Illersuutit
Peqqinnissaqarfimmi sulisut eqqiaaffigineqarnissaat atorneqarsinnaasunillu baktiaajaateqarnissaat pingaaruteqaannanngilaq. Aamma Corona-virussimik suliaqartussaappata naammattunik illersuuteqarnissaat pingaartuuvoq.
Sulisut aammali inuuttaasut sinneri toqqissisimanissaat pingaartuuvoq.
Immaqa uagutsinnut avannaani qeqertami angisuumiittunut pingaaruteqarneruvoq.
Tassami sulisugut ikitsuinnaapput imminnullu ungasillutik, inukitsumiiffiusullu pisariaqartittorujussuuvaat, taamaammat sulisutta paarnissaat immikkut pingaaruteqarpoq.
Illersuutit sulisullu paarlakaannissaannik aaqqissuussinerit, napparsimavinni init amerlanerit, Coronaqarfiusut coronaqarfiunngitsullu immikkoortinnissaat, immikkoortullu marluk akornanni immikkoortitsilluinnarnissaq peqqinnissaqarfimmi sulisut paarinissaannut pingaaruteqarpoq.
Aamma eqqiaaneq, sukumiisumik, Coronaqarfiusullu ilisarnaaserneqarnissaannut suleriaatsit ersarissut, inunnut Coronaqartunut atortut atorneqarsimasut, siniffiit Coronamik napparsimasumut immaqa atorneqarsimasut. Iliuusikinnerunermit iliuuseqarnerunissaq pitsanneruvoq, soorlu Mette Frederiksen oqartoq.
napparsimavinni immikkut ineqarnissaa aamma isumagisigu, pisariaqassappallu patienthotelli mattussivissatut atorneqarli, aamma akunnittarfiit hostellillu, napparsimavinnilu uninngasut allanut nuunneqarlik.
Minnerpaamik atortunik misissuititsigitsi, taamaalilluta pisariaqassappat piareersimaniassagatta. Qularutiginngilarput suleriaaserpassuit aallartinneqareersut, taamaattorlu nunani allani suna iluaqutaasimanersoq qissimittariaqarparput. Misilittakkat takutippaat qulaaniittut ilaat nunani allani atorneqarluarsinnaasut.
Peqqinnissaqarfimmi tarnikkut peqqissuseq
Nappaat pillugu nutartikkanik peqqinnissaqarfiup paasissutissaateqareernissaanik, suleriaaseqartoqarnissaanik illersuuteqartoqarnissaanillu qulakkeerinninnissarput pingaaruteqarluinnarpoq – avannaanit kujataanut, kangianit kimmut.
Aamma sulisut ajornartoornermi oqarasuarfiusinnaasuniittut, nakorsanut oqarasutaateqarfianiittut suliartoqqisinermilu oqarasuaatit suliartunnginnermi tarnikkut qanoq ittuunerat misissorsinnaajumallugu suleriaatsinik suliaqarnissaq, taamaalillutik sianerfigineqaraangamik suliassaqarpallaartoqalissappallu stressernersut ilisimaneqarniassammat.
Sianerfigineqaraangamik paaissutissiissutigineqartut, iliuuseqassagaangamik suut ernumanartuunersut tuniluuttoqanngitsinniarlugulu inuit sunik ikiorneqarnissamik pisariaqartitsivinnersut akisussaaffeqartorujussuunermik ilisimanissaannik pisariaqartitsipput. Suliassaq artornarsinnaavoq, taamaammat piareersimatereersigit. Aamma politiinut, ambulancertartunut portørinullu sumiiffinnilu sulisunut nakorsat peqqissaasullu assigalugit illersuuteqarnissaasa eqqarsaatiginissaa pisariaqarpoq.
Aamma peqqissaanermi isumaginninnermilu assistentit nakorsanut sumiiffinni kisimiitut, nunaqarfinniittut, sumiiffinni mikisuniittut napparsimasunik navianartumiittunillu suliaqarnermi Corona pillugu suliaqarnermi eqqarsaatigineqassapput. Maannakkumit akulikinnerusumik isumasiuseqateqartarnissamik periarfissaqassapput. Annilaangavallaaratillu iliuutsitik naleqqussarsinnaasariaqarpaat.
Taamaalillutik namminneq tarnikkut qasulerniassanngimmata, stressilerniassanngimmata imaluunniit napparsimalerniassanngimmata navianartumiilinnginniassammatalu.
Ajornartoortoqalersinnaanermi sulisut siuttuusut peqqissutsimillu suliaqartut tarnikkut peqqissuunissaat eqqaamanngikkutsigu upalungaarsimaneq naammassineqarsimassanngilaq.
Isumalluutissagut puigussanngilagut.