Nalunngilarput misissuinissamut atortussat amigaataasinnaasut.
Apererusunnarporli sooq Nuummi sapinngisamik misissorsinnaasagut tamaasa misissunngikkivut? Imaluunniit nuna tamakkerlugu?
Naalakkersuisut eqqissillutik iliuuseqarsinnaanerussammata januaarilli naanerani misissuinermut periarfissat pillugit § 37 naapertorlugu apeqqummik nassiussisimavugut. Taama iliornikkut qimmitut paarsisutut nipikitsutulli paarsisimavugut. Naalakkersuisut arlaannik takkuttoqarsinnaaneranik inussiarnersumik sianigeqqusimagivut oqaatigineqarsinnaavoq.
Ikittuinnaallu takorloorsimasinnaassavaat nunarsuup ilaani taama ajortigisumik ineriartortoqassasoq. Qularnanngitsumik.
Nunanili allaniit nutaarsiassat malinnaavigigaanni, aamma taamanikkut, takuneqarsinnaasimavoq Kina assut ajornartorsiortoq.
Ullumikkumut siuartikkaanni: Uatsinnut nalunaarutigineqarpoq inuit amerlasuut sianeraangamik pimoorunneqanngitsutut misigisartut, immaqalu Covid-19-imut katsorsaateqannginnera pillugu paasissutissanik amigaateqartoqarpoq.
Immaqa taamaammat nunatsinni peqqinnissaqarfiit inuit perulullutik taassuminnga napparsimalinngippata nalorsarput qanoq iliussanerlutik. Inuilli Covid-19-imut misissorneqartussaapput.
Ajornanngippat siunertaq tassaavoq tassuunartaatigut aningaasanik sipaaruteqannginnissarput, kisianni sakkortuumik iliuuseqarluta virusi malersorlugulu nunatsinni maani ingerlaaqqinnginnissaa qulakkiissavarput.
Inuit napparsimasut misissunngikkutsigit kisitsisaatiginngisavut annikitsuinnaalluunniit qulaarneqarnissaat pisinnaanngilaq
TAAVA apeqqut ima nipeqarpoq: Sooruna sapinngisamik amerlasuut misissunngikkivut, imaluunniit maani Nuummi inuit tamarmik, nunalu tamakkerlugu, aamma sooq misissuikulaanngilagut? Misissuinerit siulliit naammassippata sapaatip-akunneranut ataasiaq ullulluunniit 14-ikkaarlugit misissuisarluta. Taamaasilluta tuniluussuunnerit sakkortuumik iliuuseqarluta unitsissinnaavagut imaluunniit nappaalanersuaqarneq pinngitsoortissinnaavarput. Imaassinnaavoq aamma misissuinissamut atortut amigaataasut, taamatullu ippoq. Immaqa nunarsuup annerpaartaani amigaatigineqarput? Taamaakkaluartoq qulakkeersinnaasariaqarparput misissortittoqarsinnaanissaa – pingaartumik inuit ersiutillit misissortinnissaat.
Isumassarsiami politikerit illuatungiliuttullu atortorissaarummik paasissutissanik avitsiviginneqatigiiffeqarnissaat, Inatsisartullu Naalakkersuisunit tunngavilersorneqaratik, aap, pissaaneq agguataarneqarpoq minnerunngitsumillu assigiinngitsunik eqqarsartaaseqartoqarpoq, sapinngisamik tamanut iluaqutaanissaa anguniarneqarpoq.
Politikerillu inuit soqutigisaat aalajangiiffigisarlugillu suliarisarlugit sulipput.
Isumaqarpunga Naalakkersuisut pisinnaasartik tamaat atorlugu taama iliortut.
Ilisimaneqartutut qaratsat amerlasuut ikinnerniit eqqarsarluaqatigiinnerusarput, isumassarsiallu piumagaanni tiguneqariaannaapput piviusunngortinneqarlutillu.
Matumuuna tamanna pillugu taama eqqarsaateqarpugut.