Utoqqaat, puigortunngornikut, angalasinnaanngitsut innarluutillillu timikkut ikiorneqarnissamik pisariaqartitsisut qaammaterpassuarni tulliuttuni puigorneqassanngillat. Taamatuttaaq puigortunngikut tarnikkullu napparimasut.
Peqqinnissaqarfimmi taakkununngaluunniit ikiortitut sulisuugutta.
Taakku ikiorneqarnissaanni pisariaqavissuuvugut immikkullu akisussaaffeqartorujussuuvugut. Tunillatsinnaveersaassavagut, toqqissisimatissavagut qanilaarfigalugillu. Ulluinnanni ajunngitsuliortartut sullippaat suleqatigalugillu.
Navianartumiittut eqqaanni eqqiluisaarluaqqissaartoqartariaqarpoq – ulloq unnuarlu. Annertoorujussuarmik eqqarsarluarluni eqqiluisaarlunilu.
Utoqqaat inoqatigullu napparsimasut ullormut tiimini amerlavallaani kisimiitissanngilagut – mattusimanitsinni imaluunniit killilersugaalluta killilersuiffigineqarlutalu inuunitsinni. annilaangallutik aperigaangata paasinartumik nassuiaattassavagut pisiniarnerusarnissamillu atorfissaqartitsipput. Piffissami maani navianartumiipput, avatangiisaasalu piffissami maani illersorluartariaqarpaat.
Taamaammat attaveqarfigineranni nutaaliortariaqarpugut.
Kissaatigisinnaavarput interneti nunami tamarmi akeqassanngitsoq, taamaalilluta PC-t imaluunniit Ipadit ajornanngitsunik programmilersukkat sprittimik eqqiakkat atorlugit attiveqarfigineqarsinnaaniassammata. Allatullu eqqarsartariaqarpugut, immaqalu qanillinagit pulaarlugit. Ilagaat ataaniilluta, salliarnartaniilluta assigisaannilu, taamaalillutalu qanimut attaveqarfigalugit.
Angalarpiarsinnaanngitsut aamma akisussaassuseqartumik immikkut ikiorneqarnissamik toqqissisimanissamillu atorfissaqartitsipput.
Piffissami maani annertuumik tamatigoortuunissamik, nutaaliornissamik mianersornissamillu atorfissaqartitsivugut.
Allatut eqqarsartariaqarpugut tunillaasinnaasutut napparsimanngitsutut tunillaariaannaanata.
Pisariaqanngitsumik navianartorsiortinniarnagit pulaassagutsigit allatut eqqarsaariaaseqartariaqarpugut. Pulaarsinnaanngikkussigit sulisut taakkununnga ikiuisussat kamaannagit, eqqarsaatigisiuk taakku isumassoraat allatullu ikiorsigit.
Takusinnaavara suliffiit utoqqartallit navianartuniittunillu sulisoqartut ingerlallualereersut, aamma Nuup matunerani.
Qulakkeertiguli nunami tamarmi ingerlalluartoqarnissaa. Najoqqutassiat eqqiluisaarnerlu pillugit sulisunut paasititsinissamik ikiuinissamillu pisariaqartitsisoqarpoq, aammalu illit uangalu inuttut taakkununnga akisussaassuseqangaarnissarput atorfissaqartinneqarpoq.
Utoqqaat allallu nammineerpiarsinnaangitsut pisiniarnissamik eqqiaanissamillu atorfissaqartitsipput, immaqalu taamaallaat isiginnaarutinik oqarasuaatinillu ullormut sammisarisinnaasaminnik atorfissaqartitsipput, allatullu attaviginissaat eqqarsaatigiuk.
Aamma peqqinnissaqarfimmut, kommuninut nunalu tamakkerlugu politikerinut maannakkorpiaq qinnuiviginninneq:
Utoqqaat, innarluutillit napparsimasullu suli immikkut najugallit sinnerlugit:
Taakkunannga paarsisinnaasunik ilaqutaqarnersut misissornissaanut immikkut piffissaqaritsi, peqqinnissaqarfimmillu atorfissaqartitsinersut paasiniarneqarli.
Utoqqaat, naiviartumiittut napparsimasullu piffissap ingerlanerani suliassaqaleriartornermi puigorneqassanngillat.
Maannakkut takusinnaavarput Danmarkimi napparsimaviit suliassaqarnerulerneq malugigaat, tamassumalu kinguneraa utoqqaat puigortunngonikullu ilaquttatik ilaginagit napparsimaviliartariaqartut imaanngilarlu napparsimavimmukartussaagunik Coronalu pissutigalugu ernumagunik tamakkiisumik akineqarsinnaanngitsut.
Tarnikkut peqqissuunissaasa isumaginissaa aamma pingaartuuvoq aammalu utoqqaat navianartumiittulluunniit piffissami maani immikkut ikiorneqarnissamik pisariaqartitsisinnaanerat mianerineqartariaqarpoq.
Nunani allani ajornartorsiutit ilinniarfigissavagut piffissamilu maani ikioqatigiilluta. Pingaaruteqarneruvorli, immikkut ikiorneqarnissamik pisariaqartitsisut isumagineqarnissaat.