Virusimik killilersuiniarnermut suliniutinik pitsaasunik ilaatigut takkuttoqartarpoq, piffissaq sivikitsoq qaangiukkaangat iliuuseqartoqarnermik allanullu tusarnaarsinnaassuseqarnermik amigaateqartoqaraangat sequminneqaqqittarput.
Toqqissisimanermik pilersitsisussanik nunatta naalakkersuinikkut siuttuiniit suliniuteqartoqarnissaa amingaatigineqarpoq.
Narsamiippunga, sapinngisamillu tamatta malinnaavugut. Oqaatigisinnaavarpulli tusagassiortut apersuinissaannut akissutissarsinissaannullu piffissaliussaq sivikippallaartoq. Tamanna soqanngitsitsisumik nassataqartarpoq inuit nammineerlutik immersortaagaannik. Inunnut tamanna nalinginnaavoq.
Eqqumiiginartumik tassani oqartussat nutaarsiassanik ilumuunngitsunik akiuerusuttut apersorneqartarput.
Paasisinnaavarput nunarsuup sinnerani aamma taamatut inissisimasoqarmat. Naalakkersuinikkulli aqutsisut naalakkersuinikkut aalajangiinerit aallutarisussaavaat.
Toqqissisimasutut misiginata qimanneqartarpugut, virusip aqunneqarnissaata inuilluunniit nalinginnaat aningaasaqarnerisa tungaatigut. Inuit nalinginnaat amerlanerpaartaat apeqquseerpasittarput, nunatsinnilu naalakkersuinikkut tunngasut borgmesterit isumalioqatigiissitalluunniit akissuteqarfigisussaanngilaat. Nunatta politikerii akissuteqartussaapput. Naalakkersuisuguttaaq.
Taakkuupput nuna tamakkerlugu innuttaasunut akissuteqarnissaminnut oqartussaassuseqartut.
Suleqatigiissitsisut siunnersuutigaat nunarsuarmioqatitta virusi qanoq aqunneraat isiginiarneqarnerussasoq, immaqa pingaartumik sumiiffinni ajorluinnartumik pisoqartuni. Sumiiffiit ajortumik pisoqarfiusut ilisarnaatigivaat misissuineri ikippallaarlutillu kingusippallaarsimasut.
Siunnersuutigaarput tunillaassuisinnaasut tamarmik misissorneqarnissaat tunillaassuinnginnissaallu piniarlugu mattunneqarnissaat aammattaaq peqqittut mattunneqarnissaat piumasaqaataasoq paasineqartariaqartoq. Sineriammi ataatsimoorluta kikkut tamarmik misissorneqarnissaannut pilersaarusiortariaqarpugut, taamaasillutik eqqugaannginnerminni peqataasinnassapput.
Tunillatsittoqarsimassappat Nuummi periaaseq atorneqassaaq, kisianni malitassanik paasiuminartunik paasissutissaqartinnerullugu tamanna pissaaq.
Naalakkersuisut oqartarnerattuut immikkut ittummik inuiaqatigiinnerput aaqqissugaavoq, tamanna qulaani allaqqasunut atorluarniartigu. Erseqqarissumik paasiuminartumillu oqaatigineqassaaq aningaasaqarneq pilersaarummut tassunga akornutaassanngitsoq. Tamassuma siunissami aningaasanik annertuunik sipaaruteqartissinnaavaatigut. Aamma oqanngilagut virusi avaqqussinnaallugulu avaqqussimagipput. Oqaannarpugut sapinngisamik sivisunerpaamik pinaveersaartinnissaa ujartussagipput, taamaasiornitsinnilu toqqissisimanissaq qulakkeerlugu, aammattaaq apeqqutitsialaat inissaqartilluarlugit.
/Kim Lyberth