Innuttaasut annikitsumik misissorpavut. Nunatsinnilu innuttaasut 0,50 pct.-iinnai Coronavirusimut misissorneqarput. Inummut ataatsimut misissortinneq kr. 160,00-it missaannik akeqartoq aamma ilumoorpoq.

Nunatsinnukaannissaat angussagutsigu kisitsisit taakku tatiginassusaat misissortariaqarpavut.  Nammineq misissuinermi atortussat maani piginissaat qanorlu taakku akeqarnissaat kiisalu inuit suliassanik isumaginnittussat soorluttaaq eqqummaariffigineqartariaqartut. Nunatta sivisuumik matoqqatinnissaaniik, nunatsinniluunniit Coronap tuniluutipiluulernissaaniik taamatut iliorneq akikinnerugaatsiartussaavoq. 

Kalaallit Nunaata innuttaasui tamakkerlugit misissussagutsigit misissuinermi atortussat assersuutigalugu kr. 8.960.000-it nalinganoortut eqqartorneqarput, aningaasartuutillu allat tamatumani suliaqarnermi atorneqartussat.

Kalaallit Nunaanni inuit tamaasa misissorutsigit tunillatsinneqanngitsut tamarmik annertunerusumik ulluinnarsiutiminnut uteqqissapput. Atuarfiit, meeqqeriviit meeraaqqeriviillu ammassagaluarput. Sulisut suliartoqqissagaluarput, atuineq annertusissagaluarpoq. Pisiniarfiit neriniartarfiillu ammaqqillutik caféllu innoqqillutik.

Inuit amerlanerpaartaat ulluinnarsiutiminnut uteqqissagaluarput.

Maannamut nunatsinni imarpik qulaallugu timmisartuussinernut marluinnarnik mittarfeqarpugut. Aappaa, Kangerlussuaq, ajornartoornerup qaangiunnissaata tungaanut nunatsinnut kisiartaalluni isaariaasinnaagaluarpoq. Timmisartumiit niusut tamaasa misissorlugit, ilaasut Kangerlussuarmi inimi ataatsimi nappaat pillugu mattullugit unnuisillugit, ullullu tulliani sineriammut ingerlateqqillugit, misissuinerup napparsimanngitsut takutippagu.

Inuit nammineq kajumissutsiminnik mattusimangallarnissaat isumassarsiatsialaanersoq taava eqqartorsinnaavarput. Taamak iliornikkut tunillaassuunneq annikinnerpaaffissaaniitsissuarput, kiisalu mattusimagallarnermi inissisimaffissat utaqqiisaa piareersarneqarsinnaallutik. 

Kalaallit Nunaat aningaasaqarnermigut ajornartuulerpoq. Ikiorsiissutissat ullumikkut iluaqutaapput, kisiannili siumut isigaluta Coronap silarsuarput qaammaterpaalunni suli uninngatissappagu qanoq ingerlariaqqinnissarput eqqarsaatigissavarput.

Innuttaasut misissorneqarnissaannut peqqutit pitsaasut amerlaqaat. Aajuku pitsaaqutai qulit:

  1. Meeqqat innarligaanissaminnut mianernartumik inissisimasut angerlarsimaffitsik qimassinnaanngussavaat.
  2. Arnat persuttagaasartut aappatik nakuusertartut mattusimaqatigiunnaassavaat.
  3. Meeqqeriviit, meeraaqqeriviit atuarfiillu ammaqqissapput, angajoqqaallu suliartoqqissinnaanngorlutik.
  4. Suliffeqarfiit tamakkiisumik ammaqqissapput, inuiaqatigiinnilu aningaasanik kaaviiaartitseqqilerlutik.
  5. Takornarissat nunatsinnukaqqissinnaalissapput, inuussutissarsiorfimmullu amigaateqaqisumut aningaasanik kaaviiaartitsilissallutik.
  6. Pisortaqarfiit innuttaasut sullissinnaanngoqqissavaat.
  7. Pinngitsaalisamik feeriartoqarunnaassaaq imaluunniit akissarsiaqarani sulinnginneq taamaatinneqassalluni.
  8. Peqqinnissaqarfik pilattaasinnaanngoqqilissaaq perulunngitsullu katsorsarsinnaanngoqqillugit.
  9. Ilinniartut ilinniagaasa kinguarnissaannut aarlerinartuerussaaq.
  10. Ikiorsiissutit kaaviiaartitanik annertusiartortunik taarserneqassapput, aningaasaqarnerlu napasinnaaqqilerluni.

Misissuinermut nappaatillu tuniluunnissaata pinngitsoortinnissaanut maannakkut periuseq attanneqarsinnaanngilaq. Nuna tamakkerlugu misissuisariaqarpugut. Kimilluunniit Kalaallit Nunaanni toqusoqarnissaa kissaatigineqanngilaq, nunatsinnilu inuunermi atugarisat ajorseriarnissaat takorusunngilarput.

Maannakkut inuit tamakkerlugit misissuineq aallartilli, aallarteqqinnerussaagut. Nuna tamakkerlugu misissuisoqanngippat nunarput aningaasaqarnermigut ajornartuussavoq. Aningaasaqarnikkut kisiat naalliuttoqassanngilaq, inuiaattut immitsinnut naleqartinnerput aamma innarlerneqassaaq. Nunatsinni suliffeqarfiit akiliisinnaajunnaavippata, inuunermi atugarisat ajorseriarpata, isumaginninnermi peqqinnissaqarfimmilu aningaasaatikilliortoqarnerulerpat, taakkua tamarmik tarnikkut eqqussavaatigut. Inuit tamarmik misissunngikkutsigit 1980-ikkut naalernerani saarulliit tungaatigut ajornartoornermut assingusumik inisisimaqqilissaagut.

Suleqatigiissitsisut, Nuuk. Martsip 26-at 2020

Jan Joe Seidsen