Nunatsinni meeqqat inuusuttullu angerlarsimaffinni angajoqqaanik atornerluisunik najugaqateqartut imaluunniit angerlarsimaffinni aningaasaateqarpianngitsuni, piitsuullutik kaallutillu inuusut, ulluni makkunani Coronamik nalaataqarfiusuni immikkut ikiorneqarnissaminnik pisariaqartitsipput.
Meeqqat inuusuttuaqqallu utaqqiisaasumik inissinneqarnissaminnut pisariaqartitsisunut aamma meeqqat inuusuttullu ikiorneqarnissaminnik pisariaqartitsisunut tamanut taama nalaataqarnitsinni sulissutigisariaqarparput isumannaallisaanermut upalungaarsimanermik pilersitsinissaq.
Aningaasatigut ikiorsiissutit, ilaqutariit mianernartunik atugallit:
Piffissaq tamakkerlugu meeqqat pisariaqartitaat qulakkeerniarlugit siunnersuutigaarput kommunit Namminersorlutik Oqartussat suleqatigalugit ilaqutariinnut aningaasaatikilliortunut aamma imigassamik hashimillu atornerluinissamut mianernartumik inissisimasunut aningaasatigut ikiorsiissutinik pilersitsissasut.
Sapaatip-akunnikkaartumik imaluunniit ullormut ikiorsiissutissat tunniunneqartarnissaat toqqarneqarsinnaavoq, imaluunniit piumasarineqarsinnaavoq aningaasat assersuutigalugu imigassaq minillugu allanut atorneqassasut.
Ajornartoorfeqarnermi siunnersuutigivarputtaaq qaavatigut akileraarutit akilerneqarnissaat utaqqisinneqassallutillu inissinneqassasut, akiitsullu akilerneqarnissaat kinguartinneqassasoq, taamaasilluta pisup nakkutigineqarsinnaanngornissaata tungaanut angerlarsimaffeeruttut navianartorsiortullu ikalisissanngilagut.
Suleqatigiissitsisuniit missiliorparput ajornartoorneq ullut 14-it sinnerlugit sivisussuseqassasoq, kisianni inuit pisariaqartitsileriataarnissartik annilaangassutiginnginniassammassuk pilertortumik inunnik isumannaarinninnermik atuutsilersitsinikkut ajornartoorfimmi tuniluunnerup annikitsuutinnissaa qulakkeerneqarsinnaavoq. Taamaammat tamanna pingaaruteqarpoq.
Nalunngilluinnarparput immikkut ittuusoq. Kisianni piffissani immikkut ittuni politikerit aaqqiissutinik aamma naalakkersuinikkut aaqqiissutinik immikkut ittumik isumannaarinnittoqartariaqarpoq.
Oqaluuserisimavarput, isumaqatigiissusiornermilu qaqissavarput, sualiareqqissavarpullu.
Ajornartoornermi orniguffissat, ajornartoornermi meeqqat angerlarsimaffiat ajornartoornermilu angajoqqaarsiat:
Meeqqat inuusuttullu ikiortariallit aamma mianernartunik atugallit ilaquttaminni angerlarsimasinnaanngitsut aqquserniniit aaneqassapput inersimasunillu Meeqqanik pinerliisimannginnermut uppernarsaatilinnik isumaginninnermilu sullissisulinnik illunukaanneqassapput isumannaatsunut.
Illut sumiiffissatut pilersinneqassapput ajornartoorfiup allanngornissaata tungaanut najorsinnaasaat.
Meeqqat inuusuttullu sumiginnarneqannginnissaat pingaaruteqarpoq.
Ilaqutariit mianernartunik atugallit aamma qanimut malinnaavigisigit. Ilaatigut ilaqutariinni inuit isumalluutaasussat ajornartoornermi angajoqqaarsiatut atorneqarlik.
Angerlarsimaffinni pissarsiarisinnaanngisaannik tarnikkut, timikkut nerisaqarnikkullu meeqqanik inuusuttunillu ikiuineq toqqissisimatitsinerlu qulakkeersinnaasariaqarparput. Mikisunik, ammasunik orniguffissaliortoqarli ulluunerani isumannanngitsumik isersimaarfigisinnaasaannik.
Kalerriissutigineqarsimasunik nalunaarutigineqarsimasunillu sulianik ingerlasoqanngimmat meeqqat inuusuttullu mianernartumik atugallit maannangaaq nanineqarlik. Taamaasilluni meeqqat inuusuttullu mianernartumik atugallit tamakkiisumik isigineqarsinnaanngussapput, taamaasillunilu taakkua nukingiussatut suliarineqarsinnaalissapput aaqqiissuteqarfigineqarsinnaanngorlutillu.
Eqqaamajuk ataatsimik annaassineq ataatsimik annaassineruvoq. Pilersaarummik annertuumik kusanartumillu nassaarnissaq utaqqineqassanngilaq. Neriuppunga kommunit politiillu suliat ingerlakkaat pissutigalugu aallaqqaataaniilli eqqartoreernikuugatsigu.
Kisianni oqareernittut ajornartoorfimmiippugut attaveqaqatigiinnerillu annaaneqarsinnaapput.
Tamannalu peqqutigalugu pissarsiagut isumassarsiagullu tamanut ammasumik saqqummiuttarpavut.
Innuttaasuniillu siunnersuutit naalakkersuinikkut ilusilersugaasumik ingerlateqqittarpavut, sutigullu tamatigut naalakkersuinikkut inuppalaartumillu sapinngisamik ikiuuttarluta. Immissinnut ikioritsi.