusut, taakkulu inatsisit suut malillugit Naalakkersuisut sulissanersut aalajangiisarput. Uani aamma taamaappoq saqqummiunneqartullu allanngortinnissaa ersarippoq.
Ippassaq sapaammi uanga, Tillie Martinussen, Inatsisartuni ilaasortaq, tamanna pillugu isumaga pillugu KNR-imit sianerfigineqarpunga
Ersarissumik oqarpunga Tunngaviusumik inatsimmut akerliusoq, Danmarkimi oqallittoqareerpoq soorunalumi innuttaasut pisinnaatitaaffigut inuttullu inuunitta inniminartuunera annikillisinneqassanngillat. Soorunami naami. Tamanna ajortumut ingerlanerussaaq pisariaqaranilu.
Inatsisartut Siulittaasoqarfiat aperaarput inatsisissatut siunnersuummik nammineq saqqummiisisinnaatitaanersugut allannguutissatullu siunnersuummik il.il. qanoq suliaqarsinnaanersugut.
Aamma piffissami Coronaqarfiusumi elektroniskinngorlugu taasisinnaaneq ataatsimiissinnaanerlu apeqqutigaagut. Inatsisartut suleriaasiat naapertorlugu taamaaliortoqarsinnaanngilaq, naak kingullermik ataatsimiinnermi suleriaatsip nutarterneqarnerani taamatorpiaq siunnesuuteqaraluartugut.
Iliuuserineqartussatut iliuinnassaagut, ataatsimiinnermilu sakkortuunik mianersortoqassaaq.
Mianersornerilli allannguutissatut siunnersuummik saqqummiinissaq akornusissanngilaa.
Neriuppugut inuit mattusimatissinnaanerannut tigummineqarallarsinnaanerannullu aningaasatigullu ikiuutinut tunngatillugu ajornartoornermi inatsit sukumiisumik oqallisigineqassasoq.
Sivitsorsaaniarnata, inatsilli pitsanngorsarniarlugu ataatsimoorfigitilerniarlugulu.
Tamannarpiaq pissutigalugu demokrateeqarpugut.
Tassunga taarsiullugu eqqartuussisut piareersimasut pitsanngorsaavigisigit, taamaalilluni suliassanik sukkasuumik eqaatsumillu suliarinnittoqarsinnaaniassammat, immaqalumi tuniluuttoqarsinnaaneranik pasitsaassaqarnermi iliuuseqarnissaq pisariaqarpat ulloq unnuarlu suliarinnittoqarsinnaassalluni.
Qularutigilluinnarpara sukumiisumik oqallittoqareerneratigut inatsisissatut siunnersuutip ilaa taanna akuerineqassanngitsoq. Kisianni politikkikkut suliniutit annertuumik kalluaasussat pillugit paartiit tamarmik inuillu peqataatinneqarnissaat sooq PINGAARUTEQARTIGINERSOQ takutippaa.
Partiit ilaasortallu tamarmik inunnit anngussiffigineqarput. Anngussat ilanngutissallugit pingaaruteqartut.
Inatsisartut nunatsinni inaarutaasumik qullersaallutik oqartussaapput akisussaaffillu tamanna pimooruttorujussuuarput.
Tapersiinissarput, allat saqqummiussaasa tusaanisaat ataatsimoorlutalu piffissami ajornartoorfiusumi ataatsimoorluta pingaarutilinnik aalajangiinissarput qilanaaraarput.
Taamatut ataatsimiittoqarnissaa piffissami sivisuumi kissaatiginikuuarput ujartornikuullugulu, taamaammat ataatsimiilluarnissaq ilimagaarput, tassani iternga tikillugu oqallissinnaalluta, taamaalilluta nunamut tamarmut pitsaanerpaanik aalajangiiniassagatta.